استانا. 25 اقپان. ەۆروچەللەندج ءتۋرنيرى اياسىندا «استانا» باسكەتبول كومانداسى ءوز الاڭىندا بەلگيالىق «وكاپي اللستاردى» 77:73 ەسەبىمەن جەڭدى. بۇل تۋرالى egemen.kz حابارلادى.
قاڭتار ايىنىڭ سوڭىندا بەلگيادا وتكەن ويىندا «وكاپي اللستار» استانالىقتاردى 108:85 ەسەبىمەن ويسىراتا جەڭگەن ەدى. سوندىقتان بۇل ويىندا قازاقستاندىق كوماندا ەسە قايتارۋ ءۇشىن ايانىپ قالمادى. العاشقى كەزەڭ 20:13 ەسەبىمەن استانالىقتاردىڭ پايداسىنا اياقتالدى. تەڭ جاعدايدا وربىگەن كەلەسى كەزەڭدە دە «استانا» ءبىر ۇپاي باسىمدىعىمەن جەڭىسكە جەتتى (22:21). ناتيجەسىندە, قوس كەزەڭ قورىتىندىسى بويىنشا الاڭ يەلەرى 42:34 ەسەبىمەن العا شىقتى. ءۇشىنشى كەزەڭدە «استانا» 18 ۇپاي جيناسا, بەلگيالىقتار 16 ۇپايمەن جاۋاپ قايتاردى. ال سوڭعى شەشۋشى كەزەڭدە قوناقتاردىڭ قارقىنى كۇشتى بولدى. دەسەك تە, ولار 23:17 ەسەبىمەن كەزەڭدى ءوز پايدالارىنا اياقتاعانىمەن, جالپىەسەپتە ەسە جىبەرۋگە ءماجبۇر بولدى.
وسىلايشا «استانا» ءتۋرنيردىڭ توپتىق كەزەڭىندە وتكىزگەن التى ويىننان 9 ۇپاي جينادى. الايدا, بۇل كورسەتكىش رامۋناس بۋتاۋتاس جاتتىقتىراتىن كومانداعا سايىستىڭ پلەي-وفف كەزەڭىنە شىعۋ ءۇشىن جەتكىلىكسىز بولدى. سەبەبى, سوڭعى تۋردا توپتاعى باستى قارسىلاسىمىز يتاليالىق «برينديزي» كومانداسى دا جەڭىسكە جەتىپ, 9 ۇپاي ولجالادى. يتاليالىقتار سىرت الاڭدا رۋمىنيانىڭ «ەنەرگيا روۆيناري» كومانداسىنان 78:67 ەسەبىمەن باسىم تۇسكەن ەدى. ناتيجەسىندە, دوپ ايىرماسى بويىنشا «برينديزي» ەكىنشى ورىنعا تابان تىرەپ, كەلەسى كەزەڭگە بەرىلەر جولداماعا يە بولدى. ءبىرىنشى ورىنعا 6 ويىننان 10 ۇپاي جيعان رۋمىنيالىق كوماندا جايعاستى. ال «ءى» توبىندا ءۇشىنشى ورىن العان «استانا» جارىستى اياقتاۋعا ءماجبۇر بولدى.
ەلامان قوڭىر.
دەرەك: egemen.kz.
سۋرەت: bcastana.kz.
