بولاشاق كىلتى – بىلىمدە

ءال-فارابي اتىنداعى قازۇۋ-دە پرەمەر-ءمينيستردىڭ ورىنباسارى بەردىبەك ساپارباەۆتىڭ قاتىسۋىمەن «نۇرلى جول. قازاقستان ۋنيۆەرسيتەتتەرى الەمدىك ءبىلىم بەرۋ كەڭىستىگىندەگى باسەكەگە قابىلەتتىلىگىن ارتتىرۋ جولىندا» اتتى الماتى قالاسى جوو رەكتورلارىنىڭ ايماقتىق جيىنى ءوتتى. ب.ساپارباەۆ الدىمەن عىلىمي-تەحنولوگيالىق پاركتە, «كەرەمەت» ستۋدەنتتەرگە قىزمەت كورسەتۋ ورتالىعى مەن «ءال-فارابي» كىتاپحاناسىن ارالاپ كوردى. رەكتورلارمەن وتكەن جيىندا ءبىلىم بەرۋ سالاسىنىڭ بۇگىنگى وزەكتى ماسەلەلەرى مەن مىندەتتەرى اڭگىمەگە ارقاۋ بولدى. «قازاقستان-2050» ستراتەگياسىندا مەملەكەت باسشىسى اتاپ كورسەتكەن – الەمنىڭ دامىعان 30 ەلىنىڭ قاتارىنا كىرۋ مىندەتىن جۇزەگە اسىرۋ ءۇشىن وتانىمىزدىڭ جوعارى ءبىلىم بەرۋ جۇيەسى الدىنا ادام كاپيتالىنىڭ دەڭگەيىن كوتەرۋ, زامان سۇرانىسىنا ساي ساپالى ماماندار لەگىن دايارلاۋ ماسەلەسى قويىلىپ وتىر. مەملەكەت پەن قوعامنىڭ تابىستى دامۋىنا كەپىل بولاتىن, بولاشاققا باعىتتالعان بۇل ماقساتتار ەلباسىمىزدىڭ   «نۇرلى جول – بولاشاققا باستار جول» جولداۋىنا نەگىز ەتىپ الىنعان. وسى كوكەيكەستى  ماسەلە الماتى جوو-لارىنىڭ رەكتورلارى قاتىسقان كەزدەسۋدىڭ نەگىزگى وزەگىنە اينالدى. ب. ساپارباەۆ كادر دايارلاۋ ساپاسىن ارتتىرۋعا باسا نازار اۋداردى. وسكەلەڭ ۇرپاققا الەمدىك دەڭگەيدە ءبىلىم بەرۋ, وقىتۋ مازمۇنىنا جاڭاشا كوزاراس تانىتۋ قاجەتتىگىن اتاپ دۋالدىق ءبىلىم بەرۋگە دە نازار اۋداردى. ول, سونىمەن بىرگە, ءال-فارابي اتىنداعى قازاق ۇلتتىق ۋنيۆەرسيتەتىنىڭ قىزمەتىنە جوعارى باعا بەرە وتىرىپ, وقۋ ورنىنداعى وزگەرىستەردى وزگە ۋنيۆەرسيتەتتەرگە ۇلگى رەتىندە تىلگە تيەك ەتتى. وقىتۋ باعدارلامالارى ەلدىڭ ۇدەمەلى يندۋستريالىق-يننو­ۆاتسيالىق دامۋى تالاپتارىنا جاۋاپ بەرۋ كەرەكتىگىن اتاپ وتكەن پرەمەر-ءمينيستردىڭ ورىنباسارى بۇل ورايدا ۇلتتىق ۋنيۆەرسيتەتتەرگە جۇكتەلەر جاۋاپكەرشىلىك جۇگى زور ەكەندىگىنە توقتالدى. ەكونوميكانىڭ العا باسۋى ءۇشىن يننوۆاتسيالىق قىزمەتتى ۇنەمى قولداپ, قۋاتتاۋ, ىنتالاندىرۋ قاجەت, دەپ بۇل ساياسات ەلدىڭ سەرپىندى دامۋىن قامتاماسىز ەتەتىن وزىق تەحنولوگيالاردى, سونىڭ ىشىندە ءبىلىم مەن عىلىمدى باسقارۋدىڭ جاڭا ءادىس-تاسىلدەرىن ومىرگە جەدەل ەنگىزۋدى تالاپ ەتەدى, دەدى. سونداي-اق, يننوۆاتسيالىق-يندۋستريالىق دامۋ ستراتەگياسى نەگىزىندە ەڭبەك رەسۋرستارىن ءتيىمدى ورنالاستىرۋدى كوزدەيتىن «سەرپىن» باعدارلاماسىن جۇيەلى جۇزەگە اسىرۋدى تاپسىرعان. قازاقستان ۋنيۆەرسيتەتتەرىنىڭ الەمدىك ءبىلىم بەرۋ كەڭىستى­گىندە باسەكەگە قابىلەتتىلىگىن ارت­تىرۋدىڭ ءتۇيىندى تۇستارى تال­قى­لانعان القالى وتىرىستا  ەل عى­لىمى مەن ءبىلىمىنىڭ قارا شاڭى­راعى – ءال-فارابي اتىنداعى قا­زاق ۇلتتىق ۋنيۆەرسيتەتىنىڭ رەكتورى, اكادەميك عالىمقايىر مۇتانوۆ وقۋ ورداسىنىڭ الدىندا تۇرعان مىندەتتەرمەن, جاستارعا ساپالى ءبىلىم, سانالى تاربيە بەرۋ ماقساتىندا اتقارىلىپ جاتقان سان سالالى جۇمىستارمەن تانىستىرىپ ءوتتى. توكيو ۋنيۆەرسيتەتىمەن بىرىگىپ قازاقستان تاريحىنداعى تۇڭعىش جوبا – وتاندىق نانوس­پۋت­نيكتى ازىرلەۋ جۇمىستارى ءجۇرىپ جاتقانىن, ستۋدەنتتەردىڭ 70 پايىزعا جۋىعى عىلىمي جۇ­مىس­تارعا تارتىلعانىن, وسىنداي جەتىستىكتەر نەگىزىندە وقۋ ورداسى الەمدەگى ەڭ ۇزدىك 300 ۋنيۆەرسيتەت ساپىنان ورىن الىپ وتىرعانىن جەتكىزدى. جيىندا الماتى مەملەكەتتىك جاڭا تەحنولوگيالار كوللەدجىنىڭ ديرەكتورى داۆيد ەزاۋ وقۋ ورنىن­داعى دۋالدىق ءبىلىم بەرۋ ماسەلەلەرىنە توقتالدى. جيىن بارىسىندا ىلگەرى دامۋعا كەدەرگى بولىپ وتىرعان كەمشىلىكتەر دە اتاپ كورسەتىلىپ, ولقىلىقتاردىڭ ورنىن تولتىرۋ جولدارى وي ەلەگىنەن وتكىزىلدى. بولاشاقتىڭ كىلتى بىلىمدە ەكەنى نازارعا سالىندى. باقىت اسەمباەۆا, قايرات جاڭاباەۆ, قاز مۇۋ-ءدىڭ جۋرناليستيكا فاكۋلتەتىنىڭ وقىتۋشىلارى