سۋرەت: astanatv.kz
ۇلتتىق بىرىڭعاي تەستىلەۋ ورتالىعىنىڭ تاراتقان اقپاراتىنا سۇيەنسەك, العاشقى اپتادا تەستىلەۋدەن وتكەن 36 مىڭ تالاپكەردىڭ 64%-ى تەستىلەۋدى قازاق تىلىندە, 36%-ى ورىس تىلىندە, 52 ادام اعىلشىن تىلىندە تاپسىردى. ولاردىڭ قاتارىندا 156 ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر دە بار.
ءبىرىنشى اپتاداعى تەستىلەۋ كەزىندە 94 ەرەجە بۇزۋشىلىق انىقتالدى. 56 تالاپكەر سمارتفونداردى, شپارگالكالاردى, باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 38 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلدى, ولاردىڭ ناتيجەلەرى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق.
ال قاڭتار ايىنداعى ۇبت-نى وتكىزۋدىڭ ەكىنشى اپتاسىندا 24 مىڭ ادام تەست تاپسىرعان. ولاردىڭ 72%-ى تەستىلەۋدى قازاق تىلىندە, 28%-ى ورىس تىلىندە, 71 ادام اعىلشىن ءتىلىن تاڭدادى. ولاردىڭ قاتارىندا 104 ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر دە بار.
ۇبت-نى وتكىزۋدىڭ ەكىنشى اپتاسىندا 79 ەرەجە بۇزۋشىلىق انىقتالدى. 52 تالاپكەر سمارتفونداردى, شپارگالكالاردى جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 27 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلدى, ولاردىڭ ناتيجەلەرى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق.
ەكى اپتانىڭ قورىتىندىسى بويىنشا تالاپكەرلەردىڭ 65%-ى شەكتى بالل جينادى. بەس ءپان بويىنشا ورتاشا بالل 61 بالدى قۇرادى. ەڭ جوعارى ناتيجە – 138 بالل.
تالاپكەرلەردىڭ تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرۋ قۇقىعى بار. تەحنيكالىق سەبەپتەر بويىنشا اپەللياتسيا تىكەلەي تەستىلەۋ كەزىندە قابىلدانادى. ناتيجەلەرى بار سەرتيفيكاتتار اپەللياتسيا قاراستىرىلعاننان كەيىن جەكە كابينەتتەردە قولجەتىمدى بولادى.
2026 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
ەسكە سالا كەتسەك, تەستىلەۋگە قاتىسۋعا 187 مىڭعا جۋىق ءوتىنىش كەلىپ ءتۇستى.
