وسكەمەن. 25 اقپان. شىعىسقازاقستاندىقتار «قازاقستان حالقى اسسامبلەياسى – 20 ىزگى ءىس» ەستافەتاسىن زور قوشەمەتپەن قارسى الدى. بۇل تۋرالى egemen.kz ءتىلشىسى حابارلادى.
وبلىس ورتالىعىنا كىرە بەرىستەگى قاراكەرەي قابانباي باتىر ەسكەرتكىشىنىڭ جانىندا ەلىمىزدىڭ كوك بايراعى مەن قازاقستان حالقى اسسامبلەياسىنىڭ جانە اسسامبلەيا جىلىنىڭ تۋلارى جەلبىرەگەن اۆتوكولىك كەرۋەنى اتالعان ەستافەتانىڭ باستى نىشانى «تايقازاندى» توبەلەرىنە كوتەرە ەنگەندە شىعىس ءوڭىرىنىڭ حالقى ايرىقشا سالتاناتپەن كۇتىپ الدى.
ەستافەتا مۇشەلەرى وسكەمەننىڭ ورتالىق الاڭىنداعى اباي ەسكەرتكىشىنە تاعزىم ەتىپ, گۇل شوقتارىن قويدى. وبلىس ورتالىعىندا «تايقازاندى» ءوڭىر باسشىلارى, ەتنومادەني بىرلەستىكتەردىڭ وكىلدەرى مەن قالا جۇرتشىلىعى قارسى الدى. «Subaru club ukg» اۆتوكولىك تىزبەگى ءارى قاراي وزدەرىنىڭ ۇلى وتان سوعىسىنىڭ ارداگەرلەرىنە ارنالعان ماتەريالدىق كومەكتەرىن تاپسىردى. سودان سوڭ دوستىق ۇيىندە ءباسپاسوز وكىلدەرىمەن كەزدەسۋ وتكىزدى.
تايقازان – توقشىلىقتىڭ, بەرەكە-بىرلىكتىڭ نىشانى. تايقازاننىڭ كوشىرمەسى اقپان ايىنىڭ باسىندا ەلىمىزدەگى تاتۋلىق پەن كەلىسىمنىڭ كورىنىسى رەتىندە قاسيەتتى تۇركىستاننان ەلورداعا جەتكىزىلگەن بولاتىن. استانادان باستالعان اۆتوكولىك كەرۋەنى تايقازاندى ەلىمىزدىڭ بارلىق وبلىستارىمەن الىپ وتپەك. وسىعان دەيىن بىرنەشە وڭىرلەردى ارالاپ ۇلگەرگەن تايقازاننىڭ ءىشىن وتانداستارىمىز ءتۇرلى قايىرىمدىلىق يدەيالارى مەن جوسپارلارى جازىلعان جازبالارعا تولتىرادى. بۇل باستامالار بيىلعى اسسامبلەيا جىلى اياسىندا جۇزەگە اسىرىلماق.
«شىعىس قازاقستان وبلىسىنىڭ تۇرعىندارى «تايقازان» ەستافەتاسىن 23 اقپاندا قارسى الدى. ۇلتىمىز ءۇشىن قاسيەتى بولەك جادىگەر الدىمەن سەمەي شاھارىنا جەتكىزىلگەن بولاتىن. ەندى, مىنە, وسكەمەندىك تۇرعىندار دا اسىعا كۇتكەن ەستافەتامەن قاۋىشىپ, تايقازاندى كورۋ باقىتىنا يە بولدى. بۇل جادىگەر وبلىس ورتالىعىندا 27 اقپانعا دەيىن بولادى. شىعىسقازاقستاندىقتار قاسيەتتى جادىگەردىڭ وڭىرىمىزگە كەلۋىن جاقسىلىققا بالاپ وتىر», – دەدى وبلىستاعى قازاقستان حالقى اسسامبلەياسى حاتشىلىعىنىڭ جەتەكشىسى ەركىمبەك ايازباەۆ.
ىزگى تىلەكتەرگە تولى «تايقازان» ەستافەتاسى كەلەسى كەزەكتە الماتى قالاسىنا جەتكىزىلەتىن بولادى.
دۋمان اناش.
دەرەك, سۋرەت: egemen.kz.
