سونىمەن قاتار ولاردىڭ مىندەتىنە اسكەري نىسانداردى بۇركەمەلەۋ نەمەسە يميتاتسيالاۋ كىرەدى. قاۋىپسىزدىكتى قامتاماسىز ەتۋدە ينجەنەرلىك-ساپەرلىك بولىمشەلەر ەرەكشە ءرول اتقارادى. ولار اۋماقتى مينالاردان تازالاۋ جۇمىستارىن جۇرگىزەدى. بۇل قىزمەت جوعارى كاسىبي دايىندىقتى, قاتاڭ ءتارتىپ پەن توزىمدىلىكتى تالاپ ەتەدى. ينجەنەرلىك اسكەرلەر زاماناۋي بارلاۋ قۇرالدارىمەن, روبوتتەحنيكامەن, جەر قازاتىن ءارى پونتوندىق تەحنيكامەن جابدىقتالادى.
بەيبىت كۇندەرى اسكەري ينجەنەرلەر توتەنشە جاعدايلاردىڭ سالدارىن جويۋعا دا اتسالىسادى. ماسەلەن, 2024 جىلى بولعان كوكتەمگى سۋ تاسقىنى كەزىندە ولاردىڭ كۇشىمەن ويىل مەن ەسىل وزەندەرى ارقىلى پاروم وتكەلدەرى ۇيىمداستىرىلىپ, 3 مىڭنان استام ادام ەۆاكۋاتسيالاندى. سونداي-اق 1,5 مىڭداي تەحنيكا وتكىزىلىپ, 400 توننادان استام گۋمانيتارلىق كومەك جەتكىزىلدى.
وتاندىق ينجەنەرلەر حالىقارالىق ميسسيالارعا دا ەلەۋلى ۇلەس قوسىپ كەلەدى. يراكتاعى وپەراتسيا بارىسىندا ولار 4 ميلليوننان استام جارىلعىش زاتتى زالالسىزداندىرىپ, 6,7 مىڭ تەكشە مەتردەن استام سۋدى تازارتتى. قازىرگى زامانعى تەحنيكامەن جابدىقتالعان ءارى بىلىكتى ماماندارمەن تولىقتىرىلعان ينجەنەرلىك اسكەرلەر ۇلتتىق قاۋىپسىزدىك جۇيەسىنىڭ ماڭىزدى قۇرامداس بولىگى.
وسى ورايدا ەلىمىزدىڭ ينجەنەرلىك-ساپەرلىك توبى بۇۇ مانداتىنا سايكەس گولان جوتالارىندا جۇكتەلگەن مىندەتتەردى ءساتتى ورىنداپ جاتقانىن ايتا كەتۋ كەرەك. ول جاقتا بىلتىر 11 ساۋىردەن باستاپ 44 وپەراتسيا جۇرگىزىپ, 1200-دەن استام جارىلعىش زات پەن 43 قولدان جاسالعان جارىلعىش قۇرىلعىنى جويدى. سونىمەن قاتار ولار جەرگىلىكتى اۋماقتا, بۇۇ بازالارى مەن باقىلاۋ بەكەتتەرىندە بەس ىزدەستىرۋ ءىس-شاراسىن وتكىزىپ, مينالى القاپتارعا ءۇش بارلاۋ جاسادى. انىقتالعان وق-دارىلەرگە 11 مارتە الدىن الا زەردەلەۋ جۇمىسىن جۇرگىزدى. ءوز جاۋاپكەرشىلىگىنە جاتاتىن ايماقتاردا ينجەنەرلىك-ساپەرلىك توپ اسكەري پەرسونالدىڭ, بۇۇ نىساندارى مەن بەيبىت تۇرعىنداردىڭ قاۋىپسىزدىگىن قامتاماسىز ەتىپ جاتىر.
ء«بىز مينا قويىلعان القاپتارعا بارلاۋ جۇرگىزەمىز, بۇۇ بازالارى مەن باقىلاۋ بەكەتتەرىن تەكسەرەمىز, جارىلعىش زاتتار مەن قولدان جاسالعان جارىلعىش قۇرىلعىلاردى جويامىز. تابىلعان بارلىق وق-ءدارى – سيريا اۋماعىنداعى قارۋلى قاقتىعىستاردىڭ قاۋىپتى مۇراسى», دەيدى بىتىمگەرلىك وپەراتسيالار ورتالىعىنىڭ ماتەريالدىق-تەحنيكالىق قامتاماسىز ەتۋ باسقارماسىنىڭ وفيتسەرى, مايور ەرنار امانتاي ۇلى.
