شەتەلدىك ۇستازدارعا ەرۋلىك بەرىلدى

ماعجان جۇماباەۆ اتىنداعى وبلىستىق امبەباپ عىلىمي كىتاپحاناسىندا قازاقستان حالقى اسسامبلەياسى جىلى قۇرمەتىندەگى كەزەكتى تانىمدىق شارا وتكىزىلدى. باسقوسۋعا كوكشەتاۋ قالاسىنداعى نازارباەۆ زياتكەرلىك مەكتەبىندە ۇستازدىق ەتىپ جۇرگەن نيەل رۋان ( ۇلىبريتانيا) مەن نيرمالا گوۆەندەر (وار) ەرۋلىك جورالعىسىمەن شاقىرىلدى. ءبىلىم وشاعىنىڭ اتشاپتى­رىم وقۋ زالىنىڭ تورىنە قازاقتىڭ كيىز ءۇيى تىگىلىپ, بار جاساۋىمەن جارقىراپ تۇر. كوكشەنىڭ ءبۇ­گىن­گى سەرىلەرى ءان شىرقاپ, كۇي ءتو­گىلتتى. بوساعادان اتتاعان قو­ناقتارعا شاشۋ شاشىلىپ, كەڭ-مول دوڭگەلەك ۇستەلگە شاقىرىلدى. داستارقان قازاق حالقىنىڭ ۇلت­تىق تاعامدارىمەن عانا ەمەس, قا­لاداعى وزگە ۇلت وكىلدەرىنىڭ اسىل دامدەرىمەن تولتىرىلعان. قوناقتار بال باۋىرساق, كۇ­رەڭ قىمىز بەن شۇباتتان ءدام تات­قاننان كەيىن, وبلىستىق مۇسىل­مان ايەلدەرى ليگاسىنىڭ مۇشەسى, سەكسەن جاستاعى كابيرا ساقى­پوۆا اجەمىز حالقىمىزدىڭ ارعى-بەرگى تاريحىنان اڭگىمە باستادى. «ەرۋلىك» ءداستۇرىنىڭ جاي-جاپ­سارى, تەرەڭ ءمانى ءتۇسىندىرىلدى. زيات­كەر­لىك مەكتەپتىڭ وقۋشىسى بالىم كەن­جەباەۆا اعىلشىنشاعا اۋدارىپ وتىر. نيەل باۋىرىمىزدىڭ قويىن ءداپ­تەرىندەگى جازۋ قالىڭداي باستادى. وزگە ۇلتتىڭ وكىلدەرى دە قو­ناق­كا­دە­سىن جاساپ, قالاداعى تاتار, نەمىس, سلاۆيان, پولياك ەتنومادەني ورتالىق­تارى­نىڭ جەتەك­شىلەرى مۋداريس ابدۋل­لين, سۆەت­لانا كورنەەۆا, گالينا بۋلى­­چەۆا جانە ليۋدميلا سۋحوۆەتسكايا اتال­­عان ءبىر­لەستىكتەردىڭ قوعامداعى ورنى جايلى حاباردار ەتتى. سون­داي-اق, قازاق­ستان حالقىنىڭ دوستى­­عى, ەلىمىز­دەگى ىن­تىماق-بىرلىك تا­قى­رى­بىندا 15 جىل بويى ەڭبەك­­­تەنىپ, 6 البوم دايىندا­عان مادەنيەت­تانۋشى سيپات تاسوۆا جادىگەرلەرىنىڭ تانىس­تىرىلىمى وتكىزىلۋى جۇرتشىلىقتىڭ قىزىعۋشىلىعىن تۋدىردى. افريكالىق قىز نيرمالا گوۆەندەر قوشەمەتشى قاۋىممەن قوسىلىپ بي بيلەپ, ءوز تىلىندە ءان شىرقادى. ال سەر نيەل رۋان انگليادا دياسپورالىق قاۋىم­داستىق بولعانىمەن, بارلىق ۇلت­تىڭ باسىن بىرىكتىرەتىن ۇيىمنىڭ جوقتىعىن تىلگە تيەك ەتتى. – بۇل قازاقستان پرەزيدەن­تى­نىڭ كورە­گەن ساياساتشى, ۇلتتاردى ۇيىستىرۋشى تۇلعا ەكەندىگىن كورسەتەدى, – دەدى ول. – اسسامبلەيانىڭ قازىرگى داعدارىستى كەزەڭ­دە كەزەكتەن تىس پرەزيدەنتتىك سايلاۋ وتكىزۋ جونىندە باستاما كوتەرۋىنىڭ ءوزى ونىڭ زور بەدەل مەن ىقپالعا يە ەكەندىگىن ايقىن­داي تۇسەدى. مەن كوكشەتاۋداعى نازار­باەۆ زياتكەرلىك مەكتەبىنە شاقىرۋ العا­نىمدا قۋانا كەلىستىم. مۇنداي ءبىلىم وشاعى كوپ ەلدە كەزدەسپەيدى. مەنىڭ قازىرگى وقۋشىلارىم وتە العىر, اعىلشىن تىلىندە ەركىن سويلەسەدى. قازاقستاندىق ەكسپو-عا دايىندىعىمىز دا جامان ەمەس. ونىڭ ۇستىنە, كەزىندە ەكسپو-دا شىرقالعان «بالقا­ديشا» انىندەگى قا­ديشا كوكشە­تاۋ­دىڭ قىزى ەكەندىگىن ءبىل­گەن­­­دەگى تاڭ­عالىسىمدى سوزبەن جەتكىزۋ قيىن. كەزدەسۋ سوڭى ەتنومادەني ءبىر­لەس­تىكتەردەگى كوركەمونەرپازدار ۇيىم­دارىنىڭ كونتسەرتىنە ۇلاستى. باقبەرگەن امالبەك, «ەگەمەن قازاقستان». اقمولا وبلىسى. سۋرەتتى تۇسىرگەن ايبەك دانياروۆ.