24 ساعات

* ۇندىستان تيىسىنشە ەكىنشى جانە ءۇشىنشى ورىنعا سىرعىعان برازيليا مەن تۇركيانى باسىپ وزىپ, ساياحات ءۇشىن ەڭ قاۋىپتى ەل رەتىندە تانىلدى. ءۇندى ەلى ءبىرىنشى ورىنعا ايەل تۋريستەر مەن جەرگىلىكتى ايەل تۇرعىنداردى زورلاۋ بويىنشا شىعىپ وتىر. مىسالى, ەلدە ءار 20 مينۋت سايىن ءبىر زورلاۋ وقيعاسى تىركەلەدى ەكەن. * اۋعانستاندا بەتپەردە كيگەن قارۋلى ادامدار 30 ەر ادام – شيتتەردى ۇرلاپ كەتكەن. «فرانس-پرەسس» اگەنتتىگىنىڭ حابارلاۋىنشا, اۋعان ارمياسىنىڭ فورماسىن كيگەن توپ گەراتتان كابۋلعا كەلە جاتقان ەكى اۆتوبۋستى توقتاتسا, جۇرگىزۋشىلەر ادام ۇرلاۋشىلاردى ۇكىمەت اسكەرلەرىنىڭ سولداتتارىمەن شاتاستىرسا كەرەك. * اقش-تىڭ فەدە­رال­دىق سوتى پالەستينادان يز­رايلدەگى لاڭكەستىكتەر ءۇشىن 650 ميلليون دوللار وتەماقى تالاپ ەتتى. مۇنى «نيۋ-يورك تايمس» گازەتى حابارلادى. سوت وكىلدەرىنىڭ سوزدەرىنە قاراعاندا, پالەستينالىقتار ۇيىمداستىرعان 6 لاڭكەستىك سالدارىنان اقش ازاماتتارى دا كوز جۇمعان نەمەسە زارداپ شەككەن. *جاپونياداعى بۋدديستىك «نيۆانو بەيبىتشىلىك قورى» «بوكو-حارام» تەررورلىق ۇيىمىنا قارسىلىق ءبىلدىرۋشى نيگەريالىق ايەل-پاستور ەستەر يبانگونى بەيبىتشىلىك سىيلىعىمەن ماراپاتتادى. ول ايەلدەر مەن قىزداردى ۇرلاۋدى داستۇرگە اينالدىرعان «بوكو-حارامدى» اشىق سىن تەزىنە الىپ كەلە جاتسا كەرەك. *رەسەيدىڭ مەملەكەتتىك دۋماسى ەل پرەزيدەنتى ۆلا­ديمير پۋتينگە دەپۋتات­تاردىڭ ەڭبەكاقىسىن قىس­قارتۋ تۋرالى ۇسىنىس ءبىل­ءدىر­گەن. مۇنى مەمدۋما سپي­كەرى سەرگەي نارىشكيننىڭ مالىمدەمەسىنە سىلتەمە جاساي وتىرىپ, تاسس حابارلادى. مۇنداي ۇسىنىس دۋما كەڭەسىنىڭ ءماجىلىسى بارىسىندا 2015 جىلعا ارنالعان فەدەرالدىق بيۋدجەتكە تۇزەتۋلەر ەنگىزىلۋىنە بايلانىستى جاسالعان. * كيپر پرەزيدەنتى نيكوس اناستاسياديس رەسەيگە قارسى سانكتسيالاردىڭ ەنگىزىلۋىن سىنعا الدى. ونىڭ پىكىرىنشە, سانكتسيالار باستاماشىلار ۇمتىلعان ناتيجەلەرگە قول جەتكىزبەگەن. ن.اناستاسياديس كيپردىڭ رەسەيمەن تىعىز بايلانىستا ەكەنىن دە قاپەرگە سالادى. ءبىزدىڭ ەكونوميكامىز بەن قورعانىسىمىز وسى قاتىناستارعا تىكەلەي بايلانىس­تى, دەيدى ول. * يوردان وزەنىنىڭ باتىس جاعالاۋىندا يزرايل ءاس­كەريلەرى 19 جاسار پالەس­تينالىقتى اتىپ ولتىرگەن. «فرانس-پرەسس» اگەنتتىگىنىڭ حابارلاۋىنشا, وقيعا ۆيف­لەەمگە جاقىن ماڭداعى  دحەي­شە بوسقىندار لاگەرىندەگى ءتار­تىپسىزدىكتەر كەزىندە ورىن العان. پالەستينالىقتار سول­داتتارعا تاستار مەن ورتەگىش قۇرىلعىلار لاقتىرسا كەرەك. اقپارات اگەنتتىكتەرىنىڭ ماتەريالدارى بويىنشا ازىرلەندى.