رومان سكليار ەكىباستۇز قالاسىنداعى جىلۋ بەرۋ ماۋسىمى قالاي ءوتىپ جاتقانىمەن تانىستى. وبلىس اكىمى اسايىن بايحانوۆ جىلۋمەن جابدىقتاۋ جەلىلەرىن جاڭعىرتۋ جۇمىستارىنىڭ ناتيجەسىندە جىلۋ بەرۋ ماۋسىمى قالىپتى رەجىمدە ءوتىپ جاتقانىن باياندادى.
وڭىردە 2023–2025 جىلدارى جالپى سوماسى 11,3 ملرد تەڭگەگە جم-2 جانە جم-7 جىلۋ ماگيسترالدارى قايتا جاڭارتىلعان, ونىڭ ىشىندە 6,7 ملرد تەڭگە رەسپۋبليكالىق بيۋدجەتتەن بولىنگەن. گيدراۆليكالىق سىناقتاردىڭ قورىتىندىسى بويىنشا 13,5 شاقىرىم جەلى جوندەلىپ, 341 اقاۋ جويىلدى. جەرگىلىكتى بيۋدجەتتەن قوسىمشا 1,7 ملرد تەڭگە ءبولىنىپ, 19 شاقىرىم جەلى جوندەلدى.
سونداي-اق ءبىرىنشى ۆيتسە-پرەمەر ەكىباستۇز جەو جاڭعىرتۋ جۇمىستارىنىڭ بارىسىمەن تانىستى. «Energy Solution Center» جشس باس ديرەكتورى ايداربەك قىستاۋباەۆ نەگىزگى جابدىقتاردى جوندەۋدىڭ كەشەندى باعدارلاماسى جونىندە باياندادى.
2023–2025 جىلدارى مۇندا №5-9 ەنەرگەتيكالىق قازاندىقتار مەن №11-15 سۋ جىلىتۋ قازاندىقتارىنا جوندەۋ جۇرگىزىلدى. ال №6-8 قازاندىق اگرەگاتتارىندا اعىمداعى كەڭەيتىلگەن جوندەۋ جۇمىستارى كەزەڭ-كەزەڭىمەن جۇرگىزىلىپ, جابدىقتار دا قايتا جاڭارتىلعان. بۇل جۇمىستار ۇكىمەت رەزەرۆى مەن وبلىس اكىمدىگىنىڭ قاراجاتى ەسەبىنەن جۇزەگە اسىرىلدى.
2026–2027 جىلدارى اكىمشىلىك-تۇرمىستىق كەشەن سالۋ, ەكولوگيالىق قاۋىپسىزدىكتى قامتاماسىز ەتۋ ءۇشىن كۇل ۇيىندىلەرىن قايتا جاڭعىرتۋ, گەنەراتسيالاۋ قۋاتتارىن ۇلعايتۋ جوسپارلانعان.
تسيفرلاندىرۋ مەن ونەركاسىپتىك قاۋىپسىزدىكتى ارتتىرۋ ماسەلەسىنە دە ەرەكشە نازار اۋدارىلىپ وتىر. 2025 جىلى ستانسادا قىزمەتكەرلەر ءۇشىن «اقىلدى كاسكالار» ەنگىزىلدى, ال 2026 جىلى ەڭبەك قاۋىپسىزدىگىن باقىلاۋدى كۇشەيتۋ ماقساتىندا بەينەجەتونداردى ەنگىزۋ جوسپارلانىپ وتىر. رومان سكليار تسيفرلىق شەشىمدەردى وندىرىستىك باقىلاۋ جۇيەسىنە بىرىكتىرىپ, ولاردى تاجىريبەدە قولدانۋدى تاپسىردى.
سونىمەن قاتار پرەمەر-ءمينيستردىڭ ءبىرىنشى ورىنباسارى «Railways Systems KZ» حولدينگىنىڭ ءوندىرىس ورنىندا بولىپ, جالپى ينۆەستيتسيا كولەمى 500 ملرد تەڭگەگە جۋىقتايتىن ($976 ملن), جىلىنا 1 ملن تونناعا دەيىن جوعارى ساپالى بولات وندىرەتىن زاماناۋي ەلەكترمەتاللۋرگيالىق زاۋىتتىڭ قۇرىلىسىمەن تانىستى. زاۋىتتى ىسكە قوسۋ 2028 جىلعا جوسپارلانعان جانە 1 مىڭنان استام جاڭا جۇمىس ورنى اشىلادى. ءونىم ىشكى نارىقپەن قاتار ەكسپورتقا دا باعىتتالادى: ءونىمنىڭ 40%-عا جۋىعى تمد ەلدەرى مەن ەۋرووداققا جىبەرىلەدى.
