ورتالىقتىڭ اشىلۋىنا قازۇۋ باسقارما توراعاسى-رەكتور جانسەيىت تۇيمەباەۆ, «Aerial Solutions» جشس اۆياتسيالىق وقۋ ورتالىعىنىڭ باس ديرەكتورى پەريزات قۇدايبەرگەنوۆا, قورعانىس مينيسترلىگى ۇشقىشسىز ۇشۋ جۇيەلەرىن دامىتۋ جانە قولدانۋ دەپارتامەنتىنىڭ باسشىسى يسا تەيمۋراز ۇلى, قورعانىس مينيسترلىگى اۋە قورعانىسى كۇشتەرى اسكەري-اۋە كۇشتەرى قولباسشىلىعى باس ورتالىعىنىڭ باسشىسى ساكەن رۇستەموۆ, ۇلتتىق قاۋىپسىزدىك اكادەمياسىنىڭ كافەدرا مەڭگەرۋشىسى ارتۋر يماشەۆ, قازاقستان اۆياتسيا اكىمشىلىگى ليتسەنزيالاۋ دەپارتامەنتىنىڭ ديرەكتورى ءادىلجان سۇلتانوۆ, بەلگىلى عالىمدار مەن وقىتۋشىلار قاتىستى.
جيىندى قازۇۋ باسشىسى جانسەيىت تۇيمەباەۆ اشىپ, ورتالىقتىڭ ىسكە قوسىلۋى ەلىمىزدىڭ تەحنولوگيالىق دامۋ جولىندا ەرەكشە ماڭىزى بار ەكەنىن جەتكىزدى.
«مەملەكەت باسشىسى قاسىم-جومارت توقاەۆ جاساندى ينتەللەكتىنى دامىتۋ جونىندەگى كەڭەستىڭ العاشقى وتىرىسىندا ء«بىزدىڭ ۇلت رەتىندە باسەكەگە قابىلەتتىلىگىمىز بەن ەگەمەندىگىمىز وسى تەحنولوگيانى قالاي پايدالاناتىنىمىزعا تىكەلەي بايلانىستى. ءار مامان تسيفرلىق داعدىلاردى جەتىك مەڭگەرىپ, جاساندى ينتەللەكتىنىڭ مۇمكىندىكتەرىن جۇمىس بارىسىندا ءتيىمدى قولدانا ءبىلۋى قاجەت» دەپ اتاپ وتكەن بولاتىن. سونداي-اق ءۇش جىل ىشىندە ەلىمىزدى تولىق تسيفرلاندىرۋعا بايلانىستى ستراتەگيالىق ماقسات قويدى. وسى مىندەتتى جۇزەگە اسىرۋدا عىلىمي قاۋىمداستىق پەن بىرلەستىكتەرگە زور جاۋاپكەرشىلىك جۇكتەلدى. قازۇۋ-دا ۇشقىشسىز اۆياتسيانى دامىتۋ يننوۆاتسيالىق ورتالىعى اشىلۋى – اۋقىمدى عىلىمي جوبالاردى ىسكە اسىرۋعا, زاماناۋي درونداردى جاساپ, قۇراستىرۋعا, بىلىكتى مامانداردى دايارلاۋعا, ستۋدەنتتەردىڭ تاعىلىمدامادان وتۋىنە مۇمكىندىك بەرەدى. مۇندا جاسالعان دروندار ەكونوميكانىڭ ءتۇرلى سالاسىندا ءتيىمدى قولدانىلاتىن بولادى. بىرلەسكەن ورتالىق ءوندىرىس پەن ۋنيۆەرسيتەت اراسىنداعى ماڭىزدى سەرىكتەستىكتىڭ ناقتى ناتيجەسىن كورسەتەدى. جوبانىڭ ىسكە اسۋى ەلىمىزدەگى تسيفرلىق ينفراقۇرىلىمنىڭ دامۋىنا, ازاماتتىق ۇشقىشسىز اۆياتسيا سالاسىنداعى مەملەكەتتىك ستراتەگيانى جۇزەگە اسىرۋعا ەلەۋلى سەرپىن بەرەدى», دەدى رەكتور.
