ساۋدا جانە ينتەگراتسيا مينيسترلىگىنىڭ حابارلاۋىنشا, بيىل 4 قاڭتاردان باستاپ, ەلىمىزدە الەۋمەتتىك ماڭىزى بار ازىق-ت ۇلىك تاۋارلارىنىڭ ۋاقىتشا كەڭەيتىلگەن تىزبەسى ەنگىزىلدى. بۇعان دەيىن تىزبە 19 اتاۋدان تۇرسا, قازىر ول 31 اتاۋعا كوبەيدى. حالىق كوپ تۇتىناتىن, الەۋمەتتىك ماڭىزى بار ازىق-ت ۇلىكتىڭ قاتارىنا ەندى قيار, قىزاناق, الما, شاي, قايماق, بالىق, سيىر ەتى, تاۋىق, جىلقى ەتى مەن قاتتى ىرىمشىك
قوسىلدى.
بۇل ونىمدەرگە بەكەردەن بەكەر الەۋمەتتىك ماڭىز بەرىلىپ وتىرعان جوق. مۇنداي ونىمدەر – ەلدىڭ ەڭ كوپ تۇتىناتىن تاۋارلارى. ولاردىڭ باعاسىن وسىرۋگە شەكتەۋ قويىلادى. سوندىقتان باعا باقىلاۋعا الىنادى. الەۋمەتتىك ماڭىزدى ونىمدەردىڭ باعاسىنا 15 پايىزدان اسا ساۋدا ۇستەمەسى قوسىلعان جاعدايدا ساتۋشىعا الدىمەن ەسكەرتۋ جاسالادى, ودان كەيىن تاعى قايتالاسا, ايىپپۇل سالىنادى.
ۇلتتىق ستاتيستيكا بيۋروسىنىڭ دەرەكتەرىنە سۇيەنسەك, جاڭا جىلدىڭ العاشقى اپتاسىنداعى احۋال بويىنشا الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ يندەكسى 0,2 پايىزدى قۇراعان. بۇل وتكەن جىلدىڭ وسى كەزەڭىنە سايكەس كەلەدى. ول كەزدە دە كورسەتكىش 0,2 پايىز دەڭگەيىندە تىركەلگەن. «بيىل اتالعان كورسەتكىش كەڭەيتىلگەن تاۋارلار تىزبەسىن ەسكەرە وتىرىپ قالىپتاسقانىن اتاپ وتكەن ءجون. ەڭ باستىسى, ازىق-ت ۇلىك ونىمدەرىنىڭ قۇنى وسكەن جوق, باعا تۇراقتى تۇر», دەلىنگەن مينيسترلىكتىڭ مالىمدەمەسىندە.
ۆەدومستۆو وكىلدەرىنىڭ سوزىنشە, كەڭەيتىلگەن تىزبەگە ەنگەن بىرقاتار جاڭا تاۋار ءتۇرى كەرىسىنشە 0,1–0,5 پايىز ارالىعىندا ارزانداعانى بايقالعان. «باعا شامالى تومەندەسە دە بۇل باعانى تۇراقتاندىرۋ ۇدەرىسىنىڭ باستالعانىن, از ۋاقىتتا العاشقى جاقسى ناتيجەگە قول جەتكىزە باستاعانىمىزدى كورسەتەدى. مىسالى, جەمىس, كوكونىس ونىمدەرى بويىنشا الما باعاسى – 0,5 پايىزعا, قيار مەن قىزاناق 0,4 پايىزعا ارزاندادى. باكالەيا ونىمدەرى سەگمەنتىندە قاتتى جانە جارتىلاي قاتتى ىرىمشىكتەردىڭ باعاسى – 0,3 پايىزعا, قارا شاي – 0,2 پايىزعا تومەندەدى. سونداي-اق ەت جانە بالىق ونىمدەرى توبى بويىنشا باعا 0,1 پايىزعا ارزاندادى, ال ءسۇت ونىمدەرى ىشىندە قايماق باعاسىنىڭ 0,1 پايىزعا ارزانداعانى تىركەلدى», دەيدى مينيسترلىك وكىلدەرى.
باعانى تەجەۋ ماقساتىندا جىل باسىنان بەرى ساۋدا نىساندارىندا تۇراقتى مونيتورينگ جاسالىپ, بيزنەس وكىلدەرىنە اقپاراتتىق-ءتۇسىندىرۋ جۇمىسى قولعا الىنعان. جاقىندا ساۋدا جانە ينتەگراتسيا مينيسترلىگىنىڭ ساۋدا كوميتەتى توراعاسىنىڭ ورىنباسارى داۋلەن كابدۋشەۆ جەرگىلىكتى اتقارۋشى ورگانداردىڭ وكىلدەرىمەن بىرلەسىپ, ەلورداداعى بازارلاردا باعا مونيتورينگىنە شولۋ جاساپ, ساتۋشىلارعا ءتۇسىندىرۋ جۇمىستارىن وتكىزدى.
«وسىنداي جۇمىستاردى وڭىرلەردەگى ارىپتەستەرىمىز دە قولعا الدى. قازىر ساتۋشىلارعا بۇرىن ءامات تىزبەسىندە بولماعان جاڭا تاۋارلار تىزىمگە ەنگەنىن ءتۇسىندىرىپ ايتىپ جاتىرمىز. بۇل دەگەنىڭىز, ساۋدا كوميتەتى تاراپىنان تىزىمگە قوسىلعان تاۋارلاردىڭ ساۋدا ۇستەمەسىنە مەملەكەتتىك باقىلاۋ جۇرگىزىلەدى دەگەن ءسوز. قولدانىستاعى زاڭناماعا سايكەس الەۋمەتتىك تاۋارلارعا قويىلاتىن ەڭ جوعارى ساۋدا ۇستەمەسى 15 پايىزدان اسپاۋى كەرەك», دەيدى د.كابدۋشەۆ.
