فوتو: عىلىم جانە جوعارى ءبىلىم مينيسترلىگى
بۇگىندە 5 قوس ديپلومدى جانە 11 بىرلەسكەن ءبىلىم بەرۋ باعدارلامالارى بويىنشا قازاقستان, اقش, رەسەي, قىتاي جانە باسقا دا ەلدەردەن شامامەن 1200 ستۋدەنت ءبىلىم الادى. قوس ديپلوم باعدارلاماسىنىڭ ستۋدەنتتەرى گرانتتار ارقىلى (قازاقستان ستۋدەنتتەرى ءۇشىن) تولىق اعىلشىن تىلىندە وقيدى. وقۋ باعدارلاماسىنا سايكەس ءبىر سەمەستر تۋسون قالاسىنداعى اريزونا ۋنيۆەرسيتەتىنىڭ نەگىزگى كامپۋسىندا وتكىزىلەدى.
بيىل 29 ءتورتىنشى كۋرس ستۋدەنتتەرى اقش-تاعى وقۋدان ءوتتى. ستۋدەنتتەر ءبىلىم بەرۋ باعدارلامالارىنا سايكەس ەكى توپقا ءبولىندى: 20 ادام IT باعىتى («باسقارۋداعى اقپاراتتىق جۇيەلەر») بويىنشا, قالعاندارى «بيوتەحنولوگيا» باعدارلاماسى بويىنشا وقىدى. ءبىلىم بەرۋ ۇدەرىسىنە بايلانىستى بارلىق وقۋ شىعىندارى قوزىباەۆ ۋنيۆەرسيتەتىنىڭ ەسەبىنەن قامتىلدى.
عىلىم جانە جوعارى ءبىلىم مينيسترلىگىنىڭ مالىمەتىنشە, ساباقتان تىس ۋاقىتتا ستۋدەنتتەر مۇراجايلار مەن عىلىمي-زەرتتەۋ كەشەندەرىنە ەكسكۋرسيالارعا, ايماق بويىنشا مادەني ساپارلارعا بارىپ, اريزونا ۋنيۆەرسيتەتىنىڭ كامپۋسىندا مادەني جانە سپورتتىق ءىس-شارالارعا قاتىستى. سونىمەن قاتار ستۋدەنتتەر عىلىمي جوبالارعا تارتىلدى, ولار كەيىنگى ديپلومدىق جۇمىستاردىڭ نەگىزىنە اينالدى.
«مەن ءۇشىن اكادەميالىق ساپار تەك جارقىن ءارى جاعىمدى اسەر قالدىردى. جاڭا ءبىلىم بەرۋ جۇيەسىنە, مادەنيەتكە جانە تىلدىك ورتاعا بەيىمدەلۋگە تۋرا كەلدى. مەنى زەرتحانالىق ساباقتار, وقۋدان تىس ساياحاتتار قىزىقتىردى. ال پراكتيكالىق ساباقتار قۇندى تاجىريبە بەردى. ءارتۇرلى مادەنيەت وكىلدەرىمەن ارالاسۋ ارقىلى جاڭا دوستار تاپتىم. جاڭا تاجىريبەلەرگە اشىق بولۋ كەرەك. بۇل جالپى وقۋدان بارىنشا پايدا الۋعا كومەكتەسەدى دەگەن قورىتىندىعا كەلدىم», دەپ ءبولىستى ستۋدەنت اسەل ساعاندىق.
بارلىق 29 ستۋدەنت بەلگىلەنگەن مەرزىمدە اريزونا ۋنيۆەرسيتەتىندە سەسسيانى جاقسى اكادەميالىق كورسەتكىشتەرمەن اياقتاپ, جوعارى دايىندىق دەڭگەيىن ايعاقتادى.
الداعى ءۇش جىلدا ەلىمىزدە ءبىلىم الاتىن شەتەل ستۋدەنتتەرىنىڭ سانى كۇرت كوبەيەدى
