كونتسەرت بارىسىندا قازاقستاندىقتاردى الداعى رەفەرەندۋمعا قاتىسىپ, جاڭا كونستيتۋتسيا جوباسى بويىنشا ءوز ۇستانىمىن بىلدىرۋگە ۇندەۋ جاسالدى.
مەملەكەت باسشىسى قاسىم-جومارت توقاەۆ اتاپ وتكەندەي, كونستيتۋتسيالىق وزگەرىستەر – ەلدەگى جۇيەلى ساياسي جاڭعىرۋدىڭ جالعاسى. ونىڭ ايتۋىنشا, رەفورمالاردىڭ نەگىزگى ماقساتى – ادىلدىك پەن زاڭ ۇستەمدىگى قاعيداتتارىن نىعايتۋ, وكىلدى ينستيتۋتتاردىڭ ءرولىن كۇشەيتۋ جانە بيلىك تارماقتارىنىڭ ءوزارا ءىس-قيمىلىنىڭ نەعۇرلىم تەڭگەرىمدى مودەلىن قالىپتاستىرۋ. پرەزيدەنت ۇسىنىلعان وزگەرىستەردىڭ ءمانىن اشىق تۇردە قوعام تالقىسىنا شىعارىپ, حالىقتى كەڭىنەن اقپاراتتاندىرۋ ماڭىزدى ەكەنىن دە اتاپ وتكەن ەدى.
ءىس-شارا قوعامدىق مادەني اكتسيا فورماتىندا ءوتىپ, وعان ەلوردا تۇرعىندارى مەن قوناقتارى جينالدى. ساحنادا بەلگىلى قازاقستاندىق ورىنداۋشىلار – Raim, داستان ورازبەكوۆ, Bayansulu, Nazzarbeck, اقتوتى بولشوۆا جانە وزگە دە ارتىستەر ونەر كورسەتتى. كونتسەرتتىك باعدارلاما جالپىۇلتتىق كواليتسيا مۇشەلەرىنىڭ تاقىرىپ اياسىنداعى باياندامالارىمەن جالعاسىن تاپتى. جارقىنبەك امانتاي, ماقسات تولىقباي, ايكەرىم ەسەنالى, اقەركە يسكاندەروۆا جاڭا كونستيتۋتسيا جوباسىنىڭ نەگىزگى باعىتتارى بويىنشا ءتۇسىندىرۋ جۇمىستارىن جۇرگىزىپ, الداعى رەفەرەندۋم تۋرالى ازاماتتاردى حاباردار ەتتى. سونداي-اق ولار سانالى تاڭداۋ جاساۋ مەن بەلسەندى ازاماتتىق ۇستانىمنىڭ ماڭىزىن اتاپ ءوتتى.
ءوز سوزىندە جارقىنبەك امانتاي كونستيتۋتسيالىق وزگەرىستەر ەلدىڭ ساياسي دامۋىنىڭ جاڭا كەزەڭىن جانە بۇگىنگى رەفورمالار ارقىلى جۇزەگە اسىپ وتىرعان جاڭعىرۋدىڭ تاريحي الەۋەتىن ايقىندايتىنىن اتاپ ءوتتى.
«اتا زاڭىمىز زامان تالابىن ساي جانە جاڭا سىن-تەگەۋرىندەردى ەسكەرە وتىرىپ ازىرلەندى. بۇل ەلىمىزدىڭ دامۋىنا جانە مۇددەسىن قورعاۋعا مۇمكىندىك بەرەدى. ءاربىر قازاقستاندىق رەفەرەندۋمعا قاتىسۋ ارقىلى ءوز ازاماتتىق ۇستانىمىن ءبىلدىرىپ, ادىلەتتى, اشىق ءارى زاماناۋي مەملەكەتتىڭ دامۋىنا ۇلەس قوسۋعا ءتيىس», دەدى ول.
ال ماقسات تولىقباي جاڭا كونستيتۋتسيا جوباسى ەل دامۋىنىڭ زاماناۋي باسىمدىقتارىن ايقىندايتىنىن جانە ەگەمەندىك پەن ازاماتتاردىڭ قۇقىقتارىن قورعاۋ كەپىلدىكتەرىن كۇشەيتەتىنىن اتاپ ءوتتى.
«قۇجاتتا ءبىلىم, عىلىم, يننوۆاتسيا مەملەكەتتىڭ باستى ستراتەگيالىق باعىتى, نەگىزگى قۇندىلىعى رەتىندە ايقىندالدى. قولدانىستاعى كونستيتۋتسيادا حالىقتىڭ مەملەكەتتىك بيلىكتىڭ قاينار كوزى ەكەنى جازىلسا, ال جاڭا قۇجاتتا مەملەكەتتىك بيلىكتىڭ بىردەن-ءبىر باستاۋى جانە ەگەمەندىكتىڭ يەسى ەكەنى بەكىتىلدى», دەدى ماقسات تولىقباي.
اكەركە يسكاندەروۆانىڭ ايتۋىنشا, جاڭا كونستيتۋتسيا جوباسى ازاماتتاردىڭ قاتىسۋ اياسىن كەڭەيتىپ, جاستاردىڭ قوعامدىق پروتسەستەرگە بەلسەندى ارالاسۋىنا جاعداي جاسايدى.
«ۇسىنىلىپ وتىرعان وزگەرىستەردىڭ تۇپكى ءمانى – تاۋەلسىزدىگىمىزدى نىعايتۋ, قورعاۋ جانە جاڭا بۋىنعا قۋاتتى مەملەكەتتى امانات ەتۋ. الداعى رەفەرەندۋم – بۇل جاي عانا داۋىس بەرۋ ەمەس, ارقايسىمىزدىڭ ەل تاعدىرىنا قوساتىن ۇلەسىمىز. «مەنىڭ پىكىرىم ماڭىزدى» دەپ ايتۋ مۇمكىندىگى. بولاشاق ءوز قولىمىزدا», دەدى ول.
سونىمەن قاتار ايكەرىم ەسەنالى ەلدىڭ قۇقىقتىق نەگىزىن قازىرگى زامان تالابىنا ساي جاڭعىرتۋ قاجەت ەكەنىن اتاپ ءوتتى.
«ەلىمىزدىڭ دامۋىنا جاڭا قاعيدالار مەن زاماناۋي زاڭنامالىق شەشىمدەر بولۋعا ءتيىس. بالالارىمىزدىڭ, جاستارىمىزدىڭ بولاشاعى جارقىن ءارى سەنىمدى بولۋى ءۇشىن بىزگە جاڭا كونستيتۋتسيا قاجەت», دەدى ايكەرىم ەسەنالى.
ۇيىمداستىرۋشىلاردىڭ مالىمدەۋىنشە, ءىس-شارا 10 مىڭنان استام ادامدى بىرىكتىرىپ, جالپىۇلتتىق ءتۇسىندىرۋ ناۋقانى اياسىنداعى العاشقى اۋقىمدى قوعامدىق الاڭداردىڭ بىرىنە اينالدى. ەستەرىڭىزگە سالا كەتەيىك, بۇعان دەيىن جەتەكشى ساياسي پارتيالار مەن قوعامدىق ۇيىمدار وكىلدەرىن بىرىكتىرگەن كواليتسيا قۇرىلعانى تۋرالى حابارلاندى.
