فوتو: اقوردا
كوميسسيا مۇشەسى ءوز سوزىندە جاڭا پارلامەنتتىڭ قىزمەتىنە تىكەلەي قاتىستى 50, 51 جانە 53-باپتاردا كوزدەلگەن تۇزەتۋلەرگە ەرەكشە توقتالدى. ونىڭ ايتۋىنشا, بارلىق ۇسىنىس مەملەكەت باسشىسىنىڭ قىزىلوردا قالاسىندا وتكەن ۇلتتىق قۇرىلتايدىڭ V وتىرىسىندا بەرگەن تاپسىرمالارىن نەگىزگە الا وتىرىپ ازىرلەنگەن.
«ۇسىنىلىپ وتىرعانداي, بولاشاق قۇرىلتاي پروپورتسيونالدى وكىلدىك جۇيەسى بويىنشا سايلاناتىن 145 دەپۋتاتتان تۇرادى. قۇرىلتاي دەپۋتاتتارىنىڭ وكىلەتتىك مەرزىمىن قازىرگى ماجىلىسپەن بىردەي – 5 جىل دەڭگەيىندە ساقتاۋ ۇسىنىلىپ وتىر. بۇل وزگەرىس تولىق قولداۋ تابادى. سونىمەن قاتار, قۇرىلتاي دەپۋتاتتىعىنا كانديداتتارعا قويىلاتىن قوسىمشا تالاپتار ارنايى كونستيتۋتسيالىق زاڭداردا كوزدەلۋى مۇمكىن», دەدى دەپۋتات.
ونىڭ پىكىرىنشە, بولاشاق قۇرىلتايدىڭ مازمۇندىق جانە تۇجىرىمدامالىق تۇرعىدان ەڭ ماڭىزدى وزگەرىستەرى 53-باپتا كورىنىس تاپقان. اتالعان تۇزەتۋلەر مەملەكەتتىك باسقارۋ جۇيەسىن قايتا تەڭگەرۋگە, بيلىك تارماقتارى اراسىنداعى ءوزارا تەجەمەلىك پەن تەپە-تەڭدىك قاعيداتتارىن نىعايتۋعا باعىتتالعان.
ايدوس سارىم قازىرگى قولدانىستاعى كونستيتۋتسيادا پارلامەنت پالاتالارىنىڭ وكىلەتتىكتەرى 53-باپتىڭ 13 تارماعىندا بەلگىلەنگەنىن ەسكە سالدى. ال جاڭا رەداكتسيادا بۇل تارماقتار سانى 23-كە دەيىن ۇلعايادى.
«ياعني, وكىلەتتىكتەر كولەمى ءبىر جارىم ەسەدەن استام ارتادى. بۇل جاڭا وكىلەتتىكتەردىڭ بارلىعى جالپىۇلتتىق رەفەرەندۋمدا ماقۇلدانعان جاعدايدا ءتيىستى كونستيتۋتسيالىق زاڭدار اياسىندا ناقتىلانىپ, جۇزەگە اسىرىلادى. اتالعان وزگەرىستەر ءتۇرلى قوعامدىق الاڭداردا بىرنەشە رەت ايتىلىپ, جۇمىس توبىنىڭ وتىرىستارىندا جان-جاقتى تالقىلاندى جانە قىزىلوردا قالاسىندا وتكەن ۇلتتىق قۇرىلتايدا مەملەكەت باسشىسىنىڭ تاراپىنان تۇجىرىمدامالىق تۇرعىدا قولداۋ تاپتى. سوندىقتان بۇل تۇجىرىمدامالىق وزگەرىستەردى ءبىز قولدايمىز», دەپ مالىمدەدى ول.
دەپۋتاتتىڭ پايىمداۋىنشا, ۇسىنىلىپ وتىرعان تۇزەتۋلەر پارلامەنتتىڭ ينستيتۋتسيونالدىق ءرولىن كۇشەيتىپ, ەلدەگى ساياسي جۇيەنىڭ تۇراقتىلىعى مەن تيىمدىلىگىن ارتتىرۋعا قىزمەت ەتەدى.
