ينۆەستورلاردى «Higgsfield»-ءتىڭ قارقىندى قارجىلىق ءوسىمى ەرەكشە قىزىقتىردى. كومپانيا جىلدىق تابىسىن 200 ميلليون دوللارعا جەتكىزگەنىن مالىمدەدى. «GFT Ventures» باسقارۋشى سەرىكتەسى دجەفف حەربست الەۋمەتتىك جەلىلەرمەن جۇمىس ىستەيتىن ماماندار اراسىندا جاساندى ينتەللەكت قۇرالدارىنا سۇرانىس كۇن ساناپ ارتىپ كەلە جاتقانىن اتاپ ءوتتى. ونىڭ پىكىرىنشە, بۇل نارىق الداعى ۋاقىتتا ءتىپتى گولليۆۋد يندۋسترياسىنان دا اۋقىمدى بولماق. ستارتاپتىڭ نەبارى بىرنەشە اپتا ىشىندە 10 ميلليون دوللار تۇراقتى تابىسقا قول جەتكىزۋى ينۆەستورلاردىڭ سەنىمىن كۇشەيتكەن.
ساراپشىلار «Higgsfield»-ءتىڭ ستراتەگيالىق باعىتىن دا جوعارى باعالاپ وتىر. كومپانيا «OpenAI» نەمەسە «Google» سياقتى ءىرى ويىنشىلارمەن تىكەلەي باسەكەگە تۇسپەي, دايىن بازالىق مودەلدەردى ءوز ەكوجۇيەسىنە بىرىكتىرىپ, ناقتى باعىتتارعا — اسىرەسە ماركەتينگ پەن بەينە وندىرىسىنە ارنالعان ءتيىمدى شەشىمدەر ۇسىنادى. بۇل ءادىس پايدالانۋشىلارعا جىلدام ءارى ساپالى ناتيجە الۋعا مۇمكىندىك بەرەدى.
تارتىلعان قاراجات حالىقارالىق نارىققا شىعۋ, سونداي-اق عىلىمي زەرتتەۋ جۇمىستارىنا باعىتتالادى. سونىمەن قاتار كومپانيا جىل سوڭىنا دەيىن قىزمەتكەرلەر سانىن 70 ادامنان 300-گە دەيىن ارتتىرۋدى كوزدەپ وتىر. ايتا كەتەيىك, «Higgsfield» ستارتاپىن 29 جاستاعى وتاندىق ينجەنەر ەرزات دۋلات پەن ونىڭ سەرىكتەسى الەكس ماشرابوۆ قۇرعان. ەرزات جاساندى ينتەللەكت سالاسىنداعى كاسىبي زەرتتەۋشى رەتىندە جوبانىڭ يدەيالىق نەگىزىن قالاپ, ونى ءساتتى ىسكە اسىردى. قازىرگى تاڭدا پلاتفورما ءماتىن ارقىلى بەينە جاساۋ مۇمكىندىگىن ۇسىنىپ, كرەاتيۆتى يندۋستريا وكىلدەرىنىڭ جۇمىسىن ايتارلىقتاي جەڭىلدەتىپ وتىر.
