بىلتىرعى ماۋسىمدا تولايىم تابىسقا جەتىپ, ۋەفا چەمپيوندار ليگاسىنىڭ جالپى كەزەڭىنە جولداما العان «قايرات» ەۋرودوداعا دايىندىقتى باستاپ كەتتى. الماتىلىق ۇجىم وڭتۇستىك امەريكادان ەكى بىردەي فۋتبولشىنى قاتارىنا قوستى. ءبىرىنشىسى – برازيليالىق ورتالىق قورعاۋشى لۋكاس افريكو. 30 جاستاعى ويىنشى بۇعان دەيىن پورتۋگاليانىڭ «ماريتيمۋ», «ەشتوريل», تۇركيانىڭ «ۆانسپور» كوماندالارىندا ونەر كورسەتكەن. سونىمەن قاتار «قايرات» 24 جاستاعى ارگەنتينالىق شابۋىلشى سەباستيان سەبالوسپەن كەلىسىمشارتقا وتىردى. بوليۆيانىڭ «رەال ورۋرو» كلۋبىندا 40 ويىندا 18 گول سوعىپ, مەرگەندىگىمەن تانىلعان وعلان الماتىلىقتاردىڭ شابۋىل شەبىن كۇشەيتەدى دەپ كۇتىلىپ وتىر. كلۋبتىڭ باستى ماقساتى – چەمپيوندىق اتاقتى قورعاپ قالۋ, حالىقارالىق ارەنادا ءساتتى ونەر كورسەتۋ.
بىلتىرعى چەمپيوناتتى بەسىنشى ورىنمەن اياقتاعان «اقتوبە» بيىل قالايدا باس جۇلدەنى ولجالاۋعا بەكىنگەن سىڭايلى. باتىسقازاقستاندىق كلۋبتىڭ لۋيش ناني مەن ميرالەم پيانيچ سىندى الەمدىك دەڭگەيدەگى جۇلدىزداردى قاتارىنا قوسۋى مۇمكىن دەگەن اقپارات جانكۇيەرلەردى ەلەڭ ەتكىزدى.
39 جاستاعى لۋيش ناني اتلانت مۇحيتىنداعى ارال-مەملەكەت كابو-ۆەردەدە دۇنيەگە كەلگەن. ەرتەرەكتە پورتۋگالياعا قونىس اۋدارعان سوڭ, 2006–2017 جىلدار ارالىعىندا ۇلتتىق كوماندانىڭ ساپىندا جاسىنداي جارقىلدادى. 112 ماتچتا قارسىلاستار قاقپاسىن 24 مارتە ءدال كوزدەدى. كومانداسىمەن بىرگە ەۋروپا چەمپيونى, كونفەدەراتسيا كۋبوگىنىڭ يەگەرى اتاندى. ءار جىلدارى «سپورتينگ», «مانچەستەر يۋنايتەد», «فەنەرباحچە», «ۆالەنسيا» سىندى ايگىلى كوماندالار ساپىندا وينادى. كلۋبتىق دەڭگەيدەگى دودالاردا 462 كەزدەسۋ وتكىزىپ, 100-دەن اسا گول سوقتى.
35 جاستاعى ميرالەم پيانيچ – بوسنيا مەن گەرتسەگوۆينانىڭ ەڭ بەلدى فۋتبولشىسى. امپلۋاسى – جارتىلاي قورعاۋشى. 2008–2024 جىلدار ارالىعىندا ءتۇرلى بايراقتى باسەكەلەردە ءوز ەلىنىڭ نامىسىن ابىرويلى قورعاپ, 115 ويىندا 18 گول سوقتى. ءار جىلدارى «ليون», «روما», «يۋۆەنتۋس», «بارسەلونا», «بەشيكتاش» سىندى ەۋروپا گراندتارىنىڭ جەيدەسىن كيدى. سول كوماندالار ساپىندا 499 مارتە الاڭعا شىعىپ, 60 رەت نىسانانى ءدال كوزدەدى.
ارينە, مۇنداي دەڭگەيدەگى لەگيونەرلەردى شاقىرۋ قوماقتى قاراجاتتى تالاپ ەتەتىنى بەلگىلى. الايدا قوس كلۋب تا الداعى ماۋسىمدا جوعارى ناتيجەگە قول جەتكىزۋ ماقساتىندا سانالى تۇردە تاۋەكەلگە بارىپ وتىر. قىرۋار قارجى مەن زور ءۇمىت ارتىلعان ترانسفەرلەردىڭ قانشالىقتى اقتالاتىنىن الداعى ۋاقىت كورسەتەدى.
