مەديتسينالىق جابدىقتاردى سىيعا تارتتى

بولات وتەمۇراتوۆتىڭ «اسىل ميراس» قايىرىمدىلىق قورى الماتىداعى اكۋشەرلىك, گينەكولوگيا جانە پەريناتولوگيا ورتالىعىنا قۇنى 18 100 000 تەڭگە تۇراتىن جوعارى ساپالى مەديتسينالىق كومەك كورسەتۋگە جانە شالا تۋىلعان سابيلەردى كۇتۋگە ارنالعان قاجەتتى جابدىقتاردىڭ جيىنتىعىن سىيعا تارتتى. اتالمىش ورتالىق قازاقستانداعى بىردەن-ءبىر اكۋشەرلىك-گينەكولوگيا جانە پەريناتالدىق قىزمەتتى ۇيلەستىرۋمەن, عىلىمي-زەرتتەۋمەن, ەمدەۋمەن اينالىساتىن جەتەكشى كلينيكا بولىپ تابىلادى. ياعني, وندا ەڭ اۋىر جاعدايدا بوساناتىن ايەلدەرگە جاردەم كورسەتۋمەن قاتار, شالا تۋىلعان سابيلەردى كۇتەدى. ورتالىق ديرەكتورى, مەديتسينا عىلىمدارىنىڭ دوكتورى, پروفەسسور تالعات قۇدايبەرگەنوۆتىڭ ايتۋىنشا, مۇندا قازاقستاننىڭ بارلىق ايماقتارىنان كۇردەلى اۋرۋلارمەن تۇسەتىن جۇكتى, بوساناتىن ايەلدەرگە جوعارى دارەجەدەگى مامانداندىرىلعان كومەك كورسەتىلەدى. – جىل سايىن ورتالىقتا 7 مىڭنان اسا ناۋقاس كومەك السا, ونىڭ ىشىندە جوعارى دەڭگەيدەگى قاۋىپتى توپقا جاتاتىن انالاردىڭ 3000-عا جۋىعىنىڭ ءسابيى بار. «اسىل ميراس» قورى كومەگىنىڭ ارقاسىندا ءبىزدىڭ ناۋقاستارعا تاۋلىك بويى اكۋشەرلىك, گينەكولوگيالىق جانە نەو­ناتالدى كومەك كورسەتۋگە مۇمكىندىك بەرەتىن قاجەتتى مەديتسينالىق جابدىقتار مەن تەحنيكا ساتىپ الىندى, – دەدى ول. اتاپ ايتقاندا, ورتالىققا وپەراتسيالىق بلوكقا وتا جاساۋ ۇستەلى, جاڭادان تۋعان سابيلەرگە ارنالعان تىنىس بەرۋ اپپاراتى جانە جەدەل جاردەم كورسەتەتىن مەديتسينالىق كولىك ساتىپ الىندى. «اسىل ميراس» قايىرىمدىلىق قورىنىڭ ديرەكتورى مارات ايتماعامبەتوۆ ورتالىق ۇجىمىنا اتالمىش جابدىقتاردى تاپسىرا وتىرىپ, الداعى ۋاقىتتا بۇل قۇرىلعىلار دارىگەرلەردىڭ اۋىر ەڭبەگىن جەڭىلدەتىپ, كىشكەنتاي سابيلەردىڭ ءومىرىن ساقتاپ قالۋعا كومەگىن تيگىزەتىنىن جەتكىزدى. تاعى ءبىر ايتا كەتەرلىگى, اتالمىش قايىرىمدىلىق قورى مەن Rixos Borovoe قوناق ءۇيىنىڭ بەلسەندى قولداۋ كورسەتۋىمەن 2014 جىلى قايىرىمدىلىق ۆەلوشەرۋى ۇيىمداستىرىلىپ, ودان جينالعان قارجى اقمولا جانە قىزىلوردا وبلىستارىنىڭ پەريناتالدىق ورتالىقتارىنا تابىس ەتىلگەن. 2014 جىلى نەگىزى قالانعان قور ماقساتى – دەنساۋلىق ساقتاۋ, ءبىلىم بەرۋ جانە مادەنيەتتى دامىتۋعا قولداۋ جاساپ, كومەك كورسەتۋ. گۇلزەينەپ سادىرقىزى, «ەگەمەن قازاقستان». سۋرەت: http://kokpekti.vko.gov.kz/