فوتو: دەنساۋلىق ساقتاۋ مينيسترلىگى
دارىگەرلەر ءۇشىن ءار مينۋت قىمبات بولدى. ناۋقاستىڭ ومىرىنە تىكەلەي قاۋىپ تونگەندىكتەن, جانساقتاۋ بولىمىندە شۇعىل تەكسەرۋلەر جۇرگىزىلىپ, دەرەۋ ەم شارالارى باستالدى. حيرۋرگتەر ىشكى قان كەتۋدى توقتاتىپ, زاقىمدانعان باۋىردى تىكتى. وكپەنىڭ قىزمەتىن قالپىنا كەلتىرۋ ءۇشىن پلەۆرا قۋىسىنا درەناج قويىلدى. سونىمەن قاتار جامباس سۇيەكتەرىن تۇراقتاندىرۋ ماقساتىندا سىرتقى بەكىتۋ اپپاراتى ورناتىلدى.
جەدەل ءارى ۇيلەسىمدى ارەكەتتىڭ ناتيجەسىندە ناۋقاستىڭ جاعدايى تۇراقتالىپ, ومىرىنە تونگەن قاۋىپ سەيىلدى. الايدا اۋىر جاراقاتتار جامباس سۇيەكتەرىنە كۇردەلى رەكونسترۋكتسيالىق وتا جاساۋدى قاجەت ەتتى.
ادەتتە مۇنداي دەڭگەيدەگى وپەراتسيالار وبلىستىق نەمەسە رەسپۋبليكالىق كلينيكالاردا ورىندالادى. بىراق ناۋقاستىڭ جاعدايى ونى باسقا جاققا تاسىمالداۋعا مۇمكىندىك بەرمەدى. وسىعان بايلانىستى تراۆماتولوگيا ينستيتۋتىنىڭ ماماندارىمەن تەلەمەديتسينا ارقىلى كونسيليۋم وتكىزىلىپ, اۋداندىق اۋرۋحانا دارىگەرلەرى وتا جاساۋدى وزدەرى جۇزەگە اسىرۋ تۋرالى شەشىم قابىلدادى. ماماندار قاشىقتان باقىلاۋ مەن كەڭەس بەرىپ وتىردى.
اۋدان تاريحىندا العاش رەت جاسالعان بۇل كۇردەلى وپەراتسياعا بەس دارىگەر قاتىستى. جەتى ساعاتقا سوزىلعان وتا بارىسىندا جامباس سۇيەكتەرى قايتا قالپىنا كەلتىرىلدى. بۇل ۇلكەن تاجىريبە مەن جوعارى دالدىكتى تالاپ ەتەتىن اسا جاۋاپتى جۇمىس بولدى.
قازىر ناۋقاستىڭ جاعدايى تۇراقتى, ورتاشا اۋىر دەڭگەيدە دەپ باعالانىپ وتىر. ەڭ ماڭىزدىسى – ونىڭ قيمىل-قوزعالىسى قالپىنا كەلە باستادى.
استانالىق قۇتقارۋشىلار كوپىردەن سەكىرمەك بولعان ەر ادامدى امان الىپ قالدى
بۇل وقيعا مەديتسينا قىزمەتكەرلەرىنىڭ كاسىبيلىگىن, تەلەمەديتسينا مۇمكىندىكتەرىنىڭ تيىمدىلىگىن جانە شالعاي اۋدانداردا دا جوعارى تەحنولوگيالىق مەديتسينالىق كومەكتىڭ قولجەتىمدى ەكەنىن ايقىن كورسەتتى.
