كونۆەنتسيانى راتيفيكاتسيالاۋ قازاقستاننىڭ جوعارى ءبىلىم جۇيەسىن حالىقارالىق ستاندارتتارعا جاقىنداتۋ, ديپلومدار مەن بىلىكتىلىكتەردى تانۋدىڭ اشىق, سەنىمدى جانە ءادىل تەتىكتەرىن قالىپتاستىرۋ جولىنداعى جۇيەلى ساياساتىنىڭ جالعاسى. توكيو كونۆەنتسياسىنا قوسىلۋ جوعارى وقۋ ورىندارى اراسىنداعى ءوزارا سەنىمدى ارتتىرىپ, ستۋدەنتتەر مەن وقىتۋشىلاردىڭ اكادەميالىق ۇتقىرلىعىن كەڭەيتەدى ءارى ورتالىق ازيا مەن ازيا-تىنىق مۇحيتى وڭىرىندە ىقپالداسقان ءبىلىم كەڭىستىگىن قالىپتاستىرۋعا جول اشادى.
قازاقستاننىڭ بۇل شەشىمى ەلدى ورتالىق ازياداعى ءبىلىم بەرۋ حابىنا اينالدىرۋ جونىندەگى ستراتەگيالىق ماقساتپەن تىعىز بايلانىستى. بۇل باسىمدىق مەملەكەت باسشىسى قاسىم-جومارت توقاەۆتىڭ «ورتالىق ازيا رەنەسسانسى: ورنىقتى دامۋ جانە وركەندەۋ جولى» اتتى ماقالاسىندا ايقىندالعان. كونۆەنتسيانى راتيفيكاتسيالاۋ ۇلتتىق بىلىكتىلىك جۇيەسىنە جانە ونى تانۋ تەتىكتەرىنە دەگەن حالىقارالىق سەنىمدى كۇشەيتەدى.
عىلىم جانە جوعارى ءبىلىم ءمينيسترى ساياسات نۇربەكتىڭ ايتۋىنشا, بۇل قادامنىڭ پراكتيكالىق ءمانى زور.
«كونۆەنتسيا ديپلومدار مەن بىلىكتىلىكتەردى ءوزارا تانۋدى جەڭىلدەتىپ, تۇلەكتەرىمىزدىڭ ازيا-تىنىق مۇحيتى وڭىرىندەگى ءبىلىم بەرۋ جانە كاسىبي مۇمكىندىكتەرگە قول جەتكىزۋىن كەڭەيتەدى. سونداي-اق وتاندىق ۋنيۆەرسيتەتتەرگە شەتەلدىك ستۋدەنتتەردى تارتۋعا ىقپال ەتەدى. بۇل جوعارى ءبىلىم جۇيەمىزدىڭ حالىقارالىق باسەكەگە قابىلەتتىلىگىن ارتتىرىپ, ەلدى تارتىمدى وڭىرلىك ءبىلىم ورتالىعى رەتىندە تانىتادى», دەدى مينيستر.
2011 جىلى قابىلدانىپ, 2018 جىلى كۇشىنە ەنگەن توكيو كونۆەنتسياسى بىلىكتىلىكتەردى تانۋدىڭ وڭىرلىك ارحيتەكتۋراسىن جاڭعىرتىپ, اشىقتىق, ساپانى قامتاماسىز ەتۋ, اقپارات الماسۋ جانە ادىلدىك قاعيداتتارىن بەكىتتى. قۇجات بىلىكتىلىكتەردى باعالاۋدا اكىمشىلىك كەدەرگىلەرگە ەمەس, وقۋ ناتيجەلەرىنە سۇيەنۋدى مىندەتتەيدى.
يۋنەسكو قازاقستانمەن بىلىكتىلىكتەردى تانۋ سالاسىندا ۇلتتىق الەۋەتتى نىعايتۋ ماقساتىندا كوپ جىلدان بەرى تىعىز ىنتىماقتاستىقتا جۇمىس ىستەپ كەلەدى. بۇل باعىتتاعى بەلسەندى قاتىسۋ وڭىرلىك ديالوگتى كۇشەيتىپ, وزىق تاجىريبەلەردى دامىتۋعا مۇمكىندىك بەردى.
الماتىداعى يۋنەسكو وڭىرلىك كەڭسەسىنىڭ ديرەكتورى ءامىر پيريچ قازاقستاندى ورتالىق ازيادا توكيو كونۆەنتسياسىن راتيفيكاتسيالاعان العاشقى مەملەكەت رەتىندە قۇتتىقتادى.
«بۇل شەشىم قازاقستاننىڭ ينكليۋزيۆتى ءارى ءادىل بىلىكتىلىكتەردى تانۋ قاعيداتتارىنا, جوعارى بىلىمدەگى حالىقارالىق ستاندارتتارعا ادالدىعىن كورسەتەدى جانە ەلدى وڭىرلىك ءبىلىم حابىنا اينالدىرۋ ستراتەگياسىنا ەلەۋلى ۇلەس قوسادى», دەدى ول.
قازاقستان راتيفيكاتسيالىق گراموتانى يۋنەسكو-عا تاپسىرعاننان كەيىن ءۇش اي وتكەن سوڭ توكيو كونۆەنتسياسىنىڭ تولىققاندى قاتىسۋشىسىنا اينالادى. قۇجاتتى ىسكە اسىرۋ جوعارى ءبىلىمدى باسقارۋ جۇيەسىن نىعايتىپ, ورتالىق ازيا مەن ازيا-تىنىق مۇحيتى وڭىرىندە ءوزارا بايلانىسقان ءارى ورنىقتى ءبىلىم كەڭىستىگىن قالىپتاستىرۋعا, سونداي-اق ورنىقتى دامۋ ماقساتتارىنىڭ 4-تارماعىن جۇزەگە اسىرۋعا سەرپىن بەرەدى.
قازاقستان مەن پاكىستان عىلىم جانە ءبىلىم سالاسىنداعى ىنتىماقتاستىقتى كەڭەيتەدى
