اتاپ ايتقاندا, نيدەرلاند كورولدىگىنىڭ «Travel Book» جۋرنالىنا ماڭعىستاۋ وبلىسى مەن استانا قالاسى تۋرالى ارنايى ماقالا جاريالادى. اسىرەسە قىزىلقۇپ شاتقالىنىڭ عاجايىپ كورىنىسى جۋرنالدىڭ جاڭا سانىنىڭ نەگىزگى ۆيزۋالدى سانىنە اينالعان. ماقالادا بوزجىرا, تورىش, قىزىلقۇپ شاتقالدارىنىڭ سۇلۋلىعىنا باسا ءمان بەرىلگەن. باسىلىم نيدەرلاند پەن بەلگيا اۋماعىنا كەڭىنەن تارالادى.
ماقالا اۆتورى ءوز ساياحاتىنان العان اسەرىن بىلايشا جەتكىزەدى: «ماڭعىستاۋدى مارس نەمەسە اي بەدەرىمەن ءجيى سالىستىراتىنى بەكەر ەمەس. مۇنداعى پەيزاجدار ايرىقشا اسەر قالدىرادى. ەشنارسەگە ۇقسامايتىن بىرەگەي لاندشافتتىڭ قاق ورتاسىندا تۇرعاندا تاڭدانىسىڭدى جاسىرا المايسىڭ. ەڭ عاجايىپ ورىندارى – بوزجىرا, قىزىلقۇپ, تورىش. بوزجىرا القابىندا شاتقالدار, تاۋ شىڭدارى مەن جارتاستار اپپاق تۇسكە بولەنسە, «تيراميسۋ تاۋلارى» اتالىپ كەتكەن قىزىلقۇپ, كەرىسىنشە, قىزعىلت, قىزىل, تەرراكوتا رەڭكتەرىمەن كوز تارتادى. ال «شارلار القابىنداعى» (تورىش) ءپىشىنى ءمىنسىز دوڭگەلەك مىڭداعان تاستى كورۋ – ءتىپتى ءبىر عانيبەت».
سونىمەن قاتار بەلگيانىڭ «Papillio» لايفستايل-باسىلىمى دا وقىرماندارىنا ماڭعىستاۋدى سيرەك كەزدەسەتىن لاندشافتى بار تارتىمدى باعىت رەتىندە ۇسىندى. تارالىمى شامامەن 280 مىڭ دانانى قۇرايتىن جۋرنال ەل تابيعاتىنىڭ بىرەگەيلىگىن پاش ەتكەن. ءوڭىر تۋرالى بەينەلى اقپاراتتار مەن فوتورەپورتاجدار سارابدال ساياحاتشىلاردى بىرىكتىرەتىن حالىقارالىق «She Is Not Lost» پلاتفورماسىندا دا جاريالاندى.
