باستى باعدار – سىرتقى نارىق

بىلتىر “سامۇرىق-قازىنا-ينۆەست”, “قازين­تەر­تەحسەرۆيس” جشس-لەرىنىڭ جانە فينليانديانىڭ “Sampo Rosenlew Ltd”, پولشانىڭ “Pronar SP.z.o.o.” كومپانيالارىنىڭ وكىلدەرى قىزىلجار وڭىرىنە كەلىپ, اۋىل شارۋاشىلىعى مەن كوممۋنالدىق تەحنيكالار شىعارۋعا ارنالعان بىرلەسكەن كاسىپورىن قۇرۋعا نيەت بىلدىرگەن بولاتىن. ولاردىڭ ۇسىنىسى ايماق باسشىسى ەرىك سۇلتانوۆتىڭ تاراپىنان قولداۋ تاۋىپ, ىلە-شالا بوي كوتەرگەن “قازتەحماش” ماشينا قۇرىلىسى زاۋىتى» جشس بۇرىنعى شاعىن ليتراجدى قوزعالتقىشتار كاسىپورنى عيماراتىندا ءوندىرىس ورنىن جاساقتاۋعا كىرىستى. يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ ەكىنشى بەسجىلدىعىنىڭ يندۋستريالاندىرۋ كارتاسىنا ەنگىزىلگەن سەرپىندى جوبانى جۇزەگە اسىرۋعا 1,9 ميلليارد تەڭگە ينۆەستيتسيا تارتىلدى. قىسقا مەرزىمنىڭ ىشىندە جالپى اۋماعى 7 مىڭ شارشى مەتر بولاتىن قۇراستىرۋ تسەحى دايىن ەتىلدى. زاماناۋي قاجەتتى قوندىرعىلار شەتەلدەردەن جەتكىزىلدى. كومباين قۇراستىرۋعا تىكەلەي قاتىساتىن ماماندار فينليانديانىڭ “Sampo Rosenlew Ltd”, پولشانىڭ “Pronar SP.z.o.o.” كومپانيالارىندا وزىق تەحنولوگيا بويىنشا وقىپ, كاسىبي بىلىمدەرىن جەتىلدىردى. يننوۆاتسيالىق جوبانىڭ ءبىرىنشى كەزەڭىندە دايىن بول­شەكتەردەن كومبايندار قۇراستىرا وتىرىپ, وتاندىق مازمۇنعا بىرتىندەپ كوشۋ, تولىق قۋاتىندا جۇمىس ىستەگەن كەزدە جىلىنا 400 كومباين, 500 تراكتور, 1200 كوممۋنالدىق تەحنيكا شىعارۋ, 168 جاڭا جۇمىس ورنىن اشۋ بەلگىلەندى. كرەديتتىڭ سىياقى ستاۆكاسى “بيزنەستىڭ جول كارتاسى-2020” مەملەكەتتىك باعدار­لاماسى اياسىندا دەمەۋ ارقىلى قارجىلاندىرىلدى. ...مىنە, كوپتەن كۇتكەن جاعىم­دى حابار اۋىل ەڭبەككەرلەرىن ەلەڭ ەتكىزدى. بىرىككەن كاسىپورىن «قازاقستاندا جاسالعان» دەگەن بەلگىمەن قۇراستىرىپ شىعارعان «Pronar Asia» ماركالى اۋىل شارۋاشىلىعى تەحنيكالارىنىڭ العاشقى لەگى قىزىلجار اۋدا­نىنىڭ شابىندىقتارىندا سىناقتان مۇدىرمەي ءوتتى. تا­نىستىرۋ راسىمىندە جينالعاندار نازارىنا جەمشوپ دايىندايتىن تەحنيكالاردىڭ ءۇش ءتۇرى ۇسىنىلىپ, تەحنيكالىق جانە وندىرىستىك مىنەزدەمەلەرى جايلى «قازتەحماش» ماشينا قۇرىلىسى زاۋىتى» سەرىكتەستىگىنىڭ كوممەر­تسيالىق ديرەكتورى قانات سۇ­لەيمەنوۆ بايانداپ بەردى. ول ءوز سو­زىندە ەلباسى قازاقستان حالقىنا ۇندەۋىندە الدىمىزعا دسۇ بە­­­رەتىن ارتىقشىلىقتاردى ءتيىمدى پايدالانا ءبىلۋ مىندەتىن قويعانىن جەتكىزە كەلىپ, حالىق­ارالىق ۇيىم ەرەجەلەرى مەن قاعيداتتارىنا ساي تالاپتار جان-جاقتى قامتىلعا­­­نىن مالىمدەدى. بۇل ويىن ناقتى مىسالدارمەن دايەكتەدى. اتاپ ايتقاندا, ونىم­دەردىڭ ساپالىلىعى مەن قول­جەتىمدىلىگى ءبىرىنشى كەزەكتە ەسكە­رىلگەن. ءشوپ شاباتىن شالعى – 2,5 ميلليون, ەكى روتور­لى جي­ناعىش – 4,2 ميلليون, نىعىز­داۋىش 4 ميلليون تەڭگە تۇرادى. سولتۇستىكقازاقستاندىق اگرارشىلاردى باعانىڭ تومەندىگى قاناعاتتاندىرسا, سەرۆيستىك قىز­مەت اياسىندا قاجەتتى بولشەك­تەر­مەن قامتاماسىز ەتۋ جۇيەسى دە قىزىق­تىردى. سول سەبەپتى بولار, «پەتەر­فەلد-اگرو» جشس وزگە­لەردەن بۇرىن قولقا سالىپ, ەكى تەحنيكانى ساتىپ الۋعا بىردەن ۋاعدالاستى. – ءبىزدىڭ شارۋاشىلىق مال وسىرۋمەن اينالىسادى. باعىمداعى اسىل تۇقىمدى ءىرى قارا مالدارىنا جەمشوپ قورىن جاساقتاۋدا تەحنيكالاردىڭ شەتەلدەگىدەن ءبىر مىسقال دا كەم ەمەستىگىن اڭعارىپ, ءارى قاراي تۇراقتى بايلانىس ورناتاتىن بولىپ وتىرمىز, – دەدى تىلدەسكەنىمىزدە شارۋا­شىلىقتىڭ باسقارۋشى ديرەكتورى نۇرلان ءابدىلوۆ. ءشوپ شاباتىن تەحنيكالاردىڭ ءبىر ارتىقشىلىعى, كوممۋنالدىق قىزمەت جۇيەسىندە دە پايدالانۋعا بولادى ەكەن. وبلىس اكىمىنىڭ ورىنباسارى ۆلاديمير بۋبەنكو وزىق تەحنيكالاردى تاماشالاۋشىلاردى ەلىمىزدىڭ دسۇ-عا كىرۋ جەڭىسىمەن قۇتتىقتاپ, ماشينا جاساۋشىلار بۇگىنگى تىرناقالدى ونىمدەرىن الەمدىك ساۋدا زاڭدىلىقتارىنا سايكەس قۇراستىرعانىن, مۇنىڭ ءوزى باسەكەگە قابىلەتتىلىك قارىم-قابىلەتتىڭ ارتا تۇسۋىنە ىقپال جاسايتىنىن, سىرتقى نارىققا يكەمدەلۋ, باعدارلانۋ جولىندا ءوزارا ارەكەتتەستىك جاۋاپكەرشىلىگى نىعاياتىنىن اتاپ ءوتتى. تۇساۋكەسەر راسىمدە ساتىلىمعا جەمشوپ تاراتقىش, تىركەمەلەر, كومبايندار سەكىلدى تەحنيكا تۇرلەرى شىعارىلاتىنى ايتىلدى. جاڭا تەحنيكالاردى سۋبسيديالاۋ جونىندەگى ءوتىنىم اۋىل شارۋاشىلىعى مينيسترلىگىندە قارالۋدا. ءومىر ەسقالي, «ەگەمەن قازاقستان». سولتۇستىك قازاقستان وبلىسى, قىزىلجار اۋدانى.