م.اشىمباەۆ مەيمانعا ءىلتيپات بىلدىرە وتىرىپ, قازاقستان مەن يزرايل اراسىنداعى كوپجىلدىق ءارى كوپقىرلى ىنتىماقتاستىق جۇيەلى تۇردە دامىپ كەلە جاتقانىن اتاپ ءوتتى جانە پارلامەنتارالىق ءوزارا ءىس-قيمىلدىڭ الەۋەتى زور ەكەنىن تىلگە تيەك ەتتى. سونداي-اق سەنات توراعاسى يزرايل پرەزيدەنتىنىڭ استاناعا جاسايتىن الداعى رەسمي ساپارى ەكى ەل اراسىنداعى ىنتىماقتاستىقتى ودان ءارى نىعايتۋعا تىڭ سەرپىن بەرەتىنىنە سەنىم ءبىلدىردى.
«قازاقستان مەن يزرايل اراسىندا, ەڭ الدىمەن, جوعارى دەڭگەيدە سىندارلى ساياسي ديالوگ ورناعانىن اتاپ وتكەن ءجون. بيىل قاڭتار ايىندا مەملەكەت باسشىسى قاسىم-جومارت توقاەۆ يزرايل پرەمەر-ءمينيسترى بينيامين نەتانياحۋمەن تەلەفون ارقىلى سويلەستى. اڭگىمە بارىسىندا قازاقستان مەن يزرايل اراسىنداعى قارىم-قاتىناستىڭ وڭ ديناميكاسى جان-جاقتى تالقىلاندى. بۇگىندە ءبىز قازاقستان پارلامەنتى مەن يزرايل كنەسسەتى اراسىنداعى تىعىز قارىم-قاتىناستى دامىتۋعا, سونداي-اق, يننوۆاتسيالار, اۋىل شارۋاشىلىعى مەن سۋ رەسۋرستارىن باسقارۋ سالالارىنداعى زاڭنامالىق تاجىريبەلەرىڭىزدى زەردەلەۋگە مۇددەلىمىز», دەدى پالاتا سپيكەرى.
سونداي-اق م.اشىمباەۆ قازاقستان پرەزيدەنتىنىڭ يبراھيم كەلىسىمدەرىنە قوسىلۋ جونىندەگى باستاماسىنا نازار اۋداردى. بۇل قادام مۇسىلمان ەلدەرى مەن يزرايل اراسىنداعى ديپلوماتيالىق جانە ەكونوميكالىق بايلانىستاردى نىعايتۋعا باعىتتالعان.
«مەملەكەت باسشىسى قاسىم-جومارت توقاەۆتىڭ قازاقستاننىڭ يبراھيم كەلىسىمدەرىنە قوسىلۋى جونىندەگى باستاماسىن تاياۋ شىعىستا بەيبىتشىلىك ورناتۋ جولىنداعى ماڭىزدى قادام دەپ ەسەپتەيمىز. بۇل شەشىم ءبىزدىڭ تەڭگەرىمدى, سىندارلى ءارى بەيبىتشىلىككە تابان تىرەگەن سىرتقى ساياساتىمىزعا تولىق سايكەس كەلەدى. اتالعان باستاما امەريكا قۇراما شتاتتارىمەن, يزرايلمەن جانە اراب ەلدەرىمەن كوپجاقتى ءوزارا ءىس-قيمىلدى نىعايتىپ, سىندارلى ديالوگكە قاجەتتى كەڭىستىك قالىپتاستىرادى دەپ سەنەمىن», دەدى م.اشىمباەۆ.
سونىمەن قاتار سەنات توراعاسى ەلىمىزدە جۇزەگە اسىرىلىپ جاتقان رەفورمالارعا, ونىڭ ىشىندە مەملەكەت باسشىسى قاسىم-جومارت توقاەۆتىڭ الەۋمەتتىك-ەكونوميكالىق, ساياسي باستامالارىنىڭ ورىندالۋ بارىسىنا توقتالدى. اتاپ ايتقاندا, ەكونوميكانى ارتاراپتاندىرۋعا, ءبىرتۇتاس ءارى ورنىقتى ۇلتتىق تسيفرلىق ەكوجۇيە قالىپتاستىرۋعا باعىتتالعان شارالار مەن الداعى كونستيتۋتسيالىق رەفورما ماسەلەلەرى ءسوز بولدى.
جالپى كەزدەسۋ وتكەن بۇل كۇن حالىقارالىق حولوكوست قۇرباندارىن ەسكە الۋ كۇنىمەن تۇسپا-تۇس كەلىپ وتىر. وسىعان بايلانىستى م.اشىمباەۆ بولاشاق ۇرپاق ءۇشىن گۋمانيزم مەن بەيبىتشىلىك يدەالدارىن قورعاۋ جانە اتالعان قاسىرەتتى ۇمىتپاۋ اسا ماڭىزدى ەكەنىن ايتتى. وسىعان بايلانىستى تاراپتار رۋحاني ديپلوماتيانىڭ ارتىپ كەلە جاتقان ءرولى مەن الەمدىك جانە ءداستۇرلى دىندەر كوشباسشىلارىنىڭ سەزى اياسىنداعى ىنتىماقتاستىق باعىتتارىن تالقىلادى.
ءوز كەزەگىندە گيدەون موشە ساار قاسىم-جومارت توقاەۆتىڭ باسشىلىعىمەن قازاقستاندا جۇرگىزىلىپ جاتقان ساياسي جانە الەۋمەتتىك-ەكونوميكالىق رەفورمالارعا جوعارى باعا بەرىپ, ىنتىماقتاستىقتى ودان ءارى كەڭەيتىپ, نىعايتۋعا مۇددەلى ەكەنىن جەتكىزدى. ينفراقۇرىلىم, فارماتسەۆتيكا, اۋىل شارۋاشىلىعى, تاماق ونەركاسىبى, اقپاراتتىق تەحنولوگيالار, تسيفرلاندىرۋ جانە جاساندى ينتەللەكت سالالارىنداعى بىرلەسكەن جوبالارعا دا ەرەكشە ءمان بەرىلدى.
