استانا. 24 اقپان. كيپر رەسەيگە قاتىستى سانكتسيالارعا قارسىلىق ءبىلدىردى. بۇل تۋرالى Lenta.ru حابارلايدى.
كيپردىڭ پرەزيدەنتى نيكوس اناستاسياديس ماسكەۋگە بارعان رەسمي ساپارى بارىسىندا اگەنتتىككە بەرگەن سۇحباتىندا سانكتسيالارعا قاتىستى سىن ايتتى. ونىڭ ايتۋىنشا, سانكتسيانى سالۋشىلار كوزدەگەن ناتيجەلەرىنە قول جەتكىزگەن جوق.
«ەۋرووداققا مۇشە بولعالى بەرى كيپر رەسەي فەدەراتسياسىن ماڭىزدى ستراتەگيالىق سەرىكتەس ەل دەپ ەسەپتەيتىن جانە ءارى قاراي دا سولاي ەسەپتەيتىن ەلدەردىڭ توبىنا كىردى», - دەدى ول.
اناستاسياديس كيپر مەن رەسەيدىڭ ءوزارا تىعىز بايلانىستا ەكەنىن ايتتى. «بۇل قارىم-قاتىناس ءبىزدىڭ ەكونوميكامىز بەن قورعانىس جۇيەسىنە قاتىستى. ءبىز رەسەيدەن جەڭىلدەتىلگەن نەسيە الدىق, كيپرگە رەسەيدىڭ مىڭداعان فيرماسى ينۆەستيتسيا اكەلىپ وتىر. بىزدە 30 مىڭ رەسەيلىك ازامات تۇرادى. تۋريزم دە سىزدەردىڭ وتانداستارىڭىزدىڭ ارقاسىندا ەداۋىر دامىپ كەلەدى. سوندىقتان بۇل سانكتسيالار تەك رەسەيگە عانا ەمەس, كيپرگە, اۆسترياعا, يسپانياعا, جالپى, كۇللى ەۋروپاعا كەرى اسەر ەتىپ وتىر», - دەدى ول.
ءاناستاسياديستىڭ سوزىنە قاراعاندا, كيپر كوپتەگەن ەۋروپالىق ەلدەردىڭ ەكونوميكاسىنداعى احۋالدى قيىنداتىپ, ۋكراينا حالقىنىڭ كەلەشەگى ءۇشىن ەشقانداي پايدا اكەلمەگەن سانكتسيالاردىڭ ماقساتى تۋرالى سۇراقتى ەۋروپالىق وداققا اشىق تۇردە قويىپ وتىر.
«ەۋروپالىق وداققا مۇشە ەلدەردىڭ كوپشىلىگىندە سانكتسيالاردىڭ مۇمكىندىك تۋعىزۋدىڭ ورنىنا, ەۋروپالىق ەلدەر مەن حالىقتارعا كەرىسىنشە اسەر ەتىپ جاتقانى تۋرالى پىكىرلەر كۇشەيىپ كەلەدى. كيپر - شاعىن مەملەكەت جانە بىزدە الپاۋىت ەلدەردىڭ پوزيتسياسىنا ىقپال ەتەتىن مۇمكىندىك جوق, بىراق ءبىز وسىلايشا از بولسا دا سانكتسيانىڭ زاردابىن ازايتىپ, جۇمسارتقىمىز كەلەدى», - دەپ مويىندادى كيپر پرەزيدەنتى نيكوس اناستاسياديس.
ەسكە سالا كەتەيىك, بۇعان دەيىن كانادانىڭ رەسەيگە قارسى جاڭا سانكتسيالاردى ەنگىزگەنى تۋرالى حابارلانعان ەدى. اقپاننىڭ 18-ندە كانادانىڭ پرەمەر-ءمينيسترى ستيۆەن حارپەر رەسەي مەن ۋكراينانىڭ 37 ازاماتىنىڭ ەلدەن شىعۋىنا تىيىم سالۋ تۋرالى, 17 رەسەيلىك جانە ۋكراينالىق كومپانياعا ەكونوميكالىق سانكتسيالار ەنگىزىلگەنى تۋرالى مالىمدەمەنى جاريالادى. رەسەيگە قارسى جاڭا سانكتسيالار ۋكرايناداعى سوڭعى اپتالارداعى ساربازداردىڭ ارەكەتتەرىنە جاۋاپ رەتىندە ەنگىزىلگەن.
مۇرات ايتقوجا.