گولان جوتالارىنا اتتانار الدىندا اسكەري قىزمەتشىلەر الماتى گارنيزونىنداعى بىتىمگەرلىك وپەراتسيالار ورتالىعىندا, سونىمەن قاتار قوناەۆ گارنيزونىنىڭ ميناسىزداندىرۋ ورتالىعىندا كەشەندى ارنايى دايىندىقتان وتكەن بولاتىن. وسىلايشا, ەلىمىزدىڭ ينجەنەرلىك اسكەرلەرىنىڭ جاۋىنگەرلەرى حالىقارالىق دەڭگەيدە دە بۇۇ ميسسيالارى اياسىندا بەيبىتشىلىك پەن تۇراقتىلىقتى نىعايتۋعا ەلەۋلى ۇلەس قوسىپ كەلەدى.
بۇل اسكەري قۇرىلىم قاتارىندا ءوز ىسىنە جاۋاپكەرشىلىكپەن قاراپ, ۇزدىك اتانىپ جۇرگەن زامانداستارىمىز از ەمەس. سونىڭ ءبىرى – كەلىسىمشارت نەگىزىندەگى اسكەري قىزمەتشى ساعيت مىڭباي. تۇركىستان وبلىسىنىڭ تۋماسى 2012–2013 جىلدارى ۇلتتىق ۇلاننىڭ قاراعاندى قالاسىنداعى 5451 اسكەري بولىمىندە مەرزىمدى اسكەري قىزمەتىن وتەپ, بۇگىندە 19033 اسكەري ءبولىمنىڭ ينجەنەرلىك-ساپەرلىك باتالونىندا بولىمشە كومانديرى قىزمەتىن اتقارىپ جاتىر.
ينجەنەرلىك اسكەرلەردىڭ باستى ەرەكشەلىگى – كوزگە كورىنبەيتىن, بىراق اسا قاۋىپتى جاۋمەن كۇرەسۋى. مينا مەن جارىلعىش زات قاتەلىكتى كەشىرمەيدى. سوندىقتان ساپەر ءۇشىن ءاربىر قادام, ءاربىر قوزعالىس – ءومىر مەن ءولىمنىڭ اراسىنداعى شەشىم. بولىمشە كومانديرى رەتىندە ساعيتتىڭ موينىندا التى ساپەردىڭ ءومىرى مەن قاۋىپسىزدىگى تۇر. ول ءۇشىن «قاتەلىككە جول جوق» دەگەن ءسوز – جاي ۇران ەمەس, كاسىبي ءومىرىنىڭ باستى قاعيداسى.
وتكەن جىلى س.مىڭباي «اسكەر تارلانى» بايقاۋىندا جاۋىنگەرلىك دايىندىق پەن مەملەكەتتىك-قۇقىقتىق دايىندىق قورىتىندىسى بويىنشا «قايسار جۇرەك» اتالىمىنىڭ جەڭىمپازى اتاندى. بۇل ماراپات – جەكە باسىنىڭ جەتىستىگى عانا ەمەس, ونىڭ بولىمشەسىنىڭ بىرلىگى مەن كاسىبي شەبەرلىگىنىڭ ناتيجەسى دەپ بىلەدى.
وتاندىق ينجەنەرلىك اسكەرلەردىڭ, سونىڭ ىشىندە ساپەرلەردىڭ قىزمەتى كوزگە كورىنبەيتىن ەرلىك ەكەنىن جوعارىدا ايتتىق. س.مىڭباي سىندى جاۋىنگەرلەردىڭ ءومىر جولى جاس ۇرپاققا وتانسۇيگىشتىكتىڭ, جاۋاپكەرشىلىك پەن باتىلدىقتىڭ جارقىن ۇلگىسى. «قاتەلىككە جول جوق» دەگەن ۇرانمەن ەلگە ادال قىزمەت ەتۋ – ناعىز ساربازعا ءتان قاسيەت, ال مۇنداي ازاماتتار – ەلىمىزدىڭ قورعانى ءارى ماقتانىشى.
