مۇعالىم ناۋبايحانا اشتى

نادەجدا ەركەباەۆا بەسىنشى بالاسىن ومىرگە اكەلىپ, بالا كۇتىمى ءۇشىن دەمالىس العان. بۇعان دەيىن جانباي اۋىلىنداعى ورتا مەكتەپتە اعىلشىن تىلىنەن ءدارىس بەرگەن. ەندى بوس ۋاقىتىن ءتيىمدى پايدالانۋ ماقساتىندا ەنەسى ءلاززات تاستانوۆامەن بىرگە ناۋبايحانا اشۋعا بەل بۋىپتى. ءوز قارجىسىنا ساتىپ العان ناۋبايحانا تەحنولوگياسىن ىسكە قوسىپ, نان جانە نان ونىمدەرىن شىعارا باستادى. قازىر ونىڭ باسقارۋىنداعى «جاينا» ناۋبايحاناسىنىڭ ىستىق پەشىنەن شىققان ونىمدەرگە سۇرانىس ارتىپ كەلەدى. «ءبىزدىڭ ناۋبايحانامىزدا پىسىرىلگەن نان جانە نان ونىمدەرىن اۋىلداعى 8 دۇكەن, مەكتەپ پەن بالاباقشا اسحانالارى تاپسىرىس­پەن الادى. كورشىلەس زينەدەن اۋىلىنىڭ تۇرعىندارىنا دا ءوز ونىمدەرىمىزدى ۇسىنامىز. ءار كۇن سايىن تۇتىنۋشىعا 350-گە جۋىق نان بولكەلەرى جونەلتىلەدى. وسى ءىسىمدى كەڭەيتىپ, اۋىلداستارىما قوسىمشا جۇمىس ورنىن اشۋدى ويلاستىرىپ ءجۇرمىن», دەيدى وتباسىلىق كاسىپتى دوڭگەلەتە باستاعان دەمالىستاعى مۇعالىم نادەجدا ەركەباەۆا. جولداسبەك شوپەعۇل, «ەگەمەن قازاقستان». اتىراۋ وبلىسى. سۋرەت: http://strategy2050.kz