فوتو: ءابىل دوششانوۆ (tobolinfo.kz)
جوعارعى سوتتىڭ مالىمەتىنشە, 2021 جىلى مەملەكەتتىك ورگان جشس-مەن 2,2 ملرد تەڭگە سوماسىنا ءبىلىم بەرۋ نىسانىن سالۋ جونىندە كەلىسىمشارت جاساعان. قۇجات بويىنشا نىسان 2023 جىلعى 31 جەلتوقسانعا دەيىن پايدالانۋعا بەرىلۋى ءتيىس ەدى, الايدا بەلگىلەنگەن مەرزىمدە مەكتەپ ىسكە قوسىلماعان.
«2024 جىلدىڭ قاڭتار ايىندا مەكتەپتىڭ سپورت زالىندا شاتىر قۇلادى. وعان فەرمالارعا تۇسەتىن كولدەنەڭ جۇكتەمەنىڭ رۇقسات ەتىلمەگەن دەڭگەيدە ارتۋى سەبەپ بولعان. بۇل دانەكەر تىگىستىڭ بۇزىلۋىنا جانە كوتەرگىش كونسترۋكتسيالاردىڭ دەفورماتسياسىنا اكەلگەن, وسىلايشا جوبالىق قۇجاتتاما مەن قۇرىلىس نورمالارى بۇزىلعان», دەلىنگەن سوت مالىمدەمەسىندە.
«توبول ينفو» باسىلىمى جازعانداي, مەردىگەر جۇمىستاردى جىلۋ بولماعاندىقتان توقتاتقان. عيمارات سۋىق بولعاندىقتان ارلەۋ جۇمىستارى مەن جابدىقتاردى مونتاجداۋدى جالعاستىرۋ مۇمكىن بولماعان.
باسىلىم رەپورتاجىندا 2024 جىلعى 3 قاڭتاردا سپورت زالىنداعى باعانالاردىڭ بىرىنە زاقىم كەلگەنى ناقتىلانادى: بەتون كونسترۋكتسياسىنىڭ ءبىر بولىگى ۇگىلىپ, قابىرعانىڭ فراگمەنتى ج ۇلىنىپ كەتكەننەن كەيىن شاتىردىڭ ءبىر بولىگى قۇلاعان.
اپات سالدارىن جويۋ ءۇشىن مەملەكەتتىك ورگان اۆتورلىق جانە تەحنيكالىق قاداعالاۋعا, سونداي-اق قۇرىلىستى اياقتاۋعا 266 ملن تەڭگەدەن استام سوماعا بولەك شارتتار جاساعان. وسى شىعىنداردى تاپسىرىس بەرۋشى مەردىگەردەن زالال رەتىندە ءوندىرىپ الۋدى تالاپ ەتكەن.
جشس وكىلى تالاپپەن كەلىسپەي, فەرمالاردىڭ شامادان تىس جۇكتەلۋى قۇبىرلارداعى سۋدىڭ قاتىپ قالۋىنان, جىلىمىق كەزىندە شاتىردىڭ سۋعا تولۋىنان بولعانىن ايتىپ, ينجەنەرلىك جەلىلەردىڭ ۋاقىتىلى تارتىلماعانى ءۇشىن تاپسىرىس بەرۋشىنى كىنالاۋعا تىرىسقان.
الايدا سوت بۇل ۋاجدەردى قابىلداماي, كەلىسىمشارت تالاپتارىنا سايكەس كومپانيا جۇمىستاردىڭ ساپاسىنا, قولدانىلعان ماتەريالدارعا, سونداي-اق قۇرىلىستىڭ جوبالىق قۇجاتتاما مەن تەحنيكالىق تالاپتارعا سايكەستىگىنە تولىق جاۋاپتى ەكەنىن اتاپ ءوتتى. سونىمەن قاتار, جشس كونسترۋكتسيالاردىڭ سەنىمدىلىگى مەن قاۋىپسىزدىگىنە كەپىلدىك بەرگەن جانە شارتتى تيىسىنشە ورىنداماعان جاعدايدا تاپسىرىس بەرۋشىنىڭ شىعىندارىن وتەۋگە مىندەتتەلگەن.
سوت پايدالانۋ جانە كليماتتىق فاكتورلاردى مەردىگەر جوبالاۋ مەن قۇرىلىس كەزەڭىنىڭ وزىندە ەسكەرۋى ءتيىس ەكەنىن كورسەتتى. مۇنداي ءمان-جايلار كونسترۋكتيۆتىك اقاۋلار ءۇشىن جاۋاپكەرشىلىكتەن بوساتپايدى.
تالاپ ارىز تولىق كولەمدە قاناعاتتاندىرىلىپ, جشس-عا وبلىستىق بيۋدجەتكە 266 ملن تەڭگەدەن استام قاراجاتتى – ونىڭ ىشىندە ساراپتامالارعا, اپات سالدارىن جويۋعا جانە مەكتەپ قۇرىلىسىن اياقتاۋعا كەتكەن شىعىنداردى وتەۋ مىندەتتەلدى.
جاۋاپسىز مەردىگەردى 135 ميلليون تەڭگە كولەمىندەگى ايىرمانى تولەۋگە مىندەتتەدى
سوت شەشىمى ازىرگە زاڭدى كۇشىنە ەنگەن جوق.
