اتىراۋ وبلىسىندا جاتتىقتىرۋشى جالعان ديپلوممەن جۇمىس ىستەگەن

اتىراۋ. 25 اقپان. اتىراۋ وبلىسى يساتاي اۋدانىنداعى بالالار مەن جاسوسپىرىمدەر سپورت مەكتەبىندە جاتتىقتىرۋشىنىڭ جالعان ديپلوممەن جۇمىس ىستەگەنى انىقتالدى. بۇل تۋرالى يساتاي اۋداندىق پروكۋروراتۋراسى حابارلادى. يساتاي اۋدانىنىڭ پروكۋرورى ماقسات ەرمەكوۆتىڭ مالىمەتىنە ساي, بۇل دەرەك بالالار جانە جاسوسپىرىمدەر سپورت مەكتەبىندەگى جاتتىقتىرۋشىلاردىڭ جوعارى جانە ارناۋلى ورتا ءبىلىمى تۋرالى ديپلومدارىنىڭ شىنايىلىعىنا تالداۋ جۇرگىزۋ بارىسىندا بەلگىلى بولعان. ناقتىلاي ايتقاندا, ءبىر جاتتىقتىرۋشىنىڭ جالعان ديپلوم پايدالانعانى انىقتالدى. جاتتىقتىرۋشى جالعان ديپلومدى 2012 جىلى اتىراۋ قالاسىنان بەيتانىس تۇلعادان 300 مىڭ تەڭگە ساتىپ العان. ديپلومدا جاتتىقتىرۋشى قازاق سپورت جانە تۋريزم اكادەمياسىن «دەنە شىنىقتىرۋ جانە سپورت» ماماندىعى بويىنشا بىتىرگەندىگى كورسەتىلگەن. جالعان ديپلوم بويىنشا جاتتىقتىرۋشى باسكەتبول ءبولىمىنىڭ مۇعالىمى قىزمەتىن 2014 جىلدىڭ قىركۇيەك ايىنا دەيىن اتقارعان. سودان سوڭ, 2014 جىلدىڭ قىركۇيەك-قاراشا ايلارىندا «وركەن» ورتا مەكتەبىندە دەنە شىنىقتىرۋ ءپانىنىڭ مۇعالىمى بولىپ جۇمىس جاساعان. «بۇل فاكتى بويىنشا جاتتىقتىرۋشىنىڭ ارەكەتىندە قىلمىستىق كودەكسىنىڭ 385-بابىنىڭ 3-بولىگىندە بەلگىلەنگەن قىلمىستىق ءىس-ارەكەتتەرىنىڭ قۇرامى بايقالعاندىقتان, مالىمەت اۋداندىق پروكۋراتۋرانىڭ سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە تىركەلىپ, تەرگەۋ امالدارىن جۇرگىزۋ ءۇشىن يساتاي اۋداندىق ىشكى ىستەر بولىمىنە جولداندى», دەپ حابارلادى يساتاي اۋدانىنىڭ پروكۋرورى ماقسات ەرمەكوۆ. جولداسبەك شوپەعۇل, دەرەك: يساتاي اۋداندىق پروكۋروراتۋراسى. سۋرەت: news.nur.kz.