اقپان – جىلدىڭ سوڭعى ايى

اقپان – جىلدىڭ دا, قىستىڭ دا سوڭعى, ەڭ قىسقا ايى. بۇلاي شەگەلەپ ايتۋىمىزدا ۇلكەن سەبەپ بار. قازىرگى قولدانىستاعى كۇنتىزبەنىڭ بويىمىزعا ابدەن دەندەپ ءسىڭىپ العاندىعىنان با, جىل باسى ناۋرىزدان باستالاتىنىن ىشتەي بىلسەك تە, ونى ءىس جۇزىندە مويىنداي الماي كەلەمىز. نەگە؟ وتكەندە ءبىر قاريا: «سۋىقتىڭ كوكەسى – اقپاندا. قىستىڭ قاھارىنا مىنەتىن كەزى دە ناق وسى شاق. ىلگەرىدە «بوز توقتىدا قۇيرىق قالدى, بويجەتكەندە بۇعاق قالدى, قىرلان, اقپان قىرلان!» دەپ قاڭتار اقپانعا تاپسىرىپ كەتەدى ەكەن», – دەپ ايتىپ وتىرۋشى ەدى. جىلدىڭ سوڭعى ايى عوي, قالاي قۇبىلسا دا, مىنەزىنە شىداس بەرەرمىز», دەمەسى بار ما؟ العاشقىدا ءبىر توسىن جاڭالىق ەستىگەندەي «نەگە؟» دەۋگە شاق قالدىم. ۇيات - اي, جىلقى جىلىن جەلتوقسانىمەن قوسا «اتتاندىرىپ» جىبەرگەنىمىزدى سوڭىنان ءبىلىپ, ءتىلىمدى تىستەپ ۇلگەردىم. ءازىل-شىنى ارالاس دەپ قاراساق, مەزگىلىنەن بۇرىن تاريح قويناۋىنا ەنگەن جىلقى ءپىرى – قامبار اتادان دا ىڭعايسىزداۋ بولدى. جاسىراتىنى جوق, اۋىزشا ايتقاندا دا, جازباشا قۇجات تولتىر­عاندا دا اقپان ايىن جىلدىڭ ەكىن­شى ايىنا تەلىپ قويعانبىز. مويىن­داي­سىزدار عوي؟! بۇل بارىمىزگە تانىس جاع­داي جانە وزگەرمەيتىن قۇبىلىس سياق­تانىپ تۇرادى ماعان. قالاي دەگەن كۇندە دە اقپان جىلدىڭ 2-ءشى ايى رەتىندە وزگەرىسسىز قالا بەرمەك. ءويت­كەنى, حالىقارالىق تاجىريبە سولاي. ارمانسىز ادام جوق. كەيدە ويلايمىن, قاشان ءبىز اقپاندى جىل سوڭىنا ساناپ, شىعىس, ونىڭ ىشىندە قازاق ەلى ءۇشىن ورنى بولەك كوكتەممەن كۇلە كىرەتىن ۇلىستىڭ ۇلى كۇنى – ناۋرىز مەرەكەسىنە قىزۋ قاربالاس, ەرەكشە دايىندىقپەن (جەلتوقسانداعىداي) قام جاسار ەكەنبىز دەپ. ءسوزىمىزدى تانىمال جۋرناليست بەيسەن قۇرانبەك سياقتى «ايتۋعا وڭاي» دەپ بىتىرگىم-اق كەلىپ تۇر, بىراق سوعان ازداعان تالپىنىس, قوزعالىس تۋسا عوي... ارينە, جابىلا, جۇمىلا كوتەرسەك, ايتىلعان دۇنيە جەردە قالماعان بولار ما ەدى, كىم ءبىلسىن؟ راۋشان تاۋىرحانقىزى, جۋرناليست. استانا. سۋرەت : http://anatili.kz