سۋرەت: ernur.kz
- جاپونيانىڭ Rizin FF ليگاسىندا ايقاسىپ جۇرگەن ارالاس جەكپە-جەكتىڭ حاس شەبەرى قارشىعا داۋىتبەك (18-3) كەلەسى كەزدەسۋىن 7 ناۋرىزدا توكيودا «ايداھار» دەگەن بۇركەنشىك ەسىممەن تانىلعان جەرگىلىكتى سپورتشى ريۋيا فۋكۋداعا (26-9-1) قارسى وتكىزەدى. قانداسىمىز بۇل پروموۋشەننىڭ چەمپيوندىق بەلبەۋىنە بۇرىنىراق تالاسۋعا ءتيىس ەدى. سەبەبى قارشىعا جاپونيادا ۇيىمداستىرىلعان جارىستاردىڭ بارلىعىندا قارسىلاستارىن قوعاداي جاپىردى. تەك 31 جەلتوقساندا وتكەن سوڭعى كەزدەسۋىندە يۋتا كۋبو قازاق فايتەرىنىڭ كوزىن شۇقىپ الىپ, جەكپە-جەكتىڭ ناتيجەسى ەسەپكە الىنبادى.
- يتاليانىڭ پوتستسە-دي-فاسسە قالاسىندا تاۋ شاڭعىسىنان حالىقارالىق تۋرنير اياقتالدى. ايەلدەر سلالومىندا سىنعا تۇسكەن الەكساندرا سكوروحودوۆا الدىنا جان سالماي, التىننان القا تاقتى. ەكىنشى, ءۇشىنشى ورىنداردى يتاليالىق دجۋن گاريتانو يتۋربە مەن امەريكالىق ەمما گۋگگەنحايمەر يەلەندى.
- تاشكەنتتە بوكستان وزبەكستان چەمپيوناتى مارەگە جەتتى. 90 كگ سالماق دارەجەسىنىڭ فينالىندا ماديار سايدراقىموۆ پەن شاحزود پالۆونوۆ كەزدەستى. بۇل باسەكە العاشقىسىنىڭ پايداسىنا شەشىلدى. ءسويتىپ, 28 جاستاعى قانداسىمىز كورشىلەس ەلدىڭ چەمپيونى اتاندى. قالىڭ قازاق شوعىرلانعان بوستاندىق اۋدانىندا دۇنيەگە كەلگەن ماديار بۇعان دەيىن 2019 جىلى اسكەريلەر اراسىندا الەم چەمپيونى, 2021 جىلى الەم چەمپيوناتىنىڭ قولا جۇلدەگەرى بولدى, 2022 جىلى ازيا بىرىنشىلىگىنىڭ فينالىندا وينادى.
- اقش-تىڭ لونگ-بيچىندە وتكەن جارىستا ەكىنشى جارتىلاي جەڭىل سالماقتا سايىسقا تۇسكەن كاسىپقوي بوكسشى ايدوس مەدەت ارمەنيالىق ازات وۆاننيسياننان تورەشىلەردىڭ شەشىمىمەن ۇتىلدى. وسىعان دەيىن 13 جەكپە-جەكتە جەڭىسكە جەتكەن قانداسىمىز ءوز مانسابىندا العاش رەت جەڭىلىس تاپتى.
