پەتروپاۆلدا ساياساتكەر-ايەلدەر كلۋبىنىڭ ءتورايىمى سايلاندى

پەتروپاۆل. 25 اقپان. قىزىلجار وڭىرىندەگى ساياساتكەر-ايەلدەر كلۋبىنىڭ جاڭا جىلداعى العاشقى ءماجىلىسى ءوتتى. بۇل تۋرالى egemen.kz ءتىلشىسى حابارلادى. بۇگىندە ەلىمىزدىڭ قوستاناي وبلىسىنان باسقا وڭىرلەردىڭ بارىندە ساياساتكەر-ايەلدەردىڭ كلۋبتارى جۇمىس ىستەيدى. وبلىستا مۇنداي كلۋب بىلتىر قۇرىلىپ, سودان بەرى الەۋمەتتىك-ەكونوميكالىق سالالاردا ۇلكەن بەلسەندىلىك كورسەتىپ كەلەدى. جيىندا ءبىرىنشى بولىپ ءسوز العان م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتتىڭ پرورەكتورى مۇكارام تايجانوۆا قازاقستان گەندەرلىك ساياسات رەيتينگى جونىنەن الەمدەگى 146 ەلدىڭ اراسىنان 46-ورىن الاتىنىن ايتا كەلىپ, بۇل باعىتتاعى كورسەتكىشتى كەمىندە 30 پايىزعا جەتكىزۋ ءۇشىن جۇمىستاردى كۇشەيتۋدەگى ءوز ويلارىمەن ءبولىستى. وبلىستىق ىسكەر ايەلدەر اسسوتسياتسياسىنىڭ جەتەكشىسى باقىتجان ساميەۆا كلۋب وڭىرگە تانىمال, بەدەلدى 25 ايەلدى بىرىكتىرەتىنىن, ولار اتقارىپ وتىرعان شارالاردىڭ ماڭىزدىلىعىن اتاپ كورسەتتى. قازاقستان ىسكەر ايەلدەر اسسوتسياتسياسىنىڭ پرەزيدەنتى راۋشان سارسەمباەۆا كلۋب مۇشەلەرىنە شارالاردى اۋداندار مەن ەلدى مەكەندەردە كوبىرەك اتقارۋ مىندەتتەرىن جۇكتەدى. ساياساتكەر-ايەلدەر كلۋبىنىڭ ءتورايىمى بولىپ وبلىس اكىمىنىڭ ورىنباسارى انارحان دۇيسەنوۆا سايلاندى. ءومىر ەسقالي. دەرەك, سۋرەت: egemen.kz.