فوتو: تشو
ءمينيستردىڭ ايتۋىنشا, قازىرگى تاڭدا كورولەۆسكوە جانە تەڭىز كەن ورىندارىنداعى جۇمىستار ءىشىنارا قالپىنا كەلتىرىلگەن, ال ىسكە قوسۋ نىساننىڭ تەحنولوگيالىق ەرەكشەلىكتەرىن ەسكەرە وتىرىپ, كەزەڭ-كەزەڭىمەن جۇرگىزىلىپ جاتىر.
«تەڭىزدى ەكى كۇن بۇرىن ىسكە قوستىق, كورولەۆسكوە كەن ورنى دا جۇمىسىن باستادى. قازىر ءوندىرۋ كولەمى بىرتىندەپ ارتىپ كەلەدى. مۇنىڭ كۇردەلى تەحنولوگيالىق پروتسەسس ەكەنىن ءتۇسىنۋ كەرەك», دەدى ول.
اقكەنجەنوۆتىڭ ايتۋىنشا, كەن ورنىندا ءارتۇرلى قۋاتتاعى شامامەن 30 ترانسفورماتور جۇمىس ىستەيدى, ولاردىڭ باسىم بولىگى 110 كيلوۆولتتىق. وقيعا سالدارىنان ءۇش ترانسفورماتور زاقىمدانعان.
«ۇشەۋى جانىپ كەتتى – بۇل كريتيكالىق ماڭىزى بار جابدىقتار. ءبىز ولاردىڭ ءبىر بولىگىن قالپىنا كەلتىردىك, قازىر كەن ورنىن كەزەڭ-كەزەڭىمەن ىسكە قوسىپ جاتىرمىز. العاشقى گاز بەرىلدى. ءبىر اپتا ىشىندە تەڭىز كەن ورنى تولىق جۇمىسىن باستايدى», دەپ اتاپ ءوتتى مينيستر.
ونىڭ سوزىنشە, قالپىنا كەلتىرۋ جۇمىستارى باقىلاۋدا, ال مۇناي ءوندىرۋ بىرتىندەپ, قالىپتى رەجيمدە ارتتىرىلادى.
مۇناي ءوندىرىسى توقتاپ تۇر: ەنەرگەتيكا مينيسترلىگى تەڭىز كەن ورنىندا تەكسەرۋ جۇرگىزىپ جاتىر
ەسكە سالا كەتەيىك, 18 قاڭتار كۇنى تاڭەرتەڭ اتىراۋ وبلىسىنىڭ جىلىوي اۋدانىندا ورنالاسقان تەڭىز كەن ورنىنداعى ءۇشىنشى بۋىن زاۋىتىندا ءورت شىققان ەدى.
