20 قاڭتار كۇنى قىزىلوردادا وتكەن ۇلتتىق قۇرىلتايدىڭ V وتىرىسىندا مەملەكەت باسشىسى كىسى قولىنان قازا تاپقان نۇرايدىڭ وقيعاسىنا قاتىستى پىكىر ءبىلدىردى. اتالعان ماسەلەگە پرەزيدەنت نازار اۋدارىپ,ء ىىم مەن باس پروكۋراتۋراعا تىكەلەي باقىلاۋ جاساۋدى تاپسىرعان ەدى. ىلە-شالا نۇراي سەرىكبايدىڭ ولىمىنە قاتىستى قىلمىستىق ءىس قوزعالدى.
ءىىم ورىنباسارى سانجار ءادىلوۆتىڭ ايتۋىنشا, تەرگەۋ جابىرلەنۋشى ءماجبۇرلى نەكەگە قاتىستى ارىزبەن جۇگىنگەن كەزدە ءىستى تىركەمەگەن پوليتسيا قىزمەتكەرلەرىنە قاتىستى جۇرگىزىلىپ جاتىر.
«نەمقۇرايدىلىق بويىنشا قىلمىستىق ءىستىڭ قوزعالۋىنا, ەڭ الدىمەن, قىزمەتتىك مىندەتتەرىنە سايكەس جابىرلەنۋشىنىڭ ءماجبۇرلى نەكەگە قاتىستى ءوتىنىشىن تىركەۋ بويىنشا ءتيىستى شارالار قابىلداماعان لاۋازىمدى تۇلعالار تارتىلادى. ءبىز قازىر وسىنى انىقتاپ وتىرمىز. جابىرلەنۋشىنىڭ ارىزىن قابىلداماي, ءىستى نومەنكلاتۋرالىق تارتىپپەن ەسەپتەن شىعارعان لاۋازىمدى تۇلعالار تەرىس سەبەپتەرمەن جۇمىستان بوساتىلدى», دەدى ول.
سانجار ءادىلوۆتىڭ سوزىنشە, ەڭ الدىمەن جاۋاپكەرشىلىك اۋداندىق پوليتسيا باسقارماسىنىڭ لاۋازىمدى تۇلعالارىنا جۇكتەلەدى. سونداي-اق تەرگەۋ اياسىندا قالالىق پوليتسيا دەپارتامەنتى باسشىلىعىنىڭ ارەكەتتەرىنە دە قۇقىقتىق باعا بەرىلەدى.
مارقۇم نۇراي سەرىكبايدىڭ اعاسىنىڭ ايتۋىنشا, كۇدىكتى ۇزاق ۋاقىت بويى ونىڭ قارىنداسىن اڭدىپ, ستالكينگپەن اينالىسقان. باق-تا تاراعان مالىمەتتەرگە سايكەس, ول قىزعا تۇرمىسقا شىعۋعا ۇسىنىس جاساعان. الايدا قىز كەلىسىمىن بەرمەگەننەن كەيىن, ونى ءماجبۇرلى تۇردە الىپ قاشقان. كەيىن نۇرايدى تۋىستارى قايتارىپ اكەلگەن. وسىدان سوڭ پوليتسياعا ارىز جازىلعانىمەن, قىلمىستىق ءىس قوزعالماعان.
نۇراي سەرىكباي 11 قاڭتار كۇنى شىمكەنتتە پىشاق جاراقاتتارىنان قازا تاپتى. الەۋمەتتىك جەلىدە تاراعان بەينەجازبالاردا قىزدىڭ قاشۋعا تىرىسقانى, كەيىن قارسىلىق كورسەتكەنى, ال كۇدىكتىنىڭ ونى ۇرىپ, پىشاق سۇققانى كورىنەدى. ودان كەيىن كۇدىكتى وقيعا ورنىنان قاشىپ كەتكەن.
13 قاڭتار كۇنى پوليتسيا 28 جاستاعى كۇدىكتىنى قالادان 10 شاقىرىم جەردە ۇستادى. ەر ادام ۋاقىتشا ۇستاۋ يزولياتورىنا قامالدى.
كەيىن شىمكەنت قالالىق پوليتسيا دەپارتامەنتى كۇدىكتىنىڭ قاماۋعا الىنعانىن حابارلادى.
