وبلىس اكىمى بەرىك ءۋالي اۋەلى قاراۋىل اۋىلىندا باسپانا كىلتتەرىن تابىستاۋ راسىمىنە قاتىستى. ەكى پاتەرلى ءتورت تۇرعىن ءۇي الەۋمەتتىك وسال ساناتتاعى ازاماتتارعا ارنالعان.
ءاربىر تۇرعىن ءۇيدىڭ جالپى اۋدانى – 85 شارشى مەتر. بارلىق ينجەنەرلىك-كوممۋنيكاتسيالىق ينفراقۇرىلىممەن قامتىلعان. ەكى پاتەر ءۇيى اۆاريالىق جاعدايدا دەپ تانىلعان تۇرعىندارعا بەرىلسە, قالعان بەس پاتەر كوپبالالى وتباسىلارعا ۇلەستىرىلدى.
وبلىس اكىمى باسپانالى بولعان تۇرعىنداردى قۋانىشتارىمەن قۇتتىقتادى.
«شىڭعىستاۋ اتىرابى – قازاق رۋحىنىڭ قاينار كوزى, قارا ولەڭنىڭ ءتورى. جيدەبايداي قاسيەتتى مەكەنىمەن كۇللى ەلگە قاستەرلى ولكە. وتكەن مەن بۇگىندى, تاريح پەن تاعدىردى جالعاعان قاسيەتتى ءوڭىر. وسىنداي كيەلى توپىراقتا بۇگىن ەل ءۇشىن ەلەۋلى, حالىق ءۇشىن قۋانىشتى ساتكە ارنايى جينالىپ وتىرمىز. بىرنەشە ءوڭىر تۇرعىنى بۇگىن باسپانا تويىن تويلاماق. 7 وتباسى باسپانالى بولعالى تۇر. ءبىر ايتا كەتەرلىگى, بۇل – بيىلعى جىلدىڭ اباي اۋدانىنداعى العاشقى باسپانا قۋانىشى. بۇل ءۇردىس جىل سوڭىنا دەيىن جالعاسادى. اۋداندا 40-تان استام تۇرعىن ءۇيلى بولادى. بۇل – مەملەكەتتىڭ حالىق الدىنداعى الەۋمەتتىك جاۋاپكەرشىلىگىنىڭ ناقتى كورىنىسى. مەملەكەت باسشىسى قاسىم-جومارت توقاەۆتىڭ حالىقتىڭ تۇرمىس ساپاسىن ارتتىرۋ جونىندەگى تاپسىرماسىنا سايكەس اباي وبلىسىندا تۇرعىنداردى باسپانامەن قامتۋ جۇمىستارى جۇيەلى تۇردە جۇزەگە اسۋدا. بۇگىن تابىستالاتىن ءاربىر باسپانا – ءبىر وتباسىنىڭ جاڭا ومىرگە جاساعان قادامى, بالالاردىڭ بولاشاعىنا جول اشقان يگى باستاما», دەدى ايماق باسشىسى.
باسپانالى بولعان تۇرعىندار ريزاشىلىقتارىن جەتكىزدى.
«جاڭا باسپاناعا قول جەتكىزگەنىمىزگە وتە قۋانىشتىمىز. حالىقتىڭ جاعدايىن جاساپ, قولداۋ كورسەتىپ جاتقاندارىڭىزعا العىس ايتامىز», دەدى قاراۋىل اۋىلىنىڭ تۇرعىنى قارلىعاش باقىتبەكقىزى.
بىلتىر قاراۋىل اۋىلىندا كوپ جىل بويى قاراۋسىز تۇرعان عيمارات قايتا جاڭعىرتىلىپ, 27 پاتەرلى تۇرعىن ۇيگە اينالدى. مۇندا 1 بولمەلى 6 پاتەر, 2 بولمەلى 16 پاتەر, 3 بولمەلى 5 پاتەر بار. قازىرگى تاڭدا بارلىق 27 پاتەردىڭ قۇجاتتارى «وتباسى بانك» اق-عا بەرىلگەن.
وبلىس اكىمى اتالعان تۇرعىن ءۇيدى ارالاپ كوردى. وسى ماڭداعى كوپ قاباتتى ۇيلەردىڭ جىلۋ جۇيەسى قاتتى وتىنمەن جۇمىس ىستەيدى. بۇل توتەنشە جاعدايلار تالاپتارىنا تولىق سايكەس كەلمەيتىندىكتەن, ورتاق جىلۋ قازاندىعىن سالۋ قاجەتتىگى تۋىنداپ وتىر. اۋدان اكىمى مەيىرجان سماعۇلوۆ ايماق باسشىسىنا وسى ماسەلەنى جەتكىزدى.
وبلىس اكىمى ۇسىنىستى قولداپ, جىلۋ قازاندىعىن سالۋعا ءتيىستى قولداۋ كورسەتىلەتىن ايتتى. جاڭا قازاندىق سالىنسا اۋدان ورتالىعىنداعى تۇرعىن ۇيلەردى, الەۋمەتتىك نىسانداردى جىلۋمەن تولىق قامتاماسىز ەتۋگە مۇمكىندىك بەرەدى.
بۇدان كەيىن وبلىس اكىمى اباي اۋدانىنداعى بىرقاتار الەۋمەتتىك جانە ينفراقۇرىلىمدىق نىسانداردى ارالاپ, تۇرعىن ءۇي قۇرىلىسىنىڭ بارىسىمەن تانىستى.
