فوتو: gov.kz
«پرەزيدەنت» ءبولىمىنىڭ ەرەجەلەرى تۇجىرىمدامالىق تۇرعىدان قايتا قارالدى. اتاپ ايتقاندا, پرەزيدەنتتىك سايلاۋ مەن انت بەرۋ ءراسىمىنىڭ مەرزىمى, مەملەكەت باسشىسىنىڭ قۇرىلتايمەن, ۇكىمەتپەن جانە باسقا دا مەملەكەتتىك ورگاندارمەن ءوزارا ءىس-قيمىلى اياسىنداعى وكىلەتتىكتەرى, سونداي-اق كادر ماسەلەلەرى مەن نورما شىعارۋ فۋنكتسيالارى قاراستىرىلدى.
«بولىمگە ۆيتسە-پرەزيدەنتتىڭ قۇقىقتىق مارتەبەسى مەن وكىلەتتىكتەرىنە ارنالعان جاڭا باپ ەنگىزىلدى», دەدى باقىت نۇرمۇحانوۆ.
ونىڭ ايتۋىنشا, ءبىر پالاتالى پارلامەنتكە كوشۋ اياسىندا «قۇرىلتاي» بولىمىنە كەڭ اۋقىمدى تۇزەتۋلەر جوباسى دايىندالدى. اتاپ ايتقاندا, ەكى پالاتالى پارلامەنت جانە ونىڭ وسىنداي جۇيەدەگى قىزمەتى تۋرالى ەرەجەلەر الىنىپ تاستالدى.
«زاڭ شىعارۋشى ورگاننىڭ وكىلەتتىكتەرى مۇقيات قايتا قارالدى. قۇرىلتايدىڭ سەسسيالارى مەن قىزمەتىن ۇيىمداستىرۋعا قاتىستى بارلىق باپ جاڭارتىلدى. زاڭ شىعارۋ باستاماسى قۇقىعى بار سۋبەكتىلەردىڭ ءتىزىمى كەڭەيتىلدى. قۇرىلتاي قابىلداعان زاڭدارمەن رەتتەلەتىن نەگىزگى قوعامدىق قاتىناستاردىڭ ءتىزىمى كەڭەيتىلدى. زاڭ جوبالارىن قاراۋ جانە قابىلداۋ راسىمدەرىن رەتتەيتىن ەرەجەلەر قايتا قارالدى», دەدى كونستيتۋتسيالىق سوت توراعاسىنىڭ ورىنباسارى.
سونىمەن قاتار, سالالىق كونستيتۋتسيالىق زاڭدا كورسەتىلگەن كونستيتۋتسيالىق سوتتىڭ قۇقىقتىق مارتەبەسى تۋرالى ەرەجەلەر دە كونستيتۋتسيا جوباسىنا ەنگىزىلدى.
«كونستيتۋتسيالىق قاداعالاۋدى جۇزەگە اسىراتىن جانە بۇكىل ەل بويىنشا كونستيتۋتسيانىڭ ۇستەمدىگىن قامتاماسىز ەتەتىن تاۋەلسىز مەملەكەتتىك ورگان رەتىندەگى مارتەبەسىن بەكىتەدى», دەپ اتاپ ءوتتى باقىت نۇرمۇحانوۆ.
