وڭىرلىك ترانسپلانتاتسيا ۇيلەستىرۋشىسى دميتري پوتەرەبۋحتىڭ مالىمەتىنشە, گەمورراگيالىق ينسۋلتتەن كوز جۇمعان 39 جاستاعى ايەلدىڭ اعزالارىن دونور رەتىندە پايدالانۋعا مارقۇمنىڭ كۇيەۋى مەن ۇلى رۇقسات بەرگەن.
ايەل 22 قاڭتار كۇنى وبلىستىق كارديولوگيالىق ورتالىققا جەتكىزىلگەن. دارىگەرلەر تەكسەرۋ بارىسىندا «مي جۇمىسىنىڭ تولىق توقتاۋى» دياگنوزىن قويعان. مامانداردىڭ ايتۋىنشا, بۇل جاعدايدا ادامنىڭ ومىرلىك فۋنكتسيالارى تەك مەديتسينالىق اپپاراتتاردىڭ كومەگىمەن عانا ساقتالادى.
ترانسپلانتولوگتىڭ سوزىنشە, مارقۇمنىڭ جاقىندارى ءۇشىن مۇنداي شەشىم قابىلداۋ اسا اۋىر بولعان.
«ميدىڭ جۇمىسىن توقتاتۋى – ادامنىڭ بۇل دۇنيەلىك ءومىرى توقتاعانىن بىلدىرەدى. كۇيەۋى مەن ۇلى ءۇشىن بۇل حاباردى قابىلداۋ وڭاي بولعان جوق. ءبىز ولاردى جانساقتاۋ بولىمىنە كىرگىزىپ, جۇرەك سوعىسىنىڭ ساقتالۋى جاساندى تىنىس الدىرۋ اپپاراتى مەن ءدارى-دارمەكتىڭ اسەرى ەكەنىن جان-جاقتى تۇسىندىردىك», دەيدى ول.
پاۆلودارعا ارنايى كەلگەن مەديتسينالىق توپتىڭ قۇرامىندا ۇلتتىق عىلىمي ونكولوگيالىق ورتالىعىنىڭ, انا مەن بالا ورتالىعىنىڭ ماماندارى, سونداي-اق University Medical Center كارديوحيرۋرگتەرى بولعان.
اعزالاردى الۋ وپەراتسياسى وبلىستىق كارديولوگيالىق ورتالىقتا جۇرگىزىلدى. دونور ايەلدىڭ جۇرەگى, ەكى بۇيرەگى, باۋىرى جانە ەكى كوزىنىڭ قاساڭ قابىعى الىنىپ, ترانسپلانتاتسياعا جىبەرىلگەن.
بۇعان دەيىن 6 ادامنىڭ ءومىرىن ساقتاپ قالعان مايىتتىك دونار وتاسى تۋرالى جازعان بولاتىنبىز.
