فوتو: istockphoto.com
بانك مالىمەتىنشە, الاياقتاردىڭ ارەكەتى فيشينگتىك سايتتار مەن الەۋمەتتىك جەلىلەردەن جينالعان دەرەكتەردەن باستالادى. ولار كليەنتتىڭ اتىنان بانككە حابارلاسىپ, «كارتامدى جوعالتتىم» دەگەن جەلەۋمەن ونى بۇعاتتاۋعا قول جەتكىزەدى. وسىدان كەيىن الاياقتار زارداپ شەگۋشىگە قوڭىراۋ شالىپ, وزدەرىن «قاۋىپسىزدىك قىزمەتى» رەتىندە تانىستىرادى. «شوتتى بۇعاتتان شىعارامىز» نەمەسە «قاراجاتتى قاۋىپسىز جەرگە اۋدارامىز» دەگەن الداۋمەن SMS-كود پەن قۇپيا پارولدەردى يەمدەنىپ الادى.
«تولەم كارتاسى بۇعاتتالعان جاعدايدا كارتانىڭ ەكىنشى بەتىندە نەمەسە ءموبيلدى قوسىمشادا كورسەتىلگەن ءنومىر ارقىلى بانكتىڭ رەسمي كولل-ورتالىعىنا حابارلاسقان دۇرىس. ەسىڭىزدە بولسىن, قارجى ۇيىمدارىنىڭ قىزمەتكەرلەرى SMS-حابارلامادا كورسەتىلگەن پارول مەن كودتى ەشقاشان سۇرامايدى جانە ءموبيلدى قۇرىلعىنى قاشىقتان باسقاراتىن قوسىمشالاردى ورناتۋدى تالاپ ەتپەيدى», دەلىنگەن حابارلامادا.
بۇدان بولەك, بانكومات ماڭىندا «كارتام زاقىمدالدى» دەپ باسقانىڭ شوتىنا اقشا اۋدارتۋعا كومەك سۇرايتىن «كەزدەيسوق جولاۋشىلاردان» دا ساق بولعان ءجون. مۇنداي «كومەك» ءسىزدى بايقاۋسىزدا دروپپەرلىك (قىلمىستىق اقشانى جىلىستاتۋ) ارەكەتكە يتەرمەلەپ, زاڭ الدىندا جاۋاپقا تارتۋى مۇمكىن.
«بانك كارتاسى مەن ونىڭ دەرەكتەرىن ەشكىمگە بەرمەۋگە, بەيتانىس ادامعا اقشا اۋدارماۋعا, اركەز قىراعى جۇرۋگە جانە كەز كەلگەن اقپاراتتى ەكىنشى دەڭگەيلى بانكتەردىڭ رەسمي نومىرلەرى ارقىلى كولل-ورتالىعىنا قوڭىراۋ شالىپ, تەكسەرىپ الۋعا كەڭەس بەرەدى.
ۇلتتىق بانك قىزمەتكەرلەرى جەكە تۇلعالاردىڭ شوتىنا قىزمەت كورسەتپەيتىنىن, اۋديو جانە ۆيدەوقوڭىراۋ شالمايتىنىن, ءتۇرلى ينۆەستيتسيالىق پاي قورلارى مەن قارجى ونىمدەرىنە اقشالاي سالىم سالۋدى ۇسىنبايتىنىن, قاراجاتتى ساقتاندىرۋمەن اينالىسپايتىنىن جانە حالىقپەن اقشالاي ەسەپ ايىرىسۋ وپەراتسيالارىن جۇرگىزبەيتىنىن ەسكە سالامىز», دەلىنگەن حابارلامادا.