پاۆلودار جەو-2 ورتالىعىندا وبلىس اكىمى اسايىن بايحانوۆ 2025–2026 جىلعى جىلۋ بەرۋ ماۋسىمىنىڭ بارىسى تۋرالى باياندادى. وبلىس ورتالىعىن جىلۋمەن ساپالى قامتاماسىز ەتۋ ماقساتىندا ۇزىندىعى 5,9 شاقىرىم بولاتىن جم-20ا جىلۋ ماگيسترالى سالىندى. جىلۋ جەلىلەرىندە گيدراۆليكالىق سىناقتار جۇرگىزىلىپ, جالپى ۇزىندىعى 7,2 شاقىرىم بولاتىن 343 اقاۋ جويىلدى. 2026 جىلى جالپى قۇنى 4,8 ملرد تەڭگەگە 21 شاقىرىم كۆارتالىشىلىك جەلىلەردى قايتا جاڭعىرتۋ جانە 8,1 شاقىرىم ماگيسترالدىق جىلۋ جەلىلەرىنە اعىمداعى جوندەۋ جۇمىستارىن جۇرگىزۋ جوسپارلانعان.
«پاۆلودارەنەرگو» اق باس ديرەكتورى ولەگ ششەمەل 2025 جىلى جەو-2 ورتالىعىندا نەگىزگى جابدىقتارعا جۇرگىزىلگەن جوندەۋ جۇمىستارى تۋرالى ەسەپ بەردى. 2026–2027 جىلدارى ستانسادا جالپى قۇنى 17,2 ملرد تەڭگەگە قازاندىقتار مەن تۋربواگرەگاتتارعا كۇردەلى جوندەۋ, كۇل تازالاۋ جۇيەلەرى مەن جارىقتاندىرعىشتى قايتا جاڭعىرتۋ, زاماناۋي تسيفرلىق شەشىمدەر مەن IT-جۇيەلەردى ەنگىزۋ جوسپارلانعان. جالپى قۇنى 18,6 ملرد تەڭگەگە وسىنداي جۇمىستار جەو-3 ورتالىعىندا دا جۇرگىزۋ قاراستىرىلعان.
رومان سكليار جوندەۋ ناۋقانى مەن ينۆەستيتسيالىق باعدارلامالاردىڭ ساپالى ورىندالۋىن, مەرزىمدەردىڭ ساقتالۋىن, تەحنولوگيالىق جانە ەكولوگيالىق كورسەتكىشتەردىڭ ورىندالۋىن قاتاڭ باقىلاۋدى, سونداي-اق جىلۋ بەرۋ ماۋسىمىنىڭ سەنىمدى ءوتۋىن قامتاماسىز ەتۋدى تاپسىردى.
جۇمىس ساپارى بارىسىندا ءبىرىنشى ۆيتسە-پرەمەر «پاۆلودار مۇناي-حيميا زاۋىتى» جشس دا باردى. پمحز اۋىر گازويلدەردى وڭدەۋ جانە اشىق مۇناي ونىمدەرىنىڭ شىعىمىن ارتتىرۋعا باعىتتالعان SENIM-D جوباسىن قوسا العاندا, اۋقىمدى جاڭعىرتۋ جوبالارىن جۇزەگە اسىرۋدا. بۇعان قوسا, كاسىپورىندا جاساندى ينتەللەكت شەشىمدەرىن قولدانا وتىرىپ, اۆتوماتتاندىرۋ جانە تسيفرلاندىرۋ جۇيەلەرىن ەنگىزۋ ماستەر-جوسپارى ازىرلەنگەن. زاۋىت باسشىلىعىنا ءوندىرىستىڭ تيىمدىلىگى مەن تەحنولوگيالىق جاراقتاندىرىلۋىن ارتتىرۋ جۇمىستارىن جالعاستىرۋ تاپسىرىلدى.
جۇمىس ساپارىنىڭ سوڭىندا رومان سكليار پاۆلودار قالاسىنداعى 2025 جىلى 1 قىركۇيەكتە «بولاشاق مەكتەبى» مەملەكەتتىك باعدارلاماسى اياسىندا اشىلعان №48 جالپى ءبىلىم بەرەتىن مەكتەپتىڭ قىزمەتىمەن تانىستى. مەكتەپ 1200 وقۋشىعا ارنالعان جانە زاماناۋي تسيفرلىق ءارى ينكليۋزيۆتى ينفراقۇرىلىممەن جابدىقتالعان. ءبىرىنشى ۆيتسە-پرەمەر بالالاردىڭ جان-جاقتى دامۋى ءۇشىن تەڭ جانە قولايلى جاعداي جاساۋدىڭ ماڭىزدىلىعىن اتاپ ءوتتى.
جۇمىس ساپارى پاۆلودار وبلىسىنىڭ تۇراقتى الەۋمەتتىك-ەكونوميكالىق دامۋىنا باعىتتالعان ەنەرگەتيكا, ونەركاسىپ جانە الەۋمەتتىك ينفراقۇرىلىم سالالارىنداعى نەگىزگى جوبالاردىڭ ىسكە اسىرىلۋ بارىسىن كەشەندى تۇردە باعالاۋعا مۇمكىندىك بەردى.
