حوسەپ گۆارديولا اتاقتى زيداندى تاربيەلەيتىن بولدى

استانا. 25 ناۋرىز. فرانتسيانىڭ اتاقتى فۋتبولشىسى زينەدين زيدان بۇگىندە جاتتىقتىرۋشىلىق قىزمەتتە تەر توگىپ ءجۇر. الداعى كۇندەرى ول بىلىكتىلىگىن ارتتىرۋ ماقساتىندا ميۋنحەننىڭ «باۆارياسىن» جاتتىقتىراتىن حوسەپ گۆارديولانىڭ قول استىندا تاجىريبەدەن وتپەك. بۇل تۋرالى eurosport.ru حابارلادى. زيدان وزىمەن بىرگە ميۋنحەنگە ۆيللي سانول مەن كلود ماكەلەلەنى الىپ كەلدى. ەندى ۇشەۋى گۆارديولانىڭ جۇمىس تاسىلىمەن تانىسپاق. بىرنەشە كۇن يسپان مامانىنىڭ قاسىندا ءجۇرىپ ولار نەگىزىنەن جاتتىعۋ كەزىندەگى تاكتيكالىق تاسىلدەردى مەڭگەرمەك. بۇعان دەيىن داڭقتى فۋتبولشى بەلگىلى جاتتىقتىرۋشى مارسەلو بەلسانىڭ دا قول استىندا تاجىريبەدەن وتكەن ەدى. زيدان مەن گۆارديوللا ويىنشى كەزىندە سان مارتە ءبىر-بىرىنە قارسى الاڭعا شىقتى. ول كەزدە زيزۋدىڭ اتاعى اسپانداپ تۇرعان ەدى. ال جاتتىقتىرۋشىلىق قىزمەتتە ول حوسەپ مىرزانىڭ تاجىريبەسىنە مۇقتاج. بۇگىندە زينەدين زيدان «رەالدىڭ» (مادريد) ەكىنشى كومانداسى «كاستيليانىڭ» باس جاتتىقتىرۋشىسى. اتالعان كوماندا يسپانيا چەمپيوناتىنىڭ ەكىنشى ديۆيزيونىندا (سەگۋندا) وينايدى. سونداي-اق, زيداننىڭ 2013-2014 جىلدارى كارلو انچەلوتتيدىڭ كومەكشىسى بولعانى بەلگىلى. جانكۇيەرلەر اراسىندا «جاقىن ۋاقىتتا «رەالدىڭ» تىزگىنىن زيدان ۇستايدى» دەگەن پىكىرلەر ءجيى ايتىلىپ ءجۇر. ەندەشە داڭقتى فۋتبولشىنىڭ بىلىكتى مامانداردان ساباق الۋى سول ماقساتتا جاسالعان قادامداردىڭ ءبىرى دەسەك تە بولادى. ەلامان قوڭىر. دەرەك: eurosport.ru. سۋرەت: planoinformativo.com.