«Voice Beyond Horizon» – مۋزىكا ارقىلى حالىقتاردى جاقىنداستىرىپ قانا قويماي, ەلىمىزدىڭ تابيعي بايلىعى مەن تۋريستىك الەۋەتىن الەمنىڭ ميلليونداعان كورەرمەنىنە تانىتاتىن اۋقىمدى مادەني جوبا. باعدارلاما قىتايدىڭ ءىرى مەدياحولدينگى «Hunan Broadcasting System» كومپانياسىمەن بىرلەسىپ دايىندالدى.
جوبانىڭ باستى ەرەكشەلىگى – تۇسىرىلىمدەر تۇگەلدەي ەلىمىزدىڭ تۋريستىك لوكاتسيالارىندا ءوتتى. اتاپ ايتساق, تۇركىستان, ماڭعىستاۋ, الماتى, اقمولا وبلىستارىندا, سونداي-اق استانا مەن الماتى سىندى اۋقىمدى التى تۋريستىك ءوڭىردى قامتىدى. قاتىسۋشىلار كونە تۇركىستان شاھارىنىڭ رۋحاني كەلبەتىن, بوزجىرا شاتقالىنىڭ عاجايىپ كورىنىستەرىن, كاسپي تەڭىزىنىڭ جاعالاۋىن, تابيعي ءىنجۋ-مارجانعا بالانعان قايىڭدى مەن كوبەيتۇز كولدەرىن, ساتى اۋىلى مەن قاپشاعاي سۋقويماسىن, سونىمەن قاتار شورتاندى-بۋراباي كۋرورتتىق ايماعىن ارالادى.
باعدارلاماعا ەلىمىزدەن بولەك, قىتاي, قىرعىزستان, يتاليا, مالايزيا, سەربيا مەملەكەتتەرىنىڭ ونەرپازدارى قاتىستى. وتكەن جىلدىڭ قىركۇيەك ايىندا ولار ەلىمىزدىڭ تابيعاتى اسەم, تاريحي وڭىرلەرىن ارالاپ, 7 مىڭ شاقىرىمنان استام جول ءجۇرىپ ءوتتى. ءار ساپار مۋزىكا, تابيعات ءھام مادەنيەتتىڭ ۇيلەسكەن ەرەكشە كورىنىسىنە اينالدى.
ايتۋلى جوبانىڭ جۇزەگە اسۋىنا «Kazakh Tourism» ۇلتتىق كومپانياسى, تۋريزم جانە سپورت, مادەنيەت جانە اقپارات مينيسترلىكتەرى, سونداي-اق استانا, الماتى قالالارى مەن الماتى, اقمولا, تۇركىستان, ماڭعىستاۋ وبلىستارىنىڭ اكىمدىكتەرى قولداۋ كورسەتتى. دەمەۋشىلەر قاتارىندا «Qarmet», «قازاقمىس», «التىن الماس» كومپانيالارى مەن نۇرلان سماعۇلوۆ قورى بار.
جوبانىڭ رەسمي كورسەتىلىمى قىتايدا اۋديتورياسى 1,9 ميللياردتان اساتىن «Hunan TV» تەلەارناسى مەن «Mango TV» تسيفرلىق پلاتفورماسىندا وتسە, باعدارلامانى وتاندىق كورەرمەن قاۋىم اقپان ايىندا «Qazaqstan» ۇلتتىق تەلەارناسىنان تاماشالاي الادى.
