جولبارىستى جايراتقان جىگىت

وسى اڭگىمەنى بۇرىندارى دا ەستىگەن ەدىم. بىراق اسا ءمان بەرمەگەن بولاتىنمىن. جاقىندا توقساننان اسىپ قالعان كەلىسكەن دەگەن قاريا جانە ايتتى. وتكەن عاسىردىڭ باسىندا قازىرگى قارا­وزەكتىڭ شىعىس جاعىندا, بالقاش كولىنىڭ كەڭ قولتىعىنداعى التىنبەك سايىندا شي وتە قالىڭ بولىپتى. مالعا دا جايلى بولسا كەرەك. كەڭەس وكىمەتى دە جەرگىلىكتى حالىققا «قۇرىعىن» سالا قويماپتى. ءوز تىرلىكتەرىن وزدەرى كۇيتتەگەن ەل اندا-ساندا مالعا يت-قۇس تيسە دە اسا ءمان بەرمەيدى ەكەن. «وسى ماڭدا ءبىر جولبارىس پايدا بولىپتى», دەگەن ءسوز دە ولارعا ەش اسەر ەتپەگەن. ...سول كۇنى گۇلدارى شي تارتۋعا ەرتە شىعىپتى. بويشاڭ كەلگەن سۇيەكتى جىگىت ەڭبەكقورلىعىمەن بۇكىل اۋىلعا سۇيكىمدى ەكەن. قولىندا اعاش ساپتى, وتكىر وراعىن بەلىنە قىستىرىپ جاياۋ بارىپتى. ءشيدى كوپ تارتسا كەرەك. ەكى جەردەن بۋىپ, ءشيدى باسىنان اسىرا يىعىمەن سۇيرەپ كەلە جاتىپتى. اۋىلعا جاقىنداپ قالعاندا جولبا­رىس­تىڭ «ارر...ررر» ەتكەن دىبىسىن ەس­تىپ قالادى. سول ساتتە جەرگە ەتپەتىنەن قۇلاپ تۇسەدى. ارتقى جاعىنان قارعىعان جولبارىستىڭ ەكپىنىنەن قۇلاعانىن, جولبارىستىڭ بۇعان ءشيدى جۇلمالاپ جاتقانىنان بىردەن اڭعارىپتى. شي وراتىن شالعىسى قولىندا ەكەن. جانۇشىرا ورنىنان تۇرايىن دەسە شي باسىپ قالعان. ءشيدىڭ ۇستىندە جولبارىس جاتىر. ونىڭ قولىنا بىردەن جولبارىستىڭ شوندانايى ىلىگىپتى. تاس قىلىپ ۇستاعان كۇيى وتكىر شي ورعىشىمەن تارتىپ جىبەرىپتى. قولىنا ىستىق قان تىز ەتە قالادى. سول ساتتە اق جولبارىس الدى-ارتىنا قاراماي قاشا ءجو­نەلىپتى. ورنىنان تۇرىپ قاراسا, جولبارىس كەتكەن جاقتا ىزىمەن قوسا سورعالاعان قان. جىرتقىشتان قۇتىلعاننان كەيىن ورىپ العان شيىنە دە قاراماستان گۇلدارى اۋىلعا قاراي قاشىپتى. قۋ تىرلىك ۇيدە تىنىش جاتقىزعان با؟ ءبىر كۇن وتكەننەن كەيىن الگى ورعان ءشيىن الىپ كەلۋگە گۇلدارى قايتا بارىپتى. سوندا قانسىراپ ءولىپ قالعان الگى جولبارىستى كورىپتى. «وسى جولبارىس بالقاش اۋدانى جاعىنا قاراستى ايماقتاعى سوڭعى جىرتقىش بولسا كەرەك», دەيدى كەلىسكەن كەيۋانا. مارات قاشقىنباەۆ. الماتى وبلىسى, بالقاش اۋدانى, باقاناس اۋىلى.