اتىراۋ. 25 اقپان. اتىراۋ وبلىسىنداعى ارىپتەستەرىمەن تىعىز بايلانىس جاساۋ ءۇشىن رەسەيدەگى ومبى وبلىسىنىڭ كاسىپكەرلەرى كەلدى. بۇل تۋرالى egemen.kz ءتىلشىسى حابارلادى.
بۇدان بىلاي ساۋدا-ەكونوميكالىق, عىلىمي-تەحنيكالىق جانە وزگە دە سالالارداعى قارىم-قاتىناستى نىعايتۋدى كوزدەگەن اتىراۋلىق جانە ومبىلىق كاسىپكەرلەر ءوزارا كەلىسىم اياسىندا ءبىر-بىرىمەن ءجيى كەزدەسۋگە ۋاعدالاستى. «ءبىز اتىراۋعا ءبىرىنشى رەت كەلىپ تۇرمىز. بۇل ءوڭىردىڭ ەكونوميكاسىن دامىتۋدا مۇناي-گاز ونەركاسىبىنە باسىم باعىت بەرىلەدى. كاسىپكەرلەردىڭ ءىسى ومبىدا دا, اتىراۋدا دا ءبىر-بىرىمەن وتە ۇقساس. ءبىزدىڭ بۇل ساپارىمىزدا اتىراۋعا ومبى وبلىسىنداعى 9 كومپانيانىڭ وكىلى كەلدى. اسىرەسە, «گازپرومنەفت-ونپز», «تيتان» سەكىلدى كاسىپورىنداردىڭ اتىراۋداعى ارىپتەستەرىمەن بايلانىسى نىعايعانىن قالايمىز. ءبىز اتىراۋلىق كاسىپكەرلەرمەن وزگە دە سالالاردا قارىم-قاتىناسىمىزدى كەڭەيتكىمىز كەلەدى. بۇل ساپار ەكى ەل كاسىپكەرلەرى ءۇشىن پايدالى ءارى جەمىستى بولارىنا سەنەمىن», دەدى ومبى وبلىستىق ساۋدا-ونەركاسىپ پالاتاسىنىڭ ۆيتسە-پرەزيدەنتى اندرەي تيتوۆ.
ومبىلىق كاسىپكەرلەردىڭ اتىراۋعا ساپارى مۇناي-گاز ونەركاسىبى سالاسىندا كاسىبىن دوڭگەلەتكەن شاعىن جانە ورتا بيزنەس وكىلدەرىمەن كەزدەسۋدەن باستالدى. اتىراۋ وبلىسى كاسىپكەرلەر پالاتاسىنىڭ باسشىلىعى ءوڭىردى وركەندەتۋ جونىندەگى الەۋمەتتىك-ەكونوميكالىق كورسەتكىشتەرمەن تانىستىردى. رەسەي كاسىپكەرلەرى «ءاتموز», «ەمبىمۇنايگاز» جانە «راۋان نالكو» سەكىلدى مۇناي-گاز ونەركاسىبى سالاسىنداعى ىرگەلى كاسىپورىنداردى ارالاپ, ولاردىڭ بۇگىنگى تىنىس-تىرشىلىگىمەن جۇمىسىمەن كەڭىنەن تانىسۋعا مۇمكىندىك الدى.
«ءبىزدىڭ جۇمىسىمىزدىڭ باسىم باعىتىنىڭ ءبىرى – ەۋروازيالىق ەكونوميكالىق وداق اياسىندا شەكارالاس وڭىرلەر اراسىنداعى بايلانىستى كەڭەيتۋ. ومبىلىق كاسىپورىندار ءونىمى مەن جۇمىسى ءبىزدىڭ كاسىپكەرلەرىمىزدى قىزىقتىرادى. سول سەبەپتەن بۇدان بىلايعى ۋاقىتتا ەكى وبلىستىڭ كاسىپكەرلەرى ءبىر-بىرىمەن تىعىز بايلانىس جاساپ, ءوزارا ءتيىمدى كەلىسىمدەر جاسايدى دەپ ويلايمىن», دەدى اتىراۋ وبلىستىق كاسىپكەرلەر پالاتاسىنىڭ ديرەكتورى اسىلبەك جاكيەۆ.
جولداسبەك شوپەعۇل.
دەرەك, سۋرەت: اتىراۋ وبلىستىق كاسىپكەرلەر پالاتاسى.
