كونستيتۋتسيا – مەملەكەتتىك بيلىكتىڭ قۇرىلىمىن ايقىندايتىن, ازاماتتاردىڭ قۇقىقتارى مەن بوستاندىقتارىنىڭ كەپىلدىكتەرىن بەلگىلەيتىن جانە ەل دامۋىنىڭ نەگىزگى قاعيداتتارىن بەكىتەتىن اسا ماڭىزدى قۇجات. سوندىقتان مۇنداي تاريحي شەشىمدەر داۋىس بەرۋ ۇدەرىسىنىڭ تولىق اشىقتىعى, زاڭدىلىعى جانە ادىلدىگى جاعدايىندا قابىلدانۋى ءتيىس.
ء«بىزدىڭ باستى ماقساتىمىز – رەفەرەندۋمنىڭ بارلىق كەزەڭىندە قوعامدىق باقىلاۋدى قامتاماسىز ەتۋ», دەپ مالىمدەدى «داۋىس» قوعامدىق باقىلاۋشىلار كواليتسياسى.
كواليتسيا جۇمىسى جۇيەلى تۇردە جانە رەسپۋبليكا كولەمىندە ۇيىمداستىرىلادى. بايقاۋشىلارىمىز داۋىس بەرۋ ۋچاسكەلەرى اشىلعان ساتتەن باستاپ قورىتىندىلار شىعارىلعانعا دەيىن ءوز مىندەتتەرىن كاسىبي, مۇقيات ءارى جاۋاپكەرشىلىكپەن اتقارادى.
رەفەرەندۋمعا ارنالعان رەسمي سايت ىسكە قوسىلدى
قوعامدىق سەنىم سوزبەن ەمەس, ناقتى ارەكەتپەن, زاڭ تالاپتارىن ساقتاۋ ارقىلى قالىپتاسادى. تاۋەلسىز باقىلاۋ – سايلاۋ ۇدەرىسىنىڭ اشىقتىعى مەن ايقىندىعىن قامتاماسىز ەتەتىن ماڭىزدى تەتىك.
«داۋىس» كواليتسياسى – ەل بولاشاعىنا بەيجاي قارامايتىن ازاماتتاردىڭ بىرلەستىگى. ءاربىر قازاقستاندىقتىڭ داۋىسى ەسكەرىلىپ, ەركى ءادىل تۇردە كورىنىس تابۋى – ءبىزدىڭ ورتاق مىندەتىمىز. ءبىز وسى ماقسات جولىندا ەڭبەك ەتەمىز.
