قوستاناي وبلىسىنىڭ دەلەگاتسياسى رەسەي اۋدانىندا بولىپ قايتتى

قوستاناي. 25 اقپان. قوستاناي وبلىسى قارابالىق اۋدانىنىڭ اكىمى المات ىسماعۇلوۆ باستاعان دەلەگاتسيا كورشى چەليابى وبلىسىنىڭ ۋۆەلكا اۋدانى (رەسەي) باسشىلىعىنىڭ شاقىرۋىمەن بارىپ كەلدى. بۇل تۋرالى ainanews.kz حابارلادى. شەكارالىق ىنتىماقتاستىق شەڭبەرىندە قارابالىق اۋدانى باسشىلىعىن, كاسىپكەرلەرىن جانە اۋىل شارۋاشىلىعى تاۋارلارىن وندىرۋشىلەردى ۋۆەلكا اۋدانىنىڭ باسشىسى اناتولي ليتوۆچەنكو كورشىلەر اراسىندا بيزنەس-ارىپتەستىكتى دامىتۋ ماقساتىندا شاقىرعان بولاتىن. ۋۆەلكالىقتار قوناقتارعا اۋدان اكىمشىلىگىنەن باستاپ, ونەركاسىبىن, دامۋ جوسپارلارىن, جەتىستىكتەرى مەن مادەني مۇرالارىن كورسەتتى. قارابالىق دەلەگاتسياسى «رەسۋرس» جارما وڭدەيتىن ءىرى زاۋىتتا بولدى. بۇل زاۋىت قارابالىق اۋدانىنداعى «اك-بيداي-اگرو» جاۋاپكەرشىلىگى شەكتەۋلى سەرىكتەستىگىنىڭ قىزىعۋشىلىعىن تۋدىردى. ولار وسىرگەن قاراقۇمىقتى وسى زاۋىتقا جىبەرۋگە تولىق مۇمكىندىك بارىنا كوز جەتكىزدى. بۇل كاسىپورىنداعى ساپا ستاندارتىن ەنگىزۋ قارابالىقتىق كاسىپكەر ۆلاديمير كريگەردىڭ دە نازارىن اۋداردى. ال ۋۆەلكا مۋنيتسيپاليتەتتى اۋدانىنىڭ باسشىلىعى مەن كاسىپكەرلەرىن قارابالىق اۋدانى ۇستىنەن وتەتىن, قىتاي, رەسەي, قازاقستاندى بايلانىستىراتىن «الماتى-ەكاتەرينبۋرگ» تاس جولىنىڭ بويىنداعى كولىك-لوگيستيكالىق كەشەنى قىزىقتىردى. كورشىلەر قوناقتارعا «كنياجي سوكولنيك» تاۋارلى ءسۇت فەرماسى مەن ءسۇت وڭدەۋ زاۋىتىن دا كورسەتتى. سونىمەن قاتار, ولار قارابالىق اۋدانىنىڭ رەسەيگە ەت شىعارۋ جاعىن دا سۇراستىردى. دەلەگاتسيا ۋۆەلكا اۋدانىنىڭ بىرنەشە الەۋمەتتىك نىساندارىندا دا بولدى. قاتار جاتقان اۋداندار بولعانىمەن, ءبىر-بىرىنەن ۇيرەنەتىن دە, ۇيرەتەتىن دە تۇستار بار ەكەندىگىنە كورشىلەردىڭ كوزى جەتە ءتۇستى. بۇل دامۋ ءۇشىن كەرەكتىگىن ۋۆەلكا وزەنىنىڭ ەكى جاعىنداعى جۇرت تا جاقسى بىلەدى. ءنازيرا جارىمبەتوۆا. دەرەك, سۋرەت: ainanews.kz.