ال «Aerial Solutions» جشس اۆياتسيالىق وقۋ ورتالىعىنىڭ باس ديرەكتورى پ.قۇدايبەرگەنوۆا قازاق ۇلتتىق ۋنيۆەرسيتەتىنىڭ بازاسىندا اشىلعان ۇشقىشسىز اۆياتسيانى دامىتۋ يننوۆاتسيالىق ورتالىعى عىلىمدى, ءبىلىمدى جانە زاماناۋي ۇشقىشسىز تەحنولوگيالاردى بىرىكتىرىپ, حالىقارالىق ستاندارتتارعا سايكەس ماماندار دايارلاۋعا جول اشاتىنىن اتاپ ءوتتى. ونىڭ ايتۋىنشا, ۋنيۆەرسيتەتتەگى اكادەميالىق بازا ساپالى تاجىريبەلىك ءبىلىمدى قامتاماسىز ەتىپ, ونەركاسىپ, اۋىل شارۋاشىلىعى جانە تسيفرلىق مونيتورينگ سالالارىنىڭ دامۋىنا ىقپال ەتپەك. ورتالىق جاس ماماندارعا اشىلعان جاڭا مۇمكىندىك, ەلىمىزدەگى اۆياتسيالىق جوبالاردى الەمدىك دەڭگەيگە شىعارۋعا ىقپال ەتەتىن بولادى.
سونداي-اق قورعانىس مينيسترلىگى اۋە قورعانىس كۇشتەرى باس باسقارماسىنىڭ جەتەكشىسى ساكەن رۇستەموۆ ۇلتتىق ۋنيۆەرسيتەتپەن بۇل سالاداعى ىنتىماقتاستىقتىڭ ماڭىزىنا توقتالىپ, ەلىمىزدەگى اۋە قوزعالىسى سالاسىنىڭ دامۋىنا ەلەۋلى ۇلەس قوساتىن يننوۆاتسيالىق جوبالاردىڭ دامۋى ۇشقىشسىز اۆياتسيا سالاسىنىڭ جاڭا دەڭگەيگە كوتەرىلۋىنە وڭ ىقپال ەتەتىنىن باياندادى. سونىمەن بىرگە «Aerial Solutions» كومپانياسى اۆياتسيالىق وقۋ ورتالىعىنىڭ باسشىسى ماۋلەن مۇستافاەۆ مۇندا زاماناۋي كادرلار دايارلاناتىنىن جەتكىزدى.
ونىڭ ايتۋىنشا, ورتالىق بازاسىندا ازاماتتىق جانە مەملەكەتتىك اۆياتسيا سالاسىنا ماماندار دايارلاۋدا قىسقا كۋرستار وتەدى. سونىڭ بارىسىندا ينجەنەرلەر, قۇراستىرۋشىلار بىلىكتىلىگىن ارتتىرىپ, عىلىمي زەرتتەۋ جانە تاجىريبەلىك-كونسترۋكتورلىق جۇمىستارعا قاتىسادى. مۇنىمەن قوسا قازۇۋ-مەن بىرلەسە وتىرىپ, بيىل جاڭا وقۋ جىلىنان باستاپ جوعارى ءبىلىمدى كادرلار دايارلانباق. باكالاۆردا وقيتىن ماماندار ۇشقىشسىز تەحنولوگيالاردى قۇراستىرۋ, باسقارۋ باعىتىندا ءبىلىم الادى. ورتالىقتىڭ اشىلۋى – اسكەردە ازاماتتىق بورىشىن وتەپ جۇرگەن ساربازدارعا دا ۇلكەن مۇمكىندىك. ولار وتان الدىنداعى بورىشىن 1 جىل وتەگەننەن كەيىن 2 جىل جاڭا وقۋ جىلىنان باستاپ وسى باعىتتا ءبىلىم الادى. وسى ورايدا «سارباز+» جوباسىمەن ىنتىماقتاستىق كوزدەلىپ وتىر. يننوۆاتسيالىق ورتالىقتا دروندار مەن سەرۆيستەردى ىشكى جانە حالىقارالىق نارىققا شىعارۋ, يننوۆاتسيالىق ستارتاپتاردى قولداۋ, كوممەرتسيالاندىرۋ ىسكە اسادى.
بۇگىندە قازاق ۇلتتىق ۋنيۆەرسيتەتىنىڭ اۋماعىندا 2 مىڭ شارشى مەتر اۋماقتا درون قۇراستىرۋ ءوندىرىسى ورنالاسقان. ەندى از ۋاقىتتا بىلىكتى ينجەنەرلەر ەلىمىزدەگى درون ءوندىرىسىن قولعا الىپ, قورعانىس سالاسى مەن اۋىل شارۋاشىلىعىنا ارنالعان ۇشقىشسىز ۇشۋ اپپاراتتارىن قۇراستىراتىن بولادى.
الماتى
