مادي مىرزاعاراەۆ كوميسسيا جۇمىسىنىڭ قارقىندى ءجۇرىپ جاتقانىن اتاپ ءوتتى.
«قازاقستان رەسپۋبليكاسى كونستيتۋتسياسىنا ەنگىزىلەتىن تۇزەتۋلەردىڭ جيناقتالعان جوباسى ۇسىنىلدى. جوبا ازاماتتاردىڭ, ساراپشىلاردىڭ, سونىڭ ىشىندە وكىلدى ادۆوكاتتار القاسىنىڭ ۇسىنىستارىن ەسكەرە وتىرىپ ازىرلەنگەن. جوباعا ەنگىزىلگەن جاڭا نورمالار قوعامنىڭ ءۇمىت-تىلەگىنە ساي كەلەدى, سەبەبى ولار ادام قۇقىقتارىنىڭ نەگىزگى ماسەلەلەرىنە تىكەلەي قاتىستى», دەدى ادۆوكاتتار القاسىنىڭ توراعاسى.
اتاپ ايتقاندا, جاۋاپكەرشىلىكتى كۇشەيتەتىن زاڭنىڭ كەرى كۇشى, سوت شەشىمىنسىز ۇستاۋعا جول بەرمەۋ كەپىلدىكتەرى, سونداي-اق قۇقىق قورعاۋ ورگاندارىنىڭ ۇستالعان ادامعا سوت ساتىندە ونىڭ قۇقىقتارىن ءتۇسىندىرۋ مىندەتى سياقتى ماڭىزدى ماسەلەلەر ەسكەرىلگەن.
«مەن ءۇشىن ادۆوكاتتى قىلمىستىق پروتسەستە پروكۋرورمەن تەڭ قۇقىقتى تاراپ رەتىندە كونستيتۋتسيا دەڭگەيىندە بەكىتۋ تۋرالى ۇسىنىستىڭ قولداۋ تاپقانى ەرەكشە ماڭىزدى ءارى قۋانىشتى. جوبادا العاش رەت ادۆوكاتتاردىڭ قۇقىقتىق مارتەبەسىنە ارنالعان ارنايى باپ ەنگىزىلدى. بۇل بىزگە ازاماتتاردىڭ قۇقىقتارىن پروتسەستىڭ باسقا قاتىسۋشىلارىمەن تەڭ جاعدايدا قورعاۋعا ناقتى مۇمكىندىك بەرەدى», دەدى مادي مىرزاعاراەۆ.
سونىمەن قاتار, سپيكەر ۇسىنىلىپ وتىرعان وزگەرىستەردىڭ اۋقىمدى ەكەنىن اتاپ ءوتىپ, وسىعان بايلانىستى جاڭا كونستيتۋتسيا ماسەلەسىن قاراستىرۋ ورىندى ەكەنىن ايتتى.
«كونستيتۋتسيانىڭ مازمۇندىق تۇجىرىمداماسىن وزگەرتۋگە باعىتتالعان وزگە دە ماڭىزدى جاڭاشىلدىقتار بار. ولاردىڭ بارلىعى قوعامنىڭ قازىرگى زامانعى سۇرانىستارىنا جاۋاپ بەرەدى. وسىعان بايلانىستى كونستيتۋتسيالىق كوميسسيا اياسىندا جاڭا كونستيتۋتسيا ماسەلەسىن قاراستىرۋدى ورىندى دەپ سانايمىن. تاعى ءبىر مارتە اتاپ وتكىم كەلەدى: بۇل وزگەرىستەر بويىنشا تۇپكىلىكتى شەشىمدى قازاقستان حالقى قابىلدايدى. بۇل وزگەرىستەردىڭ تاعدىرى رەفەرەندۋمدا ايقىندالادى. بۇگىنگى ءبىزدىڭ مىندەتىمىز – قوعامعا ادامعا باعدارلانعان, ناقتى ءارى تۇسىنىكتى كونستيتۋتسيالىق شەشىمدەر ۇسىنۋ», دەدى كونستيتۋتسيالىق كوميسسيا مۇشەسى.
مينيستر ەرلان سارسەمباەۆ كونستيتۋتسيانىڭ جاڭا رەداكتسياسىن قابىلداۋدى قولدادى
