سۋرەتتى تۇسىرگەن – اقادىل رىسماحان
№70 ورتا مەكتەپتىڭ اشىلۋ سالتاناتىنا قاتىسقان ءوڭىر باسشىسى ەربول قاراشوكەەۆ وڭىردە اعارتۋ سالاسىن وركەندەتۋ ماقساتىندا قولعا الىنعان اۋقىمدى جۇمىس ىلكى ساتكە دە توقتامايتىنىن, جاسوسپىرىمدەردىڭ ساپالى ءبىلىم الۋى ءۇشىن قولدان كەلگەنشە جاعداي جاسالاتىنىن جەتكىزدى.
«مەملەكەت تاراپىنان ءبىلىم بەرۋ سالاسىنا كورسەتىلىپ جاتقان قولداۋدىڭ ناتيجەسىندە كەيىنگى جىلدارى وڭىردە كوپتەگەن اۋقىمدى جۇمىس اتقارىلعانىن كوزى قاراقتى جۇرت كورىپ وتىر. «كەلەشەك مەكتەپتەرى» ۇلتتىق جوباسى اياسىندا بۇعان دەيىن 6 ءبىلىم ورداسى پايدالانۋعا بەرىلگەن بولاتىن. اۋقىمدى جوبانىڭ ارقاسىندا وبلىستا ءۇش اۋىسىمدى مەكتەپ ماسەلەسى شەشىمىن تاپتى.
جالپى العاندا ءوڭىر حالقى ۇلتتىق جوبانىڭ شاراپاتىن كورىپ وتىرعانى انىق. بۇگىن سول يگى باستامانىڭ جالعاسى رەتىندە وبلىس ورتالىعىندا تاعى ءبىر ىرگەلى ءبىلىم ۇياسى ەسىگىن ايقارا اشىپ وتىر. بۇل – جاس ۇرپاقتىڭ ساپالى ءبىلىم الىپ, بولاشاقتا ءوز جولىن ناقتى ايقىنداۋىنا باعىتتالعان اسا ماڭىزدى قادام. وسى باعىتتاعى جۇمىس ارمەن قاراي دا جالعاسادى», دەدى وبلىس باسشىسى.
جاڭا مەكتەپتىڭ تەحنيكالىق بازاسىمەن تانىسقان ءوڭىر باسشىسى وقۋ ورداسىنىڭ ۇجىمىنا ينتەراكتيۆتى تاقتانىڭ سەرتيفيكاتىن تابىستاپ, ءبىلىم الۋشىلارعا ىزگى تىلەگىن جەتكىزدى.
ۋاقىت سۇرانىسىنا ساي سالىنعان جاڭا مەكتەپتە 33 وقۋ كابينەتى, ءماجىلىس زالى, اسحانا, ەكى بىردەي سپورت زالى, STEM جانە روبوتتەحنيكا كابينەتتەرى, ەكى كومپيۋتەر سىنىبى, كىتاپحانا, ءۇش زەرتحانا, ءۇش شەبەرحانا جانە بەس كوۆوركينگ ورتالىعى بار.
رەسمي دەرەككە سەنسەك, مەكتەپتە 723 وقۋشى ءبىلىم نارىمەن سۋسىنداپ وتىر. تولىقتاي جاڭا قۇرال-جابدىقپەن قامتىلعان وقۋ ورداسىندا 60-قا جۋىق بىلىكتى پەداگوگ جۇمىس ىستەيدى.
جامبىل وبلىسى
