موڭعوليالىق دەپۋتاتپەن كەزدەستى

قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى قايرات يششانوۆ موڭعوليا ۇلى مەملەكەتتىك حۋرالىنىڭ مۇشەسى, موڭعوليا-قازاقستان پارلامەنتتىك توبىنىڭ جەتەكشىسى ا.تىلەيحانمەن كەزدەستى. مەيمانمەن كەزدەسۋدە ق.يششانوۆ ا.تىلەيحاننىڭ ءبىزدىڭ ەلىمىزگە ساپارى قازاقستان مەن موڭعوليا اراسىنداعى ءوزارا ءتيىمدى ىنتىماقتاستىققا جاڭا سەرپىن بەرەتىنىن اتاپ ءوتتى. كەزدەسۋ بارىسىندا توراعا ورىنباسارى سەناتتىڭ زاڭ شىعارۋ قىزمەتى جانە پارلامەنتارالىق ۇنقاتىسۋدى ۇدەتۋ جايىندا ايتتى. حالىقارالىق كۇن ءتارتىبىن تالقىلاي كەلىپ, ق.يششانوۆ بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستاننىڭ كانديداتۋراسىن ۋلان-باتوردىڭ قولدايتىنىنا سەنىم ءبىلدىردى جانە موڭعول كومپانيالارىن استانادا وتەتىن ەكسپو-2017 حالىقارالىق كورمەسىنە قاتىسۋعا شاقىردى. سەنات توراعاسىنىڭ ورىنباسارى, سونىمەن قاتار, ا.تىلەيحاندى الەمدىك جانە ءداستۇرلى دىندەر كوشباسشىلارىنىڭ V سەزىنە ازىرلىك تۋرالى حاباردار ەتىپ, ءدىني فورۋمعا تۇراقتى قاتىسىپ كەلە جاتقانى ءۇشىن موڭعول جاعىنا ريزاشىلىعىن ءبىلدىردى. «وتكەن ءتورت فورۋم دىندەر مەن وركەنيەتتەر اراسىنداعى ۇنقاتىسۋدى ىلگەرىلەتۋگە ىقپال ەتتى. سەزد دىندەر مەن مادەنيەتتەر اراسىنداعى قايشىلىقتاردى تەك ىنتىماقتاستىق پەن ءوزارا سەنىم ارقىلى ەڭسەرۋدىڭ ناقتى كورىنىسى بولدى», دەدى ق.يششانوۆ. كەزدەسۋگە سەناتورلار مۇرات باقتيار ۇلى, باقتىباي شەل­پەكوۆ جانە ءماجىلىس دەپۋتاتى اسحات بەكەنوۆ قاتىستى, دەپ حابارلادى سەناتتىڭ ءباسپاسوز قىزمەتى.