«زاڭ جانە شابىت: تاعدىردى ايقىندايتىن تاڭداۋ» تاقىرىبىنداعى شارانىڭ ماڭىزى زور. استانا قالالىق ءبىلىم باسقارماسىنىڭ قولداۋىمەن ەلورداداعى پسيحولوگيالىق قولداۋ ورتالىعى مەن بايقوڭىر اۋدانىنىڭ پروكۋراتۋراسى بىرلەسىپ ۇيىمداستىردى.
«كەزدەسۋدىڭ ماقساتى – ءاربىر وقۋشىنىڭ ءىس-ارەكەتى بولاشاقتا ءوز تاعدىرىنا اسەر ەتەتىنىن كورسەتۋ, زاڭدى ءتۇسىندىرۋ. زاڭ بويىنشا قىلمىستىق جاۋاپكەرشىلىك 16 جاستان باستالادى. قىلمىستىق كودەكستە اسا اۋىر قىلمىس جاساعانى ءۇشىن (ونىڭ ىشىندە ادام ءولتىرۋ بويىنشا) 14 جاستان باستاپ جاۋاپكەرشىلىككە تارتىلادى. ماسەلەن, ۇرلىق جاساعانى ءۇشىن 3 جىلعا دەيىن باس بوستاندىعىنان ايىرۋ بولماسا شەكتەۋ جازاسى, الاياقتىق بابىمەن 2 جىلعا دەيىن باس بوستاندىعىنان ايىرۋ نەمەسە شەكتەۋ جازاسى كوزدەلگەن. ءبىر قىلمىس جاساعانى ءۇشىن 5 جىلدان 8 جىلعا دەيىن تەمىر توردا وتىرۋ وڭاي ەمەس. سول ءۇشىن ءار ارەكەتتى جاساماس بۇرىن الدىمەن سان رەت ويلانعان ءجون. باستىسى كۇماندى ارەكەتتەن اۋلاق بولىڭىزدار. ءبىز ءوز تاراپىمىزدان قىلمىس جاساماۋعا, زاڭعا باعىنۋعا شاقىرامىز», دەدى بايقوڭىر اۋدانى پروكۋراتۋراسى قىلمىستىق قۋدالاۋ ءبولىمىنىڭ باسشىسى مۇحتار وسەرحان.
بىلتىر «بايقوڭىر» اۋدانىندا كامەلەتكە تولماعاندار اراسىندا 36 قىلمىستىق ءىس قوزعالعان. ولاردىڭ ىشىندە ء11ىس – ۇرلىق, 14 ءىس – الاياقتىق, قالعانى ۇساق قىلمىس.
زاڭ مەن ءتارتىپ – مەملەكەتتىك ساياساتتىڭ باستى قاعيداتى
«بۇگىنگى ءىس-شارا جاسوسپىرىمدەردىڭ قۇقىقتىق ساۋاتتىلىعىن ارتتىرۋدى, ەرتە كاسىپتىك باعدار بەرۋ, ماماندىق تاڭداۋ, ءوز بولاشاعىنا قاتىستى ومىرلىك ماڭىزدى شەشىمدەردى قابىلداۋدا جاۋاپتى ءارى سانالى كوزقاراس قالىپتاستىرۋعا ۇندەيدى. اسىرەسە ەرەكشە نازار جەكە موتيۆاتسياعا جانە ءوز بولاشاعى ءۇشىن جاۋاپكەرشىلىككە اۋدارىلدى. كەزدەسۋ بارىسىندا استانالىق وقۋشىلارعا ء«انشى» ءفيلمى كورسەتىلدى. ونىڭ يدەياسى – ءپوزيتيۆتى باعدار قالىپتاستىرۋعا, ءوزىن-ءوزى كورسەتۋگە, ومىرلىك جولدى سانالى تۇردە دۇرىس تاڭداۋعا باعدار بەرەدى», دەدى استانا قالاسى ءبىلىم باسقارماسى قوسىمشا ءبىلىم بەرۋ جانە تاربيە ءبولىمىنىڭ باسشىسى سۇلتان يمانجان.
جيىندا ءسوز سويلەگەن سپيكەرلەر وقۋشىلارعا وڭاي جولمەن اقشا تابۋدىڭ سالدارىن ءتۇسىندىرىپ, اقىل-كەڭەسىن بەردى. پسيحولوگ گۇلميرا قاپانوۆا مەكتەپ وقۋشىلارىنا البىرتتىقپەن, ەركەلىكپەن, اعاتتىقپەن جاساعان وعاش ارەكەتتىڭ اقىرى ءومىر بويى وپىنۋعا اكەلەتىنىن ءتۇسىندىردى. №119 مەكتەپتىڭ ديرەكتورى گۇلجان جيەنيقىزى زاڭ مەن ءتارتىپ قاعيداتىن جان جاقتى سارالاپ, ۇعىندىرعان قوناقتارعا العىسىن جەتكىزىپ, مۇنداي ىلكىمدى كەزدەسۋدىڭ ماڭىزى جوعارى ەكەنىن ايتتى.
كەزدەسۋ اياسىندا مەكتەپ وقۋشىلارى «Q-Arts Production» پروديۋسەرلىك ورتالىعىنىڭ دەمەۋىمەن جاسوسپىرىمدەردىڭ وزدەرى تۇسىرگەن ء«انشى» ءفيلمىن تاماشالادى. ءفيلمنىڭ يدەياسى ءپوزيتيۆتى باعدار قالىپتاستىرىپ, دۇرىس جولدى تاڭداپ, ىشكى قالاۋىنىڭ ورىندالۋى اركىمنىڭ ءوز قولىندا ەكەندىگىن ۇعىندىرادى.
