فوتو: اقوردا
دارحان ساتىبالدىنىڭ ايتۋىنشا, بىلتىر قىسقا مەرزىمدى ەكونوميكالىق ينديكاتور 12,8 پايىزعا كوتەرىلگەن. مەملەكەت بيۋدجەتىنە 6,6 تريلليون تەڭگە سالىق پەن مىندەتتى تولەمدەر تۇسكەن.
پرەزيدەنتكە قالانىڭ بىرنەشە ورتالىعىن دامىتۋعا باعىتتالعان جاڭا ستراتەگيالىق باستامالار تانىستىرىلدى. اتالعان تۇجىرىمداما اياسىندا زاماناۋي IT-ينفراقۇرىلىم, كوپفۋنكتسيونالدى ىسكەرلىك كەشەندەر, سونداي-اق تۇرعىنداردىڭ دەمالىسى ءۇشىن اباتتاندىرىلعان رەكرەاتسيالىق ايماقتار جاساقتالادى. ياعني بۇل جۇرتشىلىق ءجيى باراتىن ورىندارعا اينالادى.
قاسىم-جومارت توقاەۆقا الماتى قالاسىنىڭ زاماناۋي كولىك جۇيەسىن قالىپتاستىرۋ جونىندە مالىمەت بەرىلدى. جۇردەك قوعامدىق كولىك جۇيەلەرىن دامىتۋ تۇرعىنداردىڭ ءجۇرىپ-تۇرۋىنا قولايلى جاعداي جاساپ, قالانى ورنىقتى دامىتۋدىڭ نەگىزگى فاكتورى بولماق.
قالا اكىمىنىڭ ايتۋىنشا, الماتىنىڭ باس جوسپارىندا اۋانىڭ ەركىن اينالىمىن قامتاماسىز ەتۋدى, شاھاردىڭ جوعارى جانە ورتالىق بولىكتەرىندەگى شامادان تىس تىعىز قۇرىلىستى تەجەۋدى, سونداي-اق جاسىل جەلەكتىڭ اۋماعىن ءۇش ەسەگە – 3 800 گەكتارعا دەيىن ۇلعايتۋدى كوزدەيتىن شەشىمدەر قاراستىرىلعان
مەملەكەت باسشىسىنا 2025 جىلى قالا كوشەلەرى ساپالى جارىقتاندىرىلىپ, قۋاتى ەكى ەسە ارتقانى جونىندە ايتىلدى. بۇدان بولەك, قالانى اباتتاندىرۋ, كوگالداندىرۋ, قوعامدىق كەڭىستىكتەردى بەزەندىرۋدىڭ بىرىڭعاي ستاندارتىنا سايكەس ساياباقتار مەن كوشەلەردى جاڭعىرتۋ شارالارى جوسپارلانعان.
سونىمەن قاتار پرەزيدەنت الماتى تاۋ كلاستەرى جوباسىن دايىنداۋ جايىنداعى ەسەپتى تىڭدادى. قازىرگى كەزدە «مەدەۋ» بازالىق ستانتسياسى ارقىلى «شىمبۇلاق» جانە «وي-قاراعاي» كۋرورتتارىن بىرىكتىرۋدى كوزدەيتىن تەحنيكالىق-ەكونوميكالىق نەگىزدەمەنى ازىرلەۋ جۇمىستارى اياقتالىپ قالدى. اتالعان جوبانى جۇزەگە اسىرۋ ناتيجەسىندە اسپالى جولداردىڭ سانى 16-دان 62-گە دەيىن كوبەيەدى, تاۋ شاڭعىسى تراسسالارى 250 شاقىرىمنان اسا ۇزارادى, ال دەمالىس ايماقتارى تاۋلىگىنە 40 مىڭ ادامعا دەيىن قابىلداي الاتىن دەڭگەيگە جەتەدى.
كەزدەسۋ سوڭىندا مەملەكەت باسشىسى الماتى قالاسىنىڭ ەكونوميكاسىن ودان ءارى ءارتاراپتاندىرۋ, ەكولوگيالىق جاعدايىن جاقسارتۋ, قالانىڭ ورنىقتى كولىك جانە تۋريستىك ينفراقۇرىلىمىن قالىپتاستىرۋ, سونداي-اق قالا ورتاسىنىڭ ساپاسى مەن تۇرعىنداردىڭ تۇرمىس دەڭگەيىن ارتتىرۋ جونىندە بىرقاتار تاپسىرما بەردى.
ايتا كەتەيىك, بۇگىن پرەزيدەنت جوعارعى سوت توراعاسى اسلامبەك مەرعاليەۆتى قابىلدادى.
