تۇرىكمەنستاندا گارا سەيتليەۆتىڭ 100 جىلدىعى اتاپ وتىلەدى

استانا. 26 ناۋرىز. تۇرىكمەننىڭ كورنەكتى جازۋشىسى گارا سەيتليەۆتىڭ تۋعانىنا بيىل 100 جىل تولىپ وتىر. بۇل تۋرالى «حرونيكا تۋركمەنيستانا» حابارلادى. بەلگىلى اقىن جانە دراماتۋرگ گارا سەيتليەۆ قازىرگى زامانعى تۇرىكمەن پوەزياسىنىڭ نەگىزىن قالاۋشىلاردىڭ ءبىرى بولىپ تابىلادى. ۇستىمىزدەگى جىلى ونىڭ تۋعانىنا ءجۇز جىل تولادى. ونىڭ پوەزياسىنىڭ جاناشىرلارى مەن جەرلەستەرى اقىننىڭ بۇل مەرەيتويلىق كەزەڭىن اتاپ وتۋگە دايىندالىپ جاتىر. سەيتليەۆ 1915 جىلى باحاردەن اۋدانىنداعى گاراگان قىشلاعىندا تۋعان. ول باستاۋىش ءبىلىمدى اۋىل مەكتەبىنەن الادى. سوسىن اشحابادتاعى پەداگوگيكالىق تەحنيكۋمدى بىتىرەدى. ونى اياقتاعاننان كەيىن اشحاباد پەن كيزيل-ارۆاتتا مۇعالىم بولىپ ىستەيدى. كەيىنىرەك باكۋگە بارىپ, لەنين اتىنداعى پەداگوگيكالىق ينستيتۋتىنىڭ فيلولوگيا فاكۋلتەتىنە تۇسەدى. ال 1941 جىلى وقۋدى ءبىتىرىپ, اشحابادقا ورالادى. سوعىس جىلدارىندا ونەر سالاسىنداعى رەپەرتۋار كوميسسياسىنىڭ باستىعى بولىپ قىزمەت ەتەدى. سوعىستان كەيىن جازۋشىلار وداعىنا كەڭەسشى بولادى. كەيىن وداقتىڭ توراعاسى بولىپ سايلانادى. بۇدان كەيىنگى جىلدارى ول ءومىرىنىڭ سوڭىنا دەيىن مادەنيەت ءمينيسترى بولادى. سەيتليەۆ ەڭ العاشقى ولەڭدەرىن 1938 جىلى «سوۆەت ادەبياتى» جۋرنالىندا جاريالايدى. سوسىن العاشقى جىر جيناعى شىعادى. اقىننىڭ ليريكالىق ولەڭدەرى 1941 جىلى باسىلادى. ونىڭ قالامىنان «حالقىم», «سۇلۋ موسكۆام», «قاھارمان ماي» دەپ اتالاتىن بەلگىلى ولەڭدەرى تۋادى. گارا سەيتليەۆ تەك اقىن عانا ەمەس, دراماتۋرگ رەتىندە تانىلدى. ونىڭ پەساسى بويىنشا موللانەپەس اتىنداعى تەاتر ساحناسىندا كوپتەگەن سپەكتاكلدەر قويىلدى. جازۋشى 1971 جىلى 2 مامىردا ومىردەن ءوتتى. وكىنىشكە وراي, تاۋەلسىزدىك جىلدارىندا سەيتليەۆتىڭ شىعارماشىلىعى ۇمىت قالدى, كىتاپتارى قايتا باسىلعان ەمەس. مۇرات ايتقوجا. مانبە, سۋرەت: حرونيكا تۋركمەنيستانا.