سۋرەتتەردى تۇسىرگەن – ەرلان ومار, «ەQ»
كاسىپورىن تاريحى 1993 جىلى انەستەزيولوگ-دارىگەر كەڭەس قازباعار ۇلى قۇسايىنوۆتىڭ تاعدىرلى شەشىمىنەن باستاۋ الدى. جالپى حيرۋرگيا, ونكولوگيا جۇيەسىندە ۇزاق جىل ەڭبەك ەتكەن بىلىكتى مامان ستەريلدى پلاستيكالىق كاتەتەر, درەناج تۇتىكتەرى, قىسقىشتاردىڭ تۇگەلدەي شەتەلدەن تاسىمالداناتىنىنا قىنجىلاتىن. سول كەزەڭدەگى وتپەلى ۋاقىتتىڭ قيىندىعىنا قاراماستان, ول شيكىزاتتى سىرتتان الدىرسا دا, دايىن ءونىمدى وزىمىزدە جاساۋعا بەل بۋدى. شيكىزات دايىنداۋ ماسەلەسىن بولاشاقتىڭ ەنشىسىنە قالدىردى.
وكىنىشكە قاراي, كومپانيانىڭ باسى-قاسىندا جۇرگەن ازامات كەڭەس قۇسايىنوۆ 1997 جىلى ومىردەن وزدى. باستاعان ءىسىن جارى, سەرىكتەستىكتىڭ قازىرگى ديرەكتورى باعلان باققۇلوۆا جالعاستىرىپ اكەتتى. ول العاشقى جىلدارى بىرنەشە تەرموپلاست-اۆتومات ساتىپ الىپ, ەسكى گاراجداردى كۇردەلى جوندەۋدەن وتكىزىپ, بۇيىمداردىڭ العاشقى ۇلگىلەرىن شىعارعانىن تەبىرەنە ەسكە الادى. ۋاقىت وتە كەلە قاراۋسىز عيمارات 1 150 شارشى مەترلىك ۇلكەن تسەحقا اينالدى. باعلان دوسجانقىزى باستاعان ۇجىم حالىقارالىق كورمەلەردە جابدىقتاردى, وزىق تەحنولوگيالاردى زەرتتەپ, الەمدىك زاۋىتتاردىڭ تاجىريبەسىن وندىرىسكە ەنگىزدى. «دامۋ» قورىنىڭ سۋبسيديالاۋ, كەپىلدىك بەرۋ قۇرالدارى ارقىلى 566 ملن تەڭگە نەسيە, 32 ملن تەڭگە كەپىلدىك راسىمدەلىپ, زاماناۋي جابدىقتار الىندى, اينالىم قاراجاتى تولىقتىرىلدى.
كومپانيانىڭ اتقارۋشى ديرەكتورى, مەديتسينا عىلىمدارىنىڭ كانديداتى رۋسلان احمەتوۆتىڭ ايتۋىنشا, زاۋىت – رەسپۋبليكادا مەديتسينالىق ەكسترۋزياعا ماماندانعان, پوستكەڭەستىك كەڭىستىكتە تولىق تسيكلدى ءوندىرىس جولعا قويىلعان ساناۋلى كاسىپورىننىڭ ءبىرى. قازىرگى تاڭدا 7 مىڭ شارشى مەتر اۋماقتى الىپ جاتقان كەشەندە وندىرىستىك جەلىلەر, زەرتحانالار, قويما ءۇي-جايلارى ورىن تەپكەن. مۇندا كاتەتەر, درەناجدىق تۇتىكتەردەن باستاپ, كىندىك قىسقىشتارى, ەندوسكوپياعا ارنالعان قۇرعاتقىشتارعا دەيىن 150 ءتۇرلى بۇيىم شىعارىلادى. جىلدىق قۋاتتىلىعى – شامامەن 4,5 ملن دانا ءونىم. بۇل كولەم ەلدەگى مەديتسينالىق مەكەمەلەر قاجەتتىلىگىنىڭ 99%-ىن وتەۋگە قاۋقارلى.
رۋسلان احمەتوۆ بۇل ماتەريالدارسىز بىردە-ءبىر حيرۋرگيالىق وپەراتسيا وتپەيتىنىن العا تارتادى. بۇرىن يمپورتتىق كاتەتەرلەر نارىقتا 60-120 ەۋرو تۇرسا, قازىر وتاندىق ءونىم باعاسى 200 بەن 2 000 تەڭگە ارالىعىندا عانا. اپپاراتۋرالىق جابدىقتالۋى جاعىنان زاۋىت اقش, ەو ەلدەرى, وڭتۇستىك-شىعىس ازيادا جۇمىس ىستەيتىن بالاما ءوندىرىس ورىندارىنان كەم تۇسپەيدى.
