فوتو: freepik.com
الدىن الا مالىمەتكە سايكەس, وقيعا 28 قاڭتار كۇنى شامامەن ساعات 14:00-دە بولعان. الەۋمەتتىك جەلىلەردە ەر ادامنىڭ اۋرۋحانا اۋماعىندا دارىگەرگە شابۋىل جاساپ, پىشاق جاراقاتىن سالعانى تۋرالى اقپارات تاراعان. قۇزىرلى ورگاندار بۇل وقيعانىڭ مارقۇمنىڭ كاسىبي قىزمەتىنە تىكەلەي قاتىسى جوق ەكەنىن مالىمدەدى.
ماڭعىستاۋ وبلىسىنىڭ پوليتسيا دەپارتامەنتى ادام ءولتىرۋ دەرەگىن راستادى. ۆەدومستۆونىڭ حابارلاۋىنشا, كۇدىكتى ۇستالىپ, ۋاقىتشا ۇستاۋ يزولياتورىنا قامالعان. تەرگەۋ دەرەكتەرىنە سايكەس, ەر ادامدار اراسىنداعى جانجال وتباسىلىق-تۇرمىستىق قاتىناستار نەگىزىندە تۋىنداعان. وقيعادان كەيىن كۇدىكتى جاڭاوزەن قالالىق پوليتسيا باسقارماسىنا ءوزى كەلىپ, كىناسىن مويىنداعان.
قىلمىستىق ءىس قوزعالدى. وقيعانىڭ بارلىق ءمان-جايىن جان-جاقتى جانە وبەكتيۆتى انىقتاۋعا باعىتتالعان تەرگەۋ امالدارى جۇرگىزىلىپ جاتىر.
سوڭعى بەس جىلدا دارىگەرلەردى سوققىعا جىعۋدىڭ 280 فاكتىسى تىركەلگەن
ايتا كەتەيىك, قاڭتار ايىنىڭ باسىندا پرەزيدەنت قىلمىستىق-پروتسەستىك كودەكسكە تولىقتىرۋلار ەنگىزۋ تۋرالى زاڭعا قول قويدى. پارلامەنت دەپۋتاتتارى ازىرلەگەن بۇل وزگەرىستەر مەديتسينا قىزمەتكەرلەرىن قىزمەتتىك مىندەتىن اتقارۋ كەزىندە كۇش قولدانۋدان جانە قاتىگەز قارىم-قاتىناستان قورعاۋعا باعىتتالعان.
تۇزەتۋلەرگە سايكەس, قىلمىستىق كودەكسكە 380-3-باپ ەنگىزىلىپ, وندا مەديتسينا قىزمەتكەرلەرىنە جانە جەدەل جاردەم بريگادالارىنىڭ جۇرگىزۋشىلەرىنە قاتىستى كۇش قولدانۋ نەمەسە كۇش قولدانامىن دەپ قورقىتۋ ءۇشىن قىلمىستىق جاۋاپكەرشىلىك كوزدەلگەن.
