استانا. 25 اقپان. كەشە تۇندە چەمپيوندار ليگاسىنىڭ 1/8 فينالداعى كەزەكتى ەكى ويىنى وينالدى. ولاردىڭ بىرىندە – مەيماندار, ەكىنشىسىندە الاڭ يەلەرى جەڭىسكە جەتتى. بۇل تۋرالى Football.ua حابارلادى.
اعىلشىننىڭ مانچەستەر قالاسىندا «مانچەستەر سيتي» مەن يسپاننىڭ «بارسەلوناسى» كەزدەستى. بۇل ەكى كوماندا وتكەن جىلعى 1/8 فينالدىڭ ءبىرىنشى ماتچىندا دا تاپ وسىلاي البيون جەرىندە ۇشىراسقان ەدى. وندا مانچەستەرلىكتەر بارسەلونالىقتاردان 0:2 بولىپ ۇتىلىپ, ءىس جۇزىندە گيرەك فينالعا شىعۋ مۇمكىندىگىنەن ايرىلىپ قالعان. بۇل جولدى دا جەڭىستىڭ جەتەگى «قالالىقتارعا» قاراي قۇلادى. ولار كەزدەسۋدىڭ 16 جانە 30-مينۋتتارىندا لۋيس سۋارەس (سۋرەتتە) سوققان ەكى گولدىڭ ارقاسىندا تاعى دا 2:0 ەسەبىمەن العا شىقتى. الايدا, ويىننىڭ ەكىنشى بولىگىندە, دالىرەگى 69-مينۋتتا سەرحيو اگۋەرو ءبىر جاۋاپ دوپ قايتارىپ, ءوز كومانداسىن «قۇرعاق ەسەپتەن» قورعاپ قالدى. بۇل جولى دا «ءسيتيدىڭ» ءبىر ويىنشىسى الاڭنان قۋىلدى. بىراق ول وتكەن جىلى دەميكەليستىڭ الاڭنان كەتكەنىندەگىدەي ويىننىڭ اقىرعى ناتيجەسىنە اسەر كەتكەن جوق. سەبەبى, گاەل كليشي 74-مينۋتتا «قىزىل قاعاز» العانعا دەيىن-اق ول ناقتىلانىپ قويىلعان ەدى. دەگەنمەن, ماتچتىڭ ەڭ سوڭعى دەمى سوعىلىپ جاتقاندا بارسەلونالىقتاردىڭ تاعى ءبىر گول سوعاتىنداي مۇمكىندىكتەرى بولىپ ەدى. ايتكەنمەن, ليونەل مەسسي 90+4 مينۋتتا بەلگىلەنگەن پەنالتيدى سوعا المادى.
يتاليانىڭ تۋرين قالاسىندا جەرگىلىكتى «يۋۆەنتۋس» پەن گەرمانيانىڭ «بورۋسسيا» (دورتمۋند) كوماندالارى ۇشىراستى. مۇندا دا 2:1 دەگەن ەسەپ تىركەلدى. بىراق ول الاڭ يەلەرىنىڭ پايداسىنا شەشىلدى. قورىتىندى ەسەپ ءبىرىنشى تايمدا-اق جاسالىپ قويدى. ەسەپتى تۋريندىك كارلوس تەۆەس 13-مينۋتتا اشتى. ارادا 5 مينۋت وتكەندە نەمىس ماريو رويس تارازى باسىن تەڭەستىردى. ال 43-مينۋتتا الۆارو موراتا «يۋۆەنتۋستى» العا شىعاردى.
بۇگىن تۇندە 1/8 فينالدىق كەزەڭنىڭ ءبىرىنشى ويىندارى اياقتالادى. بۇل جولى الاڭعا «ارسەنال» (لوندون, انگليا) – «موناكو» (موناكو, فرانتسيا), «بايەر» (لەۆەركۋزەن, گەرمانيا) – «اتلەتيكو» (مادريد, يسپانيا) شىعادى.
جاۋاپ ويىندار 10, 11, 17 جانە 18 ناۋرىز كۇندەرى وينالادى.
دامير قوجامقۇل.
دەرەك: Football.ua.
سۋرەت: «چەمپيونات.رۋ».