تەحنولوگيالىق ۇدەرىستىڭ بارلىق كەزەڭى: مەديتسينالىق ەكسترۋزيا, قىسىممەن قۇيۋ, فرەزەرلەۋ, جيناۋ, قاپتاۋ, ستەريلدەۋ جۇمىستارى ن14 سىنىبىنىڭ اسا تازا جاعدايىندا جۇرگىزىلەدى. ءوندىرىس ورنىنداعى تازالىق بىردەن نازار اۋدارتادى. اۋانىڭ ءبىر تەكشە مەترىندەگى ميكروبولشەكتەر سانى 43 مىڭنان اسپايدى. بۇل كورسەتكىش اۋرۋحاناداعى وپەراتسيالىق بولمەنىڭ تازالىعى دەڭگەيىنەن دە بىرنەشە ەسە جوعارى. ستەريلدىكتى قامتاماسىز ەتەتىن قوندىرعىلار وراسان زور ەلەكتر ەنەرگياسىن تۇتىنادى. اۋا تاۋلىگىنە 24 ساعات تازا بولۋعا ءتيىس بولعاندىقتان, كوممۋنالدىق تولەم قۇنى دا جوعارى. سول سەبەپتى كاسىپورىن تولىعىمەن اۆتونومدى كەشەن رەتىندە جابدىقتالعان. ونىڭ بارلىق تەحنولوگيالىق جەلىنىڭ ۇزدىكسىز جۇمىسىن قامتاماسىز ەتەتىن جەكە ترانسفورماتورلىق قوسالقى ستانساسى, كومپرەسسورلىق, قازاندىق جۇيەسى بار. وسىناۋ كۇردەلى جۇيەگە نەبارى ءتورت ينجەنەر قىزمەت كورسەتەدى.
ءونىمنىڭ بۇكىل جەلىسى ISO 13 485 حالىقارالىق ساپا ستاندارتىنا سايكەس سەرتيفيكاتتالعان. كاسىپورىننىڭ جىل سايىن حالىقارالىق اۋديتتەن وتەتىن جەكە زەرتحاناسى, ساپانى باقىلاۋ ءبولىمى جۇمىس ىستەيدى. پنەۆماتيكالىق جۇيەلەر ماتەريال-پلاستيفيكاتوردى تىكەلەي تەرموپلاست-اۆتوماتتارعا, ەكسترۋزيالىق جەلىلەرگە بەرەدى. دايىن بۇيىمدار ستەريلدەۋ, وراۋ, باقىلاۋ ساتىلارىنان وتەدى.
قازىردە شيكىزات شەتەلدەن ساتىپ الىنادى. ونىڭ قۇرامىندا فتالات جوق, ادام اعزاسى ءۇشىن تولىعىمەن قاۋىپسىز, ويتكەنى ونىمدەر ىشكى ورگاندارمەن تىكەلەي بايلانىسقا تۇسەدى. دەگەنمەن كومپانيا ورتامەرزىمدى پەرسپەكتيۆادا شيكىزاتتى وتاندىق مۇناي وڭدەۋ زاۋىتتارىنان الۋ ماقساتىندا كەلىسسوزدەر جۇرگىزىپ جاتىر. سونداي-اق پاتسيەنتتەردىڭ جاراقات الۋ قاۋپىن تومەندەتۋ ءۇشىن جاڭا ءونىم – تۇنباسىز كاتەتەرلەر دايىنداۋ قولعا الىندى. ساراپشىلاردىڭ پىكىرىنشە, 30 تاۋلىككە دەيىن پايدالانۋعا جارامدى بۇل يننوۆاتسيا ەرەسەكتەرگە دە, نارەستەلەرگە دە قولايلى بولادى.
ارينە, وندىرىسشىلەردى تولعاندىراتىن تۇيتكىلدەر دە جوق ەمەس. ر.احمەتوۆتىڭ ايتۋىنشا, بيۋروكراتيا, راسىمدەۋدىڭ ۇزاقتىعى بيزنەسكە قولبايلاۋ بولىپ وتىر. كەيىنگى جىلدارى دارىلىك زاتتار, مەديتسينالىق بۇيىمداردى ساتىپ الۋدىڭ شەكتى باعالارى, تىزىمدەرى بار بۇيرىقتاردى بەكىتۋدىڭ كەشىكتىرىلۋىنەن, قويمالار كونتراباندالىق ونىمدەرگە تولىپ كەتۋ قاۋپى بار.
زاۋىت وكىلدەرى ءونىم سۇرىپتالىمىن ۇلعايتۋ ءۇشىن دەنساۋلىق ساقتاۋ مينيسترلىگىنىڭ جەتەكشىلىك ەتەتىن دەپارتامەنتىمەن تىعىز ىنتىماقتاستىققا ءۇمىتتى. جوعارى تەحنولوگيا, ينجەنەرلىك ويلىلىق, سيرەك كەزدەسەتىن دەربەستىك دەڭگەيىن ۇيلەستىرگەن بۇل كاسىپورىن – وتاندىق ونەركاسىپتىڭ ماڭىزدى بولشەگى.
الماتى
