فوتو: ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى
بيۋدجەت پەن قوردان تولەنگەن قاراجات
وتكەن جىلى مۇگەدەكتىگى جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردى تولەۋگە رەسپۋبليكالىق بيۋدجەتتەن 655,7 ملرد تەڭگە باعىتتالدى. بۇعان قوسا, مەملەكەتتىك الەۋمەتتىك ساقتاندىرۋ قورىنان ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا شامامەن 90,3 ملرد تەڭگە كولەمىندە الەۋمەتتىك تولەمدەر جۇزەگە اسىرىلدى.
رەسمي دەرەكتەرگە سايكەس, 2025 جىلدىڭ قورىتىندىسىندا مۇگەدەكتىگى بويىنشا مەملەكەتتىك الەۋمەتتىك جاردەماقى الۋشىلار سانى 553,9 مىڭ ادامعا جەتسە, اسىراۋشىسىنان ايىرىلۋ جاعدايى بويىنشا جاردەماقى العاندار سانى 191,9 مىڭ ادامدى قۇرادى.
جاردەماقى مولشەرى قالاي ەسەپتەلەدى؟
مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبى مەن سەبەبىنە, سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەن كۇنكورىس دەڭگەيىنە بايلانىستى ايقىندالادى.
ال اسىراۋشىسىنان ايىرىلۋ جاعدايى بويىنشا جاردەماقى كولەمى قايتىس بولعان اسىراۋشىنىڭ اسىراۋىنداعى ادامداردىڭ سانىنا, قايتىس بولۋ سەبەپتەرىنە جانە ەڭ تومەن كۇنكورىس دەڭگەيىنە قاراي بەلگىلەنەدى.
مىندەتتى الەۋمەتتىك ساقتاندىرۋ جۇيەسىنىڭ ءرولى
مىندەتتى الەۋمەتتىك ساقتاندىرۋ جۇيەسىنە قاتىسۋشىلار ءۇشىن دە قوسىمشا قولداۋ تەتىكتەرى قاراستىرىلعان. الەۋمەتتىك تاۋەكەلدەر تۋىنداعان جاعدايدا مەملەكەتتىك الەۋمەتتىك ساقتاندىرۋ قورىنان تولەمدەر جۇزەگە اسىرىلادى. 2025 جىلى 101,3 مىڭ ادام ەڭبەككە قابىلەتتىلىگىنەن ايىرىلۋ بويىنشا, ال شامامەن 68,6 مىڭ وتباسى اسىراۋشىسىنان ايىرىلۋ بويىنشا الەۋمەتتىك تولەم الدى.
بۇل تولەمدەردىڭ مولشەرى ءار ازامات ءۇشىن جەكە ەسەپتەلەدى. ول سوڭعى ەكى جىلداعى الەۋمەتتىك اۋدارىمدار جۇرگىزىلگەن ورتاشا ايلىق تابىسقا, ەڭبەككە قابىلەتتىلىگىنەن ايىرىلۋ كوەففيتسيەنتتەرىنە, اسىراۋىنداعى ادامدار سانىنا, مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە تابىستى اۋىستىرۋ دەڭگەيىنە بايلانىستى. اتالعان تولەمدەر رەسپۋبليكالىق بيۋدجەتتەن تولەنەتىن جاردەماقىلارعا قوسىمشا رەتىندە بەرىلەدى.
2026 جىلدان باستاپ ءوسىم بار
مەملەكەتتىك قولداۋ كولەمى الداعى كەزەڭدە دە ۇلعايا ءتۇستى. ەڭ تومەن كۇنكورىس دەڭگەيىنىڭ وسۋىنە بايلانىستى 2026 جىلعى 1 قاڭتاردان باستاپ مۇگەدەكتىگى جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلار 10 %-عا ارتتى. ۇكىمەت شەشىمىمەن مەملەكەتتىك الەۋمەتتىك ساقتاندىرۋ قورىنان تولەنەتىن ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا تولەمدەر دە 10 %-عا كوبەيتىلدى.
ناتيجەسىندە, بيىل جالپى اۋرۋ سالدارىنان مۇگەدەكتىگى بار ازاماتتارعا ارنالعان مەملەكەتتىك الەۋمەتتىك جاردەماقى مولشەرى 1-توپ ءۇشىن 111 872 تەڭگەنى, 2-توپ ءۇشىن 89 498 تەڭگەنى, 3-توپ ءۇشىن 61 021 تەڭگەنى قۇرايدى.
ال 2026 جىلعى 1 قاڭتارداعى جاعداي بويىنشا ەڭبەككە قابىلەتتىلىگىنەن ايىرىلۋ بويىنشا الەۋمەتتىك تولەمدەردىڭ ورتاشا مولشەرى 72 409 تەڭگە بولسا, اسىراۋشىسىنان ايىرىلۋ بويىنشا ورتاشا تولەم 73 306 تەڭگەگە جەتتى.
بۇل دەرەكتەر مەملەكەت ءۇشىن الەۋمەتتىك ادىلەت پەن ازاماتتاردىڭ ءال-اۋقاتىن قامتاماسىز ەتۋ باستى باسىمدىقتاردىڭ ءبىرى بولىپ قالا بەرەتىنىن اڭعارتادى.
1 قاڭتاردان باستاپ الەۋمەتتىك تولەمدەر مەن سالىق جۇيەسى وزگەردى